ករណីប៉ូលិសចរាចរណ៍មួយចំនួនតូច ចាប់ផាកពិន័យដ៏មិនសមទំនង ទៅលើរថយន្តដឹកទំនិញលើសបន្តិចបន្តួច ដោយគ្មានការយោគយល់ និងទារប្រាក់ដ៏ជ្រុលហួសហេតុ គឺមិនមែនជារឿងទើបកើតមាននោះទេ។
ជាក់ស្តែង ដូចករណីមួយនេះ មហាជនពិតជាមានការហួសចិត្តគ្រប់ៗគ្នាតែម្តង បន្ទាប់ពីបានដឹងថា រថយន្តអ្នករកស៊ីដឹកទំនិញមានដូចជា តុ ទូផ្តៅ ពូក និងឥវ៉ាន់តូចតាចមួយចំនួនទៀត ដើរលក់តាមស្រុកភូមិ ផ្ទុកលើសលោះបន្តិចបន្តួច ត្រូវប៉ូលិសប្រចាំគោលដៅមួយកន្លែងចាប់ជំរិតទារប្រាក់រហូត ២០ ម៉ឺនរៀល ព្រោះខុសច្បាប់ (បើកគូទ និងដឹកហៀរទ្រុង)។
នៅក្នុងវីដេអូ ដែលកំពុងផ្ទុះការចាប់អារម្មណ៍ ម្ចាស់ឡានដឹកទំនិញ បានត្អូញត្អែរថា តើឲ្យពួកគាត់ទៅរកស៊ីអ្វីទៅ បើដឹកឥវ៉ាន់ត្រឹមប៉ុណ្ណឹងសោះ ប៉ូលីសទារសុទ្ធតែ ២០ ម៉ឺន ១៥ ម៉ឺន ហើយឲ្យ២ម៉ឺនអីហ្នឹង អត់យកទេ។ តាមរយៈការលើកឡើងនេះ គាត់ក៏សំណូមពរប៉ូលិស មេត្តាមានការយោគយល់ ទារប្រាក់សមរម្យ ឲ្យប្រជាពលរដ្ឋបានរស់ផងទៅ។
សូមបញ្ជាក់ថា នេះគឺករណីបុគ្គលមួយចំនួនតូចប៉ុណ្ណោះ មិនមែនប៉ូលិសទាំងអស់ សុទ្ធតែធ្វើរឿងអាក្រក់សង្កត់ជាន់.កប្រជាពលរដ្ឋដល់ថ្នាក់នេះនោះទេ៕ រក្សាសិទ្ធិដោយ៖ លឹម ហុង
