នេះជាគ្រោះថ្នាក់ចរាចរណ៍ដ៏មិននឹកស្មានមួយ ដោយបុរសម្នាក់ មិនដឹងជាជិះម៉ូតូក្នុងស្ថានភាពបែបណា បានបុកពីក្រោយរថយន្ត Range Rover ១គ្រឿង រងរបួសខ្លួនឯង និងម៉ូតូខ្ទេចផ្នែកខាងមុខទាំងស្រុង ខណៈរថយន្តក៏រងការខូចខាតយ៉ាងដំណំផងដែរ។
ហេតុការណ៍គ្រោះថ្នាក់ចរាចរណ៍នេះ បានកើតឡើងស្ថិតតាមបណ្ដោយផ្លូវ១០៧ ផ្លូវសុកហុក សង្កាត់អូរឫស្សីទី១ ខណ្ឌ៧មករា រាជធានីភ្នំពេញ កាលពីវេលាម៉ោងប្រមាណ ១០ យប់ថ្ងៃទី១៩ ខែមករា ឆ្នាំ២០២២។
បើតាមប្រភពពីប្រជាពលរដ្ឋនៅកន្លែងកើតឡើង បានឲ្យដឹងថា នៅមុនពេលកើតហេតុ គេបានឃើញរថយន្តសេ៊រីទំនើប Range Rover មួយគ្រឿង កំពុងចតចោលនៅកន្លែងដកលុយវីង។ ប៉ុន្តែ អ្វីដែលមិននឹកស្មានដល់នោះ ក្រោយមក ក៏ស្រាប់តែមានម៉ូតូ១គ្រឿងពាក់ស្លាកលេខ 1IC-4140 បានជិះមកបុកពេញមួយទំហឹង បណ្តាលឲ្យខូចខាតឡាន Range Rover យ៉ាងដំណំតែម្តង។ រីឯចំណកម៉ូតូវិញ ក៏រងការខូចខ្ទេចផ្នែកខាងមុខផងដែរ។
ក្រោយហេតុការណ៍កើតឡើង ម្ចាស់រថយន្ត Range Rover បានទាមទារសំណងពីម្ចាស់ម៉ូតូដែលបានបុកឡានរបស់គាត់រងការខូចខាតទឹកប្រាក់ចំនួន ៤០០ ដុល្លារ។ ប៉ុន្តែ ខណៈពេលនោះផងដែរ គេក៏បានឃើញអុ៊ំស្រីអាយុ ៦០ ឆ្នាំ ម្នាក់ ដែលត្រូវជាម្តាយបុរសជិះម៉ូតូបុកឡាន បានមកលុតជង្គង់លើកដៃសំពះអង្វរម្ចាស់ឡានទំនើបទាំងទឹកភ្នែក ដោយសុំអង្វរម្ចាស់ឡានយកសំណងត្រឹម ២៥០ ដុល្លារ បានហើយ ព្រោះគាត់អត់មានលុយទេ ដោយខ្ចីលុយគេចេញសងជំនួសកូនប៉ុណ្ណោះ។ បន្ទាប់មក គេក៏បានឃើញបុរសម្នាក់ជាម្ចាស់ឡាន បានប្រាប់អ៊ុំស្រីនោះថា គាត់ចុះត្រឹម ៣០០ ដុល្លារ។
តែទោះយ៉ាងណា ប្តីប្រពន្ធម្ចាស់ឡាន Rang Rover មិនសុខចិត្តយល់ព្រមទទួលត្រឹម ២៥០ ដុល្លារ នោះទេ គឺដាច់ត្រឹម ៣០០ ដុល្លារតែម្តង ។ ហើយដោយសារតែឃើញរូបភាពស្រ្តីចំណាស់នោះ គាត់នៅតែលុតជង្គង់សំពះគេពិបាកភ្នែកមើលពេក សមត្ថកិច្ចដែលចុះទៅសម្របសម្រួល ក៏បានជួយចេញ៥០ដុល្លារ បន្ថែម ដើម្បីបញ្ចប់រឿង។
ជាមួយគ្នានោះផងដែរ អ្នកប្រើប្រាស់បណ្តាញសង្គម និងក៏ដូចអ្នកចោមរោមមើលហេតុការណ៍នេះផ្ទាល់ ពិតជាបានសម្តែងក្តីអាណិតដល់អុ៊ំស្រីរូបនោះជាខ្លាំង ព្រោះតែទឹកចិត្តជាម្តាយសុខចិត្តលត់ជង្គង់ដល់ដីសំពះសុំអង្វរម្ចាស់ឡាន សុំក្តីមេត្តាអនុគ្រោះជំនួសកូន៕ រក្សាសិទ្ធិដោយ៖ លឹម ហុង
