សៀមរាប៖ បន្ទាប់ពីរាជរដ្ឋាភិបាលបានប្រកាសបើកវិស័យទេសចរណ៍ឡើងវិញ ម្ចាស់សណ្ឋាគារមួយចំនួននៅតែស្ទាក់ស្ទើរក្នុងការចំណាយថវិកាជួសជុលសណ្ឋាគាររបស់ខ្លួនឡើងវិញ ដោយសារតែខ្លាចបិទទ្វារម្តងទៀត ដោយសារជំងឺកូវីដ១៩ មិនទាន់រលត់នៅឡើយ ជាពិសេសដោយសារមានការខាតបង់យូរ។ ការខាតបង់ប្រាក់ចំណូលក្នុងអំឡុងពេលជំងឺរាតត្បាតបានជំរុញឱ្យពួកគេភ័យខ្លាចក្នុងការស្នើសុំប្រាក់កម្ចីពីធនាគារ ដែលពួកគេភ័យខ្លាចមិនអាចសងបាន។ បើទោះជាមានវិស័យទេសចរណ៍ក្នុងស្រុកឡើងវិញ បន្ទាប់ពីការសម្របខ្លួនរបស់ប្រជាជនក្នុងតំបន់ទៅនឹងជំងឺរាតត្បាត និងការប្រកាន់ខ្ជាប់នូវវិធានការសុវត្ថិភាព ក៏ដូចជាការបើកផ្លូវមួយចំនួនរបស់រដ្ឋាភិបាល និងការថែទាំផ្សេងៗទៀតក៏ដោយ ក៏ម្ចាស់សណ្ឋាគារ និងរមណីយដ្ឋានជឿជាក់ថា រង់ចាំភ្ញៀវបរទេសអាចនឹងមានភាពល្អប្រសើរឬ យ៉ាងហោចណាស់មានភ្ញៀវបរទេស 70% ចេញចូលក្នុងប្រទេស បើធៀបទៅនឹងឆ្នាំ 2019។ ដូច្នេះពួកគេនៅមិនទាន់ហ៊ានចំណាយថវិកាធ្វើការកែលម្អសណ្ឋាគារនៅឡើយទេព្រោះ តែស្ថានភាពនៃដើរហើររបស់ ប្រទេសទេសចរណ៍មួយចំនួនធំមិនទាន់បើកដំណើរការទូលំទូលាយ។
លោក Christian de Boer – នាយកគ្រប់គ្រង Jaya House River Park បាននិយាយថា “ ជាការប្រសើរណាស់ ហើយយើងពិតជារីករាយណាស់ដែលប្រទេសកម្ពុជាបានបើកព្រំដែនរបស់ខ្លួនឡើងវិញ។ ហើយពួកគេបានធ្វើឱ្យវាមានភាពល្អប្រសើរក្នុងការបង្ហាញព្រះរាជាណាចក្រអច្ឆរិយៈដ៏អស្ចារ្យនាពេលបច្ចុប្បន្ននេះ។ ហើយខ្ញុំសង្ឃឹមថានឹងមានការកើនឡើងយ៉ាងខ្លាំងនៃការមកដល់របស់ភ្ញៀវទេសចរណ៍ក្នុងរយៈពេលប៉ុន្មានសប្តាហ៍ឬខែនាពេលខាងមុខ។ ”
លោកបន្តថា “ជាមួយគ្នានេះដែរ ក្តីបារម្ភរបស់ខ្ញុំសម្រាប់ពេលអនាគតគឺការកើនឡើងថ្មីនៃករណីជំងឺកូវីដនៅក្នុងផ្នែកផ្សេងទៀតនៃពិភពលោក និងការពិតដែលថានឹងនាំឱ្យចំនួនអ្នកមកដល់ប្រទេសកម្ពុជាមានការថយចុះ។ ដូច្នេះ យើងត្រូវត្រៀម តើអនាគតនឹងមានអ្វីកើតឡើង ហើយតើវានឹងដំណើរការយ៉ាងណាសម្រាប់យើង និងសណ្ឋាគារផ្សេងទៀត។ “
អ្នកស្រី សុគន្ធ អេង ម្ចាស់រីសត Angkor Rural Boutique Resort បានឱ្យដឹងថា “សម្រាប់ខ្ញុំ ខ្ញុំគិតថាយើងមិនត្រូវអង្គុយរងចាំនោះទេ ដូចដែលសម្តេបានមានប្រសាសន៍ចឹង យើងត្រូវរៀនរស់ជាមួយ Covid-19 តែអ្វីដែលសំខានតើប្រជាជនចេះសម្របខ្លួនដើម្បីរស់នៅជាមួយជំងឺដ៏សាហាវនេះឬទេ?”
អ្នកស្រី បន្តថា “ជាក់ស្តែងអ្វីដែលជំរុញខ្ញុំមិនទាន់ឱ្យបើកដំណើរការសណ្ឋាគាររបស់ខ្ញុំគឺ អតិថិជនរបស់មិនទាន់សម្របខ្លូនបាននៅឡើយទេ ពួកគាតមិនទាន់មានជីវិតមួយដូចកាលពីសម័យមុននោះទេ សម្រាប់ប្រជាជនខ្មែរមួយចំនួនគឺចេះសម្របខ្លួនដើម្បីរស់នៅជាមួយជំងឺដ៏សាហាវនេះហើយ តែសម្រាប់ភ្ញៀវបរទេសវិញគេមិនទាន់ហ៊ានសម្របខ្លួនជាមួយប្រទេសយើងនៅឡើយទេ ចឹងភ្ញៀវគោលដៅរបស់សណ្ឋាគារខ្ញុំនៅមានកម្រិតនៅឡើយ។ ទៅថ្ងៃមុខប្រសិនបើមានភ្ញៀវបរទេសកើនឡើង ឬ កើតប្រហែល៧០% ធៀបនឹងឆ្នាំ២០១៩ នោះខ្ញុំនឹងបើកដំណើរការឡើងវិញ ហើយពួកយើងនឹងរៀនរស់ជាមួយជំងឺមួយនេះទាំងអស់គ្នា។ “
អ្នកស្រីបន្ថែមថា “ខ្ញុំគិតថានឹងនៅមានផលប៉ះពាល់ព្រោះប្រជាជននៅមានអារម្មណ៍ភ័យខ្លាចនៅឡើង។ ទីមួយភ័យខ្លាចរវាងយើងនឹងអតិថិជន ទី២ សម្បីតែបុគ្គលិករវាងបុគ្គលិកក៏យើងនៅមានការភ័យខ្លាចផងដែរ សម្រាប់ខ្ញុំលុះត្រាខ្ញុំមានសង្ឃឹម៧០%ឡើងលើទើបខ្ញុំហ៊ានបើកដំណើរការឡើងវិញ។ “
លោក នឹម សុផលវិសាល - ម្ចាស់បូទីច អានផាដា Ananphada Boutique បាននិយាយថា "ការរំពឹងទុកថានៅឆ្នាំក្រោយទើបមានភាពល្អប្រសើរសម្រាប់ខ្ញុំ ព្រោះការរៀបចំឡើងវិញលើហេដ្ឋារចនាសម្ព័នគឺធ្វើអោយសៀមរាបកាន់តែមានភាពទាក់ទាញសម្រាប់ភ្ញៀវទេសចរណ៍។ តែចំពោះពេលនេះគឺខ្ញុំមិនទាន់ហ៊ានបើក១០០%នោះទេ ព្រោះភ្ញៀវមកស្នាក់នៅក្នុងសណ្ឋាគារខ្ញុមក៏មិនសូវមានច្រើនដែរ ចឹងខាងខ្ញុំក៏តម្រូវអោយកាត់បន្ថយបុគ្គលិកមួយចំនួនផងដែរ។ "
លោក Christian de Boer – នាយកគ្រប់គ្រង Jaya House River Park បាននិយាយបន្ថែមថា “ខ្ញុំសប្បាយចិត្តយ៉ាងខ្លាំងជាមួយនឹងការឆ្លើយតបរបស់រដ្ឋាភិបាលចំពោះបញ្ហានេះ ដោយចាប់ផ្តើមគម្រោងហេដ្ឋារចនាសម្ព័ន្ធ និងការផ្លាស់ប្តូរផ្លូវ ១០២ គីឡូម៉ែត្រក្នុងខេត្តសៀមរាប ព្រោះថាបានរៀបចំខេត្តសៀមរាបសម្រាប់អនាគតជាមួយនឹងផ្លូវថ្មីស្រឡាងដែលជិតរួចរាល់ និង កញ្ចប់ហេដ្ឋារចនាសម្ព័ន្ធពេញលេញ វានឹងធ្វើឱ្យ ខេត្តសៀមរាបបានរួចរាល់ ជាមួយពណ៌ប៉ៃតងស្រស់បំព្រង សមស្របជាមួយ ពិភពលោកដែលមានពណ៌បៃតងកាន់តែច្រើន ជាមួយដើមឈើកាន់តែច្រើន ផ្លូវជិះកង់កាន់តែច្រើន និងរថយន្តតិចជាងមុន។ ដូច្នេះ ប្រទេសកម្ពុជា ក្នុងរយៈពេលប្រហែលមួយខែចាប់ពីពេលនេះទៅ នឹងត្រៀមខ្លួនជាស្រេចសម្រាប់ការវិលត្រឡប់មកវិញនៃវិស័យទេសចរណ៍ក្នុងចំនួនកាន់តែច្រើន ហើយខ្ញុំប្រាកដណាស់ថាយ៉ាងហោចណាស់នៅឆ្ងាយជាមួយនឹងតួលេខឆ្នាំ 2019 ។ ”
ជាមួយគ្នានេះអ្នកស្រី សុគន្ធ អេង ម្ចាស់រីសត Angkor Rural Boutique Resort បានមានប្រសាសន៍ថា “ក្នុងនាមខ្ញុំជាសហគ្រិនម្នាក់ នាងខ្ញុំអាចនិយាយបានថា សម្រាប់ខេត្តសៀមរាបមួយគឺបានត្រៀមខ្លួនរួចហើយក្នុងការទទួលស្វាគមន៍ភ្ញៀវទេសចរណ៍ជាតិនិងអន្តរជាតិ។ សហគ្រិនផ្សេងៗគ្រាន់តែរងចាំថ្ងៃល្អតែប៉ុណ្ណោះក្នុងការបើកដំណើរការសណ្ឋាគាររបស់ពួកគេ។ ខ្ញុំជឿជាក់ថាយើងចេះការពារគ្រប់គ្រាន់ ហើយសម្រាប់បុគ្គលិកដែលយើងនឹងត្រៀមរើសមកក៏ទទួលបានការបណ្តុះបណ្តាលបានល្អប្រសើរជាងមុនក្នុងការការពារខ្លួនពីជំងឺដ៏សាហាវមួយនេះជូនភ្ញៀវជាតិ និងអន្តរជាតិ។ សៀមរាបគឺជាខេត្តសម្រាប់ទេសចរណ៍ ហើយទេសចរណ៍គឺជាសសៃឈាមសម្រាប់ប្រជាជនយើង ចឹងប្រសិនជាយើងខ្វះសម្ថភាពក្នុងការការពារជូនភ្ញៀវទេសចរណ៍ នោះយើងនឹងនៅតែគ្មានថ្ងៃវិលត្រលប់ទៅរកស្ថានភាពល្អដូចពីមុននោះទេ៕” ប្រភព៖ A24