ក្រចេះ ៖ ឯកឧត្តមរដ្ឋមន្រ្តី ព្រុំ សុខា បានថ្លែងរំលឹក មន្រ្តីមូលដ្ឋានត្រូវខិតខំរ៉ាប់រង បំពេញរាល់ភារកិច្ចនយោបាយ ធ្វើជាស្នូលឱ្យសាមគ្គីភាព ទូលំទូលាយ របស់ពលរដ្ឋ ក្នុងគ្រប់សហគមន៍ និងរាជរដ្ឋាភិបាលកម្ពុជា ក្នុងការគ្រប់គ្រង និងដោះស្រាយ រាល់ផលវិបាកបង្កឡើងពីកូវីដ-១៩ ដើម្បីបង្កលក្ខណៈកាន់តែរឹងមាំ ដល់ការបើកសេដ្ឋកិច្ច និងសង្គមជាតិ ឱ្យត្រឡប់មកកាន់ប្រក្រតីភាពធម្មតាឡើងវិញ។
ឯកឧត្តម ព្រុំ សុខា រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងារខេត្តក្រចេះ បានថ្លែងបែបនេះ ក្នុងឱកាសចូលរួមសន្និបាតបូកសរុបលទ្ធផលការងាររបស់គណៈកម្មាធិការគណបក្សឃុំអូរគ្រៀងរយៈពេល៥ឆ្នាំកន្លងមក និងឆ្លងអនុម័តផែនការអភិវឌ្ឍន៍ឃុំ សម្រាប់អាណត្តិទី៥ (២០២២-២០២៧)ដែលបានប្រព្រឹត្តទៅកាលពីព្រឹកថ្ងៃទី១៤ ខែមករា ឆ្នាំ២០២២ នៅក្នុងបរិវេណវត្តសមិទ្ធិរាម ស្ថិតក្នុងឃុំអូរគ្រៀង ស្រុកសំបូរ ខេត្តក្រចេះ ។
ក្រោយពីឯកឧត្តម វ៉ា ថន ប្រធានគណបក្សខេត្ត និងជាអភិបាលខេត្តក្រចេះ បានដឹកនាំដំណើរការសន្និបាត ដើម្បីឆ្លងរបាយការណ៍បូកសរុបលទ្ធផល និងផែនការអភិវឌ្ឍឃុំអូរគ្រៀងដោយមានការចូលរួមមតិពិភាក្សាយ៉ាងផុលផុសពីសំណាក់សមាជិក សមាជិកា និងទទួលបានការអនុម័ត ជាឯកច្ឆ័ន្ទពីអង្គសន្និបាតទាំងមូលរួចមក ឯកឧត្តមរដ្ឋមន្រ្តី ព្រុំ សុខា ប្រធានក្រុមការងារខេត្តក្រចេះ បានឡើងថ្លែងកោតសរសើរចំពោះលទ្ធផលគួរកត់សំគាល់ ដែលឃុំអូរគ្រៀង សម្រេចបានក្នុងរយៈពេល៥ឆ្នាំកន្លងមក រួមចំណែកដល់ការអភិវឌ្ឍមូលដ្ឋានសហគមន៍ជនជាតិដើមភាគតិច នៅក្នុងតំបន់ភូមិភាគឦសាន ដែលទទួលបានពីអំណោយផល នៃសុខសន្តិភាពរបស់ប្រទេសជាតិក្រោយពេលសង្គ្រាម។
ឯកឧត្តមរដ្ឋមន្រ្តីប្រធានក្រុមការងារ បានជំរុញលើកទឹកចិត្តអង្គសន្និបាត ឱ្យបន្តចលនាសកម្មភាពជាក់ស្តែង ចូលរួមរក្សាប្រក្រតីភាពជីវភាព រស់នៅតាមសហគមន៍ ជាពិសេសមន្រ្តីយើងនៅមូលដ្ឋាន ត្រូវពុះពារប្រើប្រាស់ឱកាសបម្រើប្រជាពលរដ្ឋ ខិតខំធ្វើអំពើល្អគ្រប់យ៉ាង នៅគ្រប់ទីកន្លែង និងគ្រប់កាលៈទេសៈ។
ជាចុងក្រោយ ឯកឧត្តមរដ្ឋមន្រ្តី ព្រុំ សុខា បានថ្លែងរំលឹក មន្រ្តីមូលដ្ឋានត្រូវខិតខំរ៉ាប់រង បំពេញរាល់ភារកិច្ចនយោបាយ ធ្វើជាស្នូលឱ្យសាមគ្គីភាពទូលំទូលាយ របស់ពលរដ្ឋក្នុងគ្រប់សហគមន៍ ចូលរួមយ៉ាងសកម្មបន្តគាំទ្រចលនាជាតិ ក្រោមមគ្គុទេសក៍ដ៏ថ្លៃថ្លារបស់សម្តេចតេជោ ហ៊ុន សែន ប្រមុខដឹកនាំគណបក្សប្រជាជនកម្ពុជា និងរាជរដ្ឋាភិបាលកម្ពុជា ក្នុងការគ្រប់គ្រង និងដោះស្រាយរាល់ផលវិបាកបង្កឡើងពីកូវីដ-១៩ ដើម្បីបង្កលក្ខណៈកាន់តែរឹងមាំដល់ការបើកសេដ្ឋកិច្ច និងសង្គមជាតិឱ្យត្រឡប់មកកាន់ ប្រក្រតីភាពធម្មតាឡើងវិញ សំដៅរួមចំណែកកាន់តែខ្លាំងក្លាថែមទៀត ជាមួយចលនាសកម្មភាពយ៉ាងផុលផុស នៅទូទាំងប្រទេស ពង្រឹងប្រៀបឈ្នះរបស់គណបក្សប្រជាជនកម្ពុជា ឈានទៅដណ្តើមជ័យជំនះ សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ឆ្នាំ២០២២ និងការបោះឆ្នោតជាតិនៅឆ្នាំ២០២៣ខាងមុខ៕រក្សាសិទ្ធិដោយ ៖ សុទ្ធ លី
