បន្ទាយមានជ័យ ៖ លោកវរសេនីយឯក គី មករា នាយការិយាល័យនគរបាលចរាចណ៍ជើងគោក នៃស្នងការដ្ឋាននគរបាលខេត្តបន្ទាយមានជ័យ បានប្រាប់លើកឡើងថា កន្លងមក មានក្រុមក្មេងទំនើងមួយចំនួន តែងតែបើកបរទាំងបំពានច្បាប់ចរាចរណ៍ ពេលខ្លះក្មេងទាំងអស់នោះ ស្ថិតក្រោមឥទ្ធិពលគ្រឿងស្រវឹង ឬគ្រឿងញៀនជាដើម ។
លោកវរសេនីយឯក បានបន្តទៀតថា មួយវិញទៀត ក៏មានប្រជាពលរដ្ឋមួយចំនួនមិនសូវ មានការយល់ដឹងអំពីច្បាប់ចរាចរណ៍ អ្នកបើកបរខ្លះបើកបរមិនគោរពច្បាប់ចរាចរណ៍ មានអ្នកបើកបរម៉ូតូខ្លះមិនបានពាក់មួកសុវត្ថិភាព ហើយបើកក្នុងល្បឿនលឿនល្មើសនឹងច្បាប់ហាមឃាត់ និងដឹកសំពីងសំពោង ។ អ្នកបើកខ្លះទៀតមិនបានចូលរៀនបើកបរច្បាប់ចរាចរណ៍ផ្លូវគោកឡើយ ។
នាយការិយាល័យនគរបាលចរាចរណ៍រូបនេះ បានបញ្ជាក់ថា « ចាប់ពីខែមករា ឆ្នាំ២០២២នេះ តទៅអ្នកបើកបរយានយន្តលើផ្លូវជាតិ ផ្លូវសាធារណៈ មិនគោរពច្បាប់ចរាចរណ៍ ត្រូវធ្វើការផាកវិន័យតាមច្បាប់ក្រសួងមហាផ្ទៃបានកំណត់» ។
នាយការិយាល័យនគរបាលចរាចរណ៍រូបនេះបានបញ្ជាក់ឲ្យដឹងបន្តទៀតថា ក្នុងពេលចុះប្រតិបត្តិការពង្រឹង និងអនុវត្តច្បាប់ចរាចរណ៍មួយព្រឹកៗ នៅតាមគោលដៅក្នុងស្រុក ក្រុង និងទីរួមខេត្ត នៅមានអ្នកបើកបរយានយន្តបញ្ច្រាសទិសល្មើសច្បាប់ចរាចរណ៍ ។ ក្នុងនោះក៏មានអ្នកបើករថយន្តមិនពាក់ខ្សែក្រវ៉ាត់ បើកបររថយន្តពុំមានប័ណ្ណបើកបរ និងបើករថយន្តដឹកអីវ៉ាន់សំពីងសំពោងលើសចំណុះមួយចំនួនផងដែរ ។
លោកវរសេនីយឯក គី មករា បន្តទៀតថា យានយន្តបើកលើផ្លូវជាតិ និងផ្លូវសាធារណៈមិនគោរពច្បាប់ចរាចរណ៍ ត្រូវធ្វើការផាកវិន័យតាមច្បាប់បានកំណត់ ។ ករណីបើកម៉ូតូមិនគោរពស្លាកសញ្ញាចរាចរណ៍ ត្រូវផាកពិន័យ១០ម៉ឺនរៀល , ប្រើទូរសព្ទក្នុងពេលបើកបរត្រូវពិន័យ ៨ម៉ឺនរៀល, បើកក្នុងស្ថានភាពស្រវឹងផាកពិន័យ ២៥ម៉ឺនរៀល, មិនពាក់មួកសុវត្ថិភាព ផាកពិន័យ ៦ម៉ឺនរៀល, បើកហួសល្បឿនកំណត់ផាកពិន័យ ៦ម៉ឺនរៀល ។ ចំពោះរថយន្តមិនគោរពផ្លាកសញ្ញាចរាចរណ៍ត្រូវផាកពិន័យ ១៥ម៉ឺនរៀល , មិនពាក់ខ្សែក្រវ៉ាត់សុវត្ថិភាពត្រូវពិន័យ ៧ម៉ឺន៥,០០០ ទៅ១៥ម៉ឺន រៀល , មិនគោរពផ្លាកសញ្ញាពិន័យពី ១៥ម៉ឺន រៀល ទៅ ៣០ម៉ឺនរៀល , ល្មើសក្នុងការផ្ទុកទំនិញពីន័យ ១៥ម៉ឺនរៀលទៅ៣០ម៉ឺនរៀល , គ្មានប័ណ្ណ បើកបរពិន័យ ពី ១លាន២សែន រៀល ទៅ ២លាន៤សែនរៀល ។
លោកបន្តថា ខេត្តបន្ទាយមានជ័យសព្វថ្ងៃ ម្តាយឪពុកចូលចិត្តបណ្តែតបណ្តោយឲ្យកូននៅក្មេងមិនទាន់គ្រប់អាយុ បើកម៉ូតូជិះយ៉ាងសាហាវធ្វើឲ្យគ្រោះថ្នាក់ចរាចរណ៍កើតឡើងជាញឹកញាប់ ។ កន្លងមកពេលដែលមន្ត្រីនគរបាលចរាចរណ៍ ចុះធ្វើការផ្សព្វផ្សាយអប់រំអំពីច្បាប់ចរាចរណ៍ផ្លូវគោក ជូនដល់ប្រជាពលរដ្ឋ និស្សិត សិស្សសាលា ក៏ដូចជានៅតាមសហគមន៍ នៅតាមទីសាធារណៈ នៅតាមវិទ្យាល័យ នៅតាមសាលារៀន ជាដើម ធ្វើឲ្យប្រពលរដ្ឋជាច្រើន បានយល់ដឹងច្បាស់អំពីច្បាប់ចរាចរណ៍ផ្លូវគោក និងបានគាំទ្រច្បាប់ចរាចរណ៍ផ្លូវគោកនោះ ។ ទោះបីយ៉ាងនេះក្តី ក៏គ្រោះថ្នាក់ចរាចរណ៍នៅតែបង្កឡើងដោយសារអ្នកបើកបរ មួយចំនួនមិនគោរពច្បាប់ចរាចរណ៍នៅឡើយ ។
សមត្ថកិច្ចនគរបាលចរាចរណ៍ ធ្វើការអំពាវនាវដល់ប្រជាពលរដ្ឋ ដែលមានយានយន្តបើកបរនៅលើផ្លូវជាតិទាំងអស់ មេត្តាចូលរួមគោរពច្បាប់ចរាចរណ៍ និងស្លាកសញ្ញាចរាចរណ៍នៅតាដងផ្លូវជាតិ ឲ្យបានទាំងអស់គ្នា ដើម្បីកាត់បន្ថយគ្រោះថ្នាក់ចរាចរណ៍ និងកាត់បន្ថយការផាកពិន័យ ដែលនាំឲ្យអស់ប្រាក់នៅក្នុងក្រុមគ្រួសារទៀតផង ៕ រក្សាសិទ្ធិដោយ ៖ សុទ្ធ លី
