ការបោកប្រាស់ជាពិសេសតាមរយៈការទំនាក់ទំនងប្រព័ន្ធទូរស័ព្ទ ដោយប្រាប់ថា ត្រូវរង្វាន់ធំ ៤០ លានរៀល ពីក្រុមហ៊ុន ឬ ធនាគារជាដើម គឺមិនមែនជារឿងទើបកើតឡើងនោះទេ តែវាជាករណីដ៏ហួសចិត្ត បានកើតឡើងរាប់ភ្លេចទៅហើយៗ ករណីនេះផងដែរ យើងក៏មិនដឹងថា ជនទាំងនោះកំពុងតែដើរបោកប្រាស់ប្រជាពលរដ្ឋដែលមានការលោភលន់ចង់បានពុំបានគិតពិចារណាជ្រៅជ្រះ អស់ប៉ុន្មាននាក់នោះទេ ក្នុងមួយថ្ងៃៗ។ តែទោះយ៉ាងណា ជនទាំងនោះ ក៏តែងត្រូវបាក់មុខ និងចុងក្រោយ បានត្រឹមជេរបញ្ចោ ព្រោះប៉ះចំបងប្អូនដែលពួកគាត់ឆ្លាត មានការយល់ដឹងពីល្បិចបោករបស់ពួកគេ។
ជាក់ស្តែង ដូចករណីជនម្នាក់នេះអុីចឹងដែលបានប្រាប់ថាខ្លួនមានឈ្មោះ ជា ច័ន្ទរតនា, ID សំគាល់ខ្លួន 1401 ជាប្រធានផ្នែកផ្សព្វផ្សាយព័ត៌មាន មកពីខាងក្រុមហ៊ុន Metphone ចុងក្រោយ បានត្រឹមសោកា និងការជេរបញ្ចោគ្នា បន្ទាប់ពីខំនិយាយរៀបរាប់ពីដំណើរដើមទងត្រូវរង្វាន់ធំ ៤០ លានរៀល ពីក្រុមហ៊ុន metphone ឡើងចង់បែកពពុះមាត់ តែទីបំផុត បានត្រូវបុរសម្នាក់ដែលគេស្គាល់ថាជាតារាសម្តែងលោក ជា សុវណ្ណនរាហ៍ ខណៈកំពុងជិះឡានជាមួយមិត្តភក្តិ ដែលបានដឹងពីល្បិចបោកនេះតាំងពីដើមទី បាននិយាយលេងសើចឌឺដាក់ច្រើនពេក ជាហេតុធ្វើឲ្យរូបគេខឹង ស្រែកជេរខ្លាំងៗតែម្តង។
ដោយឡែក អ្នកលេងបណ្តាញសង្គមវិញ ក្រោយពីបានឃើញវីដេអូនេះ បាននាំគ្នាអស់សំណើចខ្លាំងតែម្តង ហើយក្នុងនោះក៏ឃើញមានបងប្អូនមួយចំនួន ក៏បានប្រាប់តាមរយៈខមិនថា ប៉ុន្មានថ្ងៃមុន ក៏ជនរូបនេះបានមកចង់បោកពួកគាត់ដែរ តែបោកអត់បាន។
ជាមួយគ្នានេះផងដែរអ្នកលេងបណ្តាញសង្គមម្នាក់បានចោទសួរថា «សំឡេងហ្នឹង នៅតែឮបោកគេ ដូចមិនមែនម្តងទេ មិនដឹងពេលណា បានឃើញវាវាស់កំពស់?»។ រីឯម្នាក់ទៀត ក៏បានលើកឡើងជាចម្ងល់ដែរថា «ឆ្ងល់ថាក្រុមហ៊ុន Metfone ធំប៉ុណ្ណាណីម៉េចឲ្យជនឆបោកនៅតែបន្តយកឈ្មោះក្រុមហ៊ុនមកប្រើជារឿយៗ ឬក៏ជាចេតនាក្រុមហ៊ុនមែន? មិនតែប៉ុណ្ណោះយកឈ្មោះថ្នាក់ដឹកនាំកំពូលៗមកប្រើប្រាស់ទៀត កាលណាបានចាប់ពួកចោរនេះ? ឬក៏ទុកឲ្យបន្តសកម្មភាពបែបនេះរហូតទៅ?»៕ រក្សាសិទ្ធិដោយ៖ លឹម ហុង
