Friday, September 30, 2022

មន្ត្រី​ប៉ូលីស​ពន្ធ​ធនាគារ​ម្នាក់ បន្ថែម​របរ​ឆក់​ទូរ​សព្ទ័ នៅក្នុង​មន្ទីរពេទ្យ ត្រូវបាន​ប៉ូលីស​ក្រុង​ដូន​កែវ​ឃាត់ខ្លួន

spot_img

តាកែវ ៖ ជនសង្ស័យ​ម្នាក់​ដែលជា​មន្ត្រី​ប៉ូលីស​ពន្ធ​ធនាគារ​ខេត្ត​ត្រូវបាន​នគរបាល​ក្រុង​ដូន​កែវ​ឃាត់ខ្លួន​បន្ទាប់ពី​ជនសង្ស័យ​រូបនេះ​បានធ្វើ​សកម្មភាព​ឆក់​ទូរ​សព្ទ័​ដៃ​នៅក្នុង​មន្ទីរពេទ្យ បង្អែក​ខេត្តតាកែវ​កាលពី​យប់​ថ្ងៃទី​២៩ ខែតុលា ឆ្នាំ​២០១៧ វេលា​ម៉ោង​២២​និង​៣០​នាទី​។

​លោក ឆាយ សាវុធ អធិការ​ក្រុង​ដូន​កែវ​បានអោយដឹងថា ខណៈដែល​ជនរងគ្រោះ​កំពុង​អង្គុយ​និយាយ​ទូរស័ព្ទ​នៅលើ​បង់​ថ្ម​ក្នុង​បរិវេណ​មន្ទីរពេទ្យបង្អែក​ខេត្តតាកែវ ជនសង្ស័យ​ក៏បាន​ចូលមក​ឆក់​ទូរ សព្ទ័​ពី​ជនរងគ្រោះ​តែ​មិនបាន​សម្រេច​ព្រោះ ត្រូវបាន​ប្រជាពលរដ្ឋ​ដេញចាប់​ខ្លួន​រួច​ប្រគល់​ឲ្យ​សមត្ថកិច្ច​តែម្តង ។​ជនសង្ស័យ​មានឈ្មោះ ប៊ិ ហ ភេទ​ប្រុស អាយុ​២៨​ឆ្នាំ រស់នៅ​ភូមិ​តា​សឹង ឃុំ​ខ្វាវ ស្រុក​ទ្រាំង ខេត្តតាកែវ មុខរបរ​មន្ត្រី​ពន្ធ​ធនាគារ​ខេត្ត បានធ្វើ​សកម្មភាព​ឆក់​ទូរ​សព្ទ័​ដៃ ម៉ាក​សាំ​សុង​ណូ​ត​២ ដែលមាន​ម្ចាស់​ឈ្មោះ អ៊ឹម ទ្រី ភេទ​ស្រី អាយុ​៦០ ឆ្នាំ រស់នៅ​ភូមិ​ធន់​មន់ សង្កាត់​បារាយណ៍ ក្រុង​ដូន​កែវ ខេត្តតាកែវ​។

​បច្ចុប្បន្ន​ជនសង្ស័យ​ត្រូវបាន​សមត្ថកិច្ច​បញ្ជូន​ខ្លួន មកកាន់​ការិយាល័យ​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​នគរបាល​ខេត្តតាកែវ ដើម្បី​កសាង​សំណុំរឿង​បញ្ជូនទៅ​សាលាដំបូង​ខេត្តតាកែវ​ចាត់ការ​តាមផ្លូវ​ច្បាប់ ។

​គួររំលឹកថា កន្លងមក​ក្នុង​មន្ទីរពេទ្យបង្អែក​ខេត្តតាកែវ​តែងតែមាន​ក្រុមចោរ​ចូលធ្វើ​សកម្មភាព​លួច​សម្ភារៈ​របស់របរ​អ្នក​ដែល​មក​ទទួល​សេវា​ព្យាបាល​ជម្ងឺ ហើយ​មានពេលខ្លះ​បានកើត​មាន​ករណី​ឆក់​ទូរស័ព្ទ​ឆៅៗ​តែម្តង នៅក្នុង​មន្ទីរពេទ្យ​នេះ​ទៀតផង ជាក់ស្តែង​ដូចជា​ក្នុងករណីនេះ​ជាដើម​៕ តាកែវ​