ប្តីប្រពន្ធជនជាតិម៉ាឡេស៊ីមួយ នៅទីក្រុង Kuching រដ្ឋ Sarawak បានប្រទះឃើញសត្វឆ្កែមួយក្បាល ដែលក្បាលរបស់វាកំពុងជាប់នៅក្នុងធុងប្លាស្ទិក កាលពីថ្ងៃទី២១ ខែធ្នូ។ តែទោះជាយ៉ាងណា នៅពេលដែលពួកគេព្យាយាមជួយឆ្កែនោះ វាបានរត់ចូលព្រៃបាត់ទៅ។
លុះ៥ថ្ងៃក្រោយមក នៅល្ងាចថ្ងៃទី២៦ ខែធ្នូ បុរសមួយក្រុមបានរកឃើញឆ្កែរងគ្រោះនេះម្តងទៀត ហើយវាស្ថិតក្នុងសភាពស្រកសាច់ស្គមយ៉ាងខ្លាំង ដែលប្រហែលដោយសារតែវាមិនអាចស៊ីចំណី និងផឹកទឹកបាន ព្រោះតែក្បាលត្រូវធុងប្លាស្ទិក។
តែទោះយ៉ាងណា ពួកគេបានពិភាក្សាអំពីវិធីល្អបំផុត ដើម្បីជួយឆ្កែ និងដើរលបៗឆ្ពោះទៅរកវា។ ហើយនៅពេលនោះ វាបានភ័យស្លន់ស្លោ និងបានថយក្រោយ ដែលបណ្តាលឱ្យវាធ្លាក់ចូលទៅក្នុងប្រឡាយភក់ ហើយទីបំផុតក៏ជាប់គាំងនៅទីនោះផងដែរ។ បន្ទាប់មក បុរសទាំងនោះ បានត្រឡប់ទៅផ្ទះវិញយ៉ាងប្រញាប់ប្រញាល់ដើម្បីយកជណ្ដើរឈើមួយដើម្បីពួកគេជួយសង្គ្រោះឆ្កែ។
ពួកគេអាចទាញឆ្កែនោះមកខាងលើ និងដោះធុងជ័រចេញពីក្បាល។ បន្ទាប់មកពួកគេបានផ្តល់ចំណីដល់វា រួចក៏នាំវាទៅតំបន់ kampung ដើម្បីដោះលេងវាឲ្យមានសេរីភាពវិញផងដែរ។
បុរសម្នាក់ក្នុងចំណោមអ្នកចូលរួមជួយសង្គ្រោះចំនួន ៧ នាក់ បាននិយាយថា “អល់ឡោះបានបង្រៀនមនុស្សឱ្យស្រឡាញ់ភាវៈរស់ទាំងអស់ សូម្បីតែឆ្កែ និងជ្រូក។ ដរាបណា ពួកវាមានបញ្ហា ពួកវាគួរតែត្រូវបានជួយសង្គ្រោះ»។
បុរសទាំងនេះពិតជាស័ក្តិសមនឹងការសរសើរមែន! សូមអរគុណចំពោះការមិនគិតពីខ្លួនឯង និងសម្រាប់ការជួយសត្វដែលកំពុងជួបគ្រោះថ្នាក់។ តើអ្នកណាដឹងថាមានអ្វីកើតឡើង ប្រសិនបើពួកគេមិនទៅជួយសង្គ្រោះឆ្កែនោះ៕ រក្សាសិទ្ធិដោយ៖ លឹម ហុង
