ជនក្លែងបន្លំជាគ្រូពេទ្យយោធា និងជាជើងឆើតខាងទាក់ទងស្រីៗនៅលើបណ្តាញសង្គម ដើម្បីឆបោកយកម៉ូតូ នៅទីបំផុត ត្រូវជាប់អន្ទាក់សមត្ថកិច្ចហើយ បន្ទាប់ពីធ្វើសកម្មភាពឆបោកលើកចុងក្រោយ យកម៉ូតូពីនារីម្នាក់នៅក្នុងខេត្តបាត់ដំបង។
ជនឆបោករូបនេះមានឈ្មោះ ជា ពិសិត អាយុ ៣៧ ឆ្នាំ មានទីលំនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ។ បើតាមប្រភពពីស្នងការដ្ឋាននគរបាលខេត្តបាត់ដំបង បានឲ្យដឹងថា កម្លាំងសមត្ថកិច្ចដែលដឹកនាំដោយលោកឧត្តមសេនីយ៍ទោ សាតគឹមសាន ស្នងការនៃស្នងការដ្ឋាននគរបាលខេត្តបាត់ដំបង បានធ្វើការស្រាវជ្រាវ និងឈានឃាត់ខ្លួនជនសង្ស័យខាងលើ នៅចំណុចរង្វង់មូលរូបសំណាកមនុស្សជិះសេះ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង កាលពីថ្ងៃទី១៩ ខែមករា ឆ្នាំ២០២២។
ដោយឡែក វត្ថុតាងដកហូតរួមមាន៖ កូនសោរម៉ូតូចំនួន ០៥, ស៊ីមកាតចំនួន ០៤, បណ្ណ័បេីកបរចំនួន១សន្លឹក, ស្លាកលេខម៉ូតូចំនួន ៧ សន្លឹក, ម៉ូតូ១គ្រឿងម៉ាកហុងដាស្កុបពីពណ៌សស៊េរីឆ្នាំ២០២២ ពាក់ស្លាកលេខសៀមរាប1AK-2419, ម៉ូតូ១ គ្រឿងម៉ាកហុងដាឌ្រីមសេ១២៥ ពណ៌ខ្មៅស៊េរីឆ្នាំ២០២២ គ្មានស្លាកលេខ។
គួរបញ្ជាក់ឲ្យដឹងផងដែរថា ការឈានឃាត់ខ្លួនជនសង្ស័យរូបនេះ ត្រូវបានធ្វើឡើង គឺបន្ទាប់កាលពីថ្ងៃទី២៤ ខែធ្នូ ឆ្នាំ២០២១ នារីជាជនរងគ្រោះម្នាក់ឈ្មោះ សឺន សាម៉ៃ អាយុ ២៩ ឆ្នាំ មានទីលំនៅភូមិដាំស្ពៃ សង្កាត់ស្លាកែត ក្រុងបាត់ដំបងខេត្តបាត់ដំបង បានមកដាក់ពាក្យបណ្តឹងថា ត្រូវបានជនខាងលើឆបោកយកម៉ូតូម៉ាក PCX ១គ្រឿង។
នារីរងគ្រោះបានរៀបរាប់ពីដំណើររឿងចាញ់បោកឲ្យដឹងថា ដំបូងឡើយ រូបនាងបានស្គាល់ជនសង្ស័យ (លក្ខណៈញ៉ែ) តាមរយៈបណ្តាញសង្គមហ្វេសប៊ុក។ បន្ទាប់ពីមានទំនាក់ទំនងនឹងគ្នា ជនសង្ស័យបានអួតប្រាប់ថា រូបគេជាគ្រូពេទ្យទាហានប្រចាំការនៅភ្នំពេញ។ លុះដល់ថ្ងៃកេីតហេតុ ជនសង្ស័យបានប្រាប់នាងថា រូបគេយកថ្នាំវាក់សាំង(សម្រាប់ដូសទី៣) មកចាក់នៅខេត្តបាត់ដំបង ហើយរហូតនៅវេលាម៉ោង ១ រសៀលថ្ងៃខែឆ្នាំកើតហេតុដដែល ជនសង្ស័យបានទូរស័ព្ទទៅជនរងគ្រោះតាមឆាតថា រូបគេមកដល់ខេត្តបាត់ដំបងហេីយគឺនៅមុខមន្ទីរពេទ្យបង្អែកខេត្តភ្លាមៗនោះ នាងក៏បានជិះម៉ូតូម៉ាកហុងដា PCX ពណ៌ស ស៊េរីឆ្នាំ២០១៨ ចេញពីផ្ទះមកជួប ហើយនៅពេលជួបផ្ទាល់ ជនសង្ស័យបានប្រាប់នាងថា រូបគេមិនទាន់បានហូបបាយទេ ដោយឱ្យនាងជូនទៅរកកន្លែងហូបបាយ នៅពេលជូនទៅដល់កន្លែងហូបបាយ ជនសង័្សយបានប្រាប់ជនរងគ្រោះថា មានគេទូរស័ព្ទឱ្យរូបគេទៅយកថ្នាំ ហេីយពេលនោះ រូបគេក៏ធ្វើជាសុំខ្ចីម៉ូតូរបស់នាងដេីម្បីជិះទៅយកថ្នាំ ប៉ុន្តែ វាគ្រាន់តែជាល្បិចឆបោកប៉ុណ្ណោះ ដោយរូបគេបានយកម៉ូតូរបស់នាង ជិះគេចខ្លួនបាត់ស្រមោលតែម្តង។
នៅចំពោះមុខសមត្ថកិច្ចជនសង្ស័យរូបនេះ បានឆ្លេីយសារភាពថា កន្លងមករូបគេធ្លាប់បានធ្វេីសកម្មភាពស្ទាយល៍ឆបោកបែបនេះចំនួន០៤លេីករួចមកហេីយដែលក្នុងនោះ ធ្វើឡើងនៅក្នុងខេត្តឧត្តរមានជ័យចំនួន ០២ លេីក ក្នុងខេត្តពោធិ៍សាត់ចំនួន០២លើក និងលើកចុងក្រោយនេះ ធ្វើសកម្មភាពនៅខេត្តបាត់ដំបង ក៏ត្រូវជាប់អន្ទាក់សមត្ថកិច្ចតែម្តង៕ រក្សាសិទ្ធិដោយ៖ លឹម ហុង
