វីដេអូ TikTok មួយដែលកំពុងល្បី ធ្វើឲ្យមហាជនភ្ញាក់ផ្អើលអស់សំណើចគ្រប់ៗគ្នាតែម្តង នៅពេលដែលដឹងថា ស្រ្តីម្នាក់កូនស្រីផ្ញើលុយមកឲ្យកែកុនផ្ទះ ស្រាប់តែតំឡើងចានបង្គន់ដល់ទៅ២ទន្ទឹមគ្នា ធ្វើឲ្យកូនស្រីមកដល់ផ្ទះ ឃើញហើយហួសចិត្តនិយាយមិនចេញ។
នេះបើតាមនារីជាកូនស្រីឈ្មោះ ឃុន ភូ ធ្វើការជាមគ្គុទេសក៍ និងមានគ្រួសារកំពុងរស់ក្នុងទីក្រុងបាងកក បាននិយាយថា មុនពេលបានមកលេងស្រុកកំណើតនៅក្នុងខេត្ត ឡាំប៉ាង នាងបានឲ្យម្តាយរៀបចំផ្ទះជាមុន។ ប៉ុន្តែ លុះពេលមកដល់ នាងពិតជាភ្ញាក់ផ្អើលខ្លាំងតែម្តង ខណៈឃើញក្នុងបន្ទប់មានចានបង្គន់ដល់ទៅពីរ។
នាងបន្តថា «ម្តាយរបស់ខ្ញុំបានលើកហេតុផលថា វាអាចប្រើក្នុងគ្រាអាសន្ន បានទាំងចុច និងចាក់ ប៉ុន្តែ សម្រាប់ខ្ញុំផ្ទាល់គិតថាវាពិតជាចម្លែកណាស់។
លើសពីនេះ ក្នុង TikTok @guidepoo ក៏បានបង្ហោះឃ្លីប នាងហៅម្តាយមកនិយាយយ៉ាងបើកចំហរថា ហេតុអ្វីបានជាម៉ែដាក់ចានបង្គន់ដល់ទៅពីរបែបនេះ? ម្តាយរបស់នាងស្រាប់តែនិយាយយ៉ាងខ្លីថា “ស្អាតណាស់”។
បន្ទាប់មក ម្តាយរបស់នាងញញឹម ហើយពន្យល់ថា “ម៉ែធ្លាប់ឃើញនៅក្នុងផ្សារមានចានពីរ អាចប្រើបានទាំងម្តាយ និងកូន ទើបបានជាម៉ែធ្វើបែបនេះទៅ”។
ស្រ្តីជាម្តាយរូបនេះ ក៏បានបញ្ជាក់ថា ចានបង្គន់នេះ សូម្បីតែអ្នកភូមិជិតខាងមកមើលក៏ថាចូលចិត្តដែរ ហើយពួកគេថានឹងព្យាយាមយក «តម្រាប់តាម» ព្រោះវាពិតជាស្រស់ស្អាតណាស់៕ រក្សាសិទ្ធិដោយ៖ លឹម ហុង
