ភ្នំពេញ ៖ ក្រុមហ៊ុនមួយ ដែលមានទុនវិនិយោគ ១៣០០លានដុល្លារអាមេរិក និងបង្កើតការងារជាង៦០០កន្លែង នឹងមកវិនិយោគលើវិស័យដឹកជញ្ជូននិងភស្តុភារនៅកម្ពុជា។
ក្រុមហ៊ុន KAMPOT LOGISTICS AND PORT COMPANY LIMITED ត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តឱ្យបង្កើតមណ្ឌលភស្តុភារកម្ម និងកំពង់ផែពហុបំណង នៅក្នុងទឹកដីខេត្តកំពត ។
ក្រុមប្រឹក្សាអភិវឌ្ឍន៍កម្ពុជាបានបញ្ជាក់ថា ក្រុមហ៊ុននេះបានបោះទុនវិនិយោគចំនួន ១៣០០លានដុល្លារ ដើម្បីអភិវឌ្ឍលើវិស័យដឹកជញ្ជូននេះ។
CDC បានឱ្យដឹងថាៈគម្រោងវិនិយោគរបស់ក្រុមហ៊ុននេះ អាចបង្កើតការងារដល់ពលរដ្ឋបានជិត៦០០កន្លែង។
តាមរយៈគម្រោងអភិវឌ្ឍលើវិស័យដឹកជញ្ជូនរបស់ក្រុមហ៊ុននេះ គឺជាការរួមចំណែកមួយយ៉ាងធំ ក្នុងការសម្រួលដល់ថ្លៃ និងល្បឿននៃការដឹកជញ្ជូនរបស់កម្ពុជា ទាំងក្នុងនិងក្រៅស្រុក។ ប្រព័ន្ធហេដ្ឋារចនាសម្ព័ន្ធនេះ នឹងត្រូវបានតភ្ជាប់យ៉ាងល្អប្រសើរ សម្រាប់កម្ពុជាក្នុងការជំរុញការនាំចេញទំនិញនានា ជាពិសេសផលិតផលកសិកម្ម។
ការសាងសង់នូវមណ្ឌលភស្តុភារកម្មនិងកំពង់ផែពហុបំណងនេះ គឺជាការល្អប្រសើរមែនទែន សម្រាប់កម្ពុជា ហើយវានឹងជួយសម្រួល ទៅដល់វិស័យដឹកជញ្ជូនក្នុងការនាំចេញ និងនាំចូលរបស់កម្ពុជា៕ រក្សាសិទ្ធិដោយ ៖ សុភក្ត្រា
