វីដេអូបង្ហាញករណីកកស្ទះចរាចរណ៍យ៉ាងខ្លាំង នៅបណ្តោយផ្លូវជាតិលេខ៤ (កំពង់សោម-ភ្នំពេញ) កាលពីថ្ងៃទី១ ខែមករា ឆ្នាំ២០២២ ដែលបណ្តាលមកពីក្រុមអ្នកបើកបរមិនគោរច្បាប់ចរាចរណ៍ ដោយបើករុលប្រជ្រៀតចូលគន្លងអ្នកបើកផ្ទុយទិស រហូតដល់ ៦ ជួរ ឃើញថាបានធ្វើឲ្យមហាជនជាអ្នកបើកបរគោរពច្បាប់ រិះគន់យ៉ាងចាស់ៗដៃតែម្តង ហើយក្នុងនោះ អ្នកខ្លះក៏បានស្នើសុំសមត្ថកិច្ចផាកពិន័យពួកអ្នកបើករបៀបនេះផងដែរ។
បើតាមម្ចាស់វីដេអូ ដែលបានថតទិដ្ឋភាពកកស្ទះចរាចរណ៍ដ៏គ្មានសណ្តាប់ធ្នាប់នេះ បានប្រាប់ឲ្យដឹងទាំងហួសចិត្តថា ក្រុមរថយន្តភាគច្រើនជាអ្នកដើរលេងបោះតង់ថ្ងៃឆ្លងឆ្នាំ មកពីកំពង់សោមបានបើកគ្មានស្គាល់គន្លងឆ្វេងស្តាំផ្លូវអាទិភាពគេឡើយ ដោយរុលប្រជ្រៀងរហូត ៦ ជួរ ដែលធ្វើឲ្យអ្នកឡើងមកពីភ្នំពេញ រកផ្លូវបើកចេញមិនរួចទើបបណ្តាលឲ្យកកស្ទះយ៉ាងខ្លាំងបែបនេះ។
ដោយឡែកក្រោយវីដេអូនេះ ត្រូវបានចែករំលែកយ៉ាងផុសផុល ធ្វើឲ្យមហាជនរិះគន់ឡើងកក្រើក ចំពោះបញ្ហានេះ ដោយសារម្នាក់ៗគិតតែពីខ្លួនឯង មិនខ្វល់ពីអ្នកដទៃ និងក៏ស្នើសុំសមត្ថកិច្ចផាកពិន័យចំពោះអ្នកបើកបរទាំងនោះ ស្រាប់តែឯកឧត្តមឌីវិជ្ជា អគ្គស្នងការរងនគរបាលជាតិ បានគាំទ្រយ៉ាងពេញទំហឹងតែម្តង។
នេះបើតាមរយៈផេកហ្វេសប៊ុក «អ្នកប្រមាញ់ចរាចរណ៍» នៅថ្ងៃទី២ ខែមករា ឆ្នាំ២០២២ បានចែករំលែកបន្តពីមតិលើកឡើងរបស់ឯកឧត្តមឌីវិជ្ជា ពីគ្រុប Telegram ដែលមានខ្លឹមសារទាំងស្រុងថា៖ «សំណូមពរដល់សមត្ថកិច្ចប៉ូលិសតាមបណ្តាខេត្តដែលមានស្ថានភាពបើកបរបំពានមកលើគំនូសអាទិភាពរបស់គេបែបនេះ មេត្តាបញ្ចេញកណ្តាប់ដៃ ចុះទៅថតស្លាកលេខរថយន្តដែលបានបំពានអស់នោះហើយសរសេរបង្កាន់ដៃផាកពិន័យជាទម្ងន់ដល់ម្ចាស់យានយន្តទាំងនោះផង។
ឯកឧត្តម ឌី វិជ្ជា ក៏បានសង្កត់ធ្ងន់ថា បើមិនធ្វើការព្រមានដោយផាកពិន័យបែបនេះទេ នោះគឺបញ្ហាដដែលៗវានឹងនៅតែកើតឡើងលើទ្រូងផ្លូវរបស់ប្រទេសយើងជាក់ជាមិនខាន។ វិធានការខាងលើ គឺជាសំណូមពររបស់មហាជនភាគច្រើន ដែលគាត់និយមបើកបរគោរពច្បាប់»៕ រក្សាសិទ្ធិដោយ៖ លឹម ហុង
