ភ្នំពេញ៖ លោករដ្ឋមន្ត្រី បានជម្រាបជូនដៃគូពាក់ព័ន្ធ សមាគមនិយោជក អង្គការសហជីព កម្មករនិយោជិត ព្រមទាំងបងប្អូនជនរួមជាតិ ជ្រាបថា ដើម្បីបន្តស្មារតីទិវាពលកម្មអន្តរជាតិ ១ ឧសភា ក្រសួងការងារ និងបណ្តុះបណ្តាលវិជ្ជាជីវៈ បាននឹងកំពុងយកចិត្តទុកដាក់បន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង ពង្រឹងការអនុវត្តច្បាប់ស្តីពីការងារ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ អញ្ជើញជាអធិបតី ក្នុងពិធីអបអរសាទរខួប លើកទី១៣២ ទិវាពលកម្មអន្តរជាតិ ១ ឧសភា ឆ្នាំ២០១៨ ក្រោមប្រធានបទ “សន្តិភាព ស្ថិរភាព ដើម្បីការងារ និងមុខរបរ” នាព្រឹក ថ្ងៃចន្ទ ទី៣០ ខែមេសា ឆ្នាំ២០១៨ នៅ ទីស្តីការក្រសួង។
លោករដ្ឋមន្ត្រី មានប្រសាសន៍ថា ឆ្នាំនេះ រាជរដ្ឋាភិបាលក៏បានចេញសារាចរណែនាំនិងសារលិខិត ដើម្បីបំផុសលើកទឹកចិត្តកម្មករនិយោជិត និងជនរួមជាតិ។ ប៉ុន្មានថ្ងៃនេះ មានរោងចក្រ សហគ្រាសជាច្រើនបានរៀបចំកម្មវិធីសំណេះសំណាលជាមួយកម្មករនិយោជិត កម្មវិធីកំសាន្ដសប្បាយ ពិធីជប់លៀង រាំកំសាន្ដ រៀបចំដំណើរទេសចរណ៍ និងរៀបចំឱ្យកម្មករកម្មការិនីសម្រាកលំហែ។ល។ ដែលនាំមកនូវបរិយាកាសសាមគ្គីភាព ភាតរភាពក្នុងសង្គម។
លោករដ្ឋមន្ត្រី បានថ្លែងអំណរគុណដល់គ្រប់ភាគីពាក់ព័ន្ធ ដែលបានចូលរួមក្នុងទិវានេះប្រកបដោយស្មារតីស្ថាបនា និងសូមអរគុណដល់ក្រុមការងារដែលបានខិតខំរៀបចំអបអរសាទរខួបអនុស្សាវរីយ៍លើកទី១៣២ នៃទិវាពលកម្មអន្ដរជាតិ ១ ឧសភា ឆ្នាំ២០១៨ ដ៏ឱឡារិកនេះ។ នៅរសៀលថ្ងៃទី១ ខែឧសភា ស្អែកនេះ យើងក៏បានរៀបចំកម្មវិធីវប្បធម៌ ការប្រឡងជ្រើសរើសសម្រស់ឯកវាយនភណ្ឌឆ្នាំ២០១៨ (លើកទី៤) សំដៅបង្កើតនូវបរិយាកាសសប្បាយរីករាយជូនបងប្អូនកម្មករ កម្មការិនីដែលកំពុងបម្រើការងារក្នុងឧស្សាហកម្មផ្នែកវាយនភណ្ឌ កាត់ដេរ និងផលិតស្បែកជើង នៅកម្ពុជា និងវិស័យសេដ្ឋកិច្ចផ្សេងៗទៀតក្នុងឱកាសអបអរសាទរខួប អនុស្សាវរីយ៍លើកទី១៣២ ទិវាពលកម្មអន្តរជាតិ។
លោករដ្ឋមន្ត្រី បានជម្រាបជូនដៃគូពាក់ព័ន្ធ សមាគមនិយោជក អង្គការសហជីព កម្មករនិយោជិត ព្រមទាំងបងប្អូនជនរួមជាតិ ជ្រាបថា ដើម្បីបន្តស្មារតីទិវាពលកម្មអន្តរជាតិ ១ ឧសភា ក្រសួងការងារ និងបណ្តុះបណ្តាលវិជ្ជាជីវៈ បាននឹងកំពុងយកចិត្តដាក់លើប្រការមួយចំនួន ដូចខាងក្រោម៖
១-បន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង ពង្រឹងការអនុវត្តច្បាប់ស្តីពីការងារ។ បន្តពង្រឹងយន្តការអធិការកិច្ចការងារឱ្យកាន់តែមានប្រសិទ្ធភាព និងតម្លាភាព ពង្រឹងភាពសុខដុមរមនានៃទំនាក់ទំនងវិជ្ជាជីវៈ លើកកម្ពស់ការយល់ដឹងអំពីសិទ្ធិ និងកាតព្វកិច្ចស្របច្បាប់របស់កម្មករនិយោជិត និងនិយោជក ព្រមទាំងបង្កើនការអនុវត្តប្រកបដោយ ប្រសិទ្ធភាពនូវបទបញ្ជាលេខ០២បប ចុះថ្ងៃទី០៦ ខែធ្នូ ឆ្នាំ២០១៦ ស្តីពីការអនុវត្តផែនការស្តីពីការទប់ស្កាត់ និងដោះស្រាយបញ្ហាកូដកកម្ម បាតុកម្ម នៅតាមគ្រប់មុខសញ្ញា ឆ្នាំ២០១៦-២០១៩ បទបញ្ជាលេខ០៣បប ចុះថ្ងៃទី២៧ ខែមីនា ឆ្នាំ២០១៣ ស្តីពីការរក្សាការពារ សន្តិសុខ សណ្តាប់ធ្នាប់សាធារណៈ នៅតាមតំបន់រោងចក្រ សហគ្រាស និងតំបន់ឧស្សាហកម្ម វិធានការការពារទប់ស្កាត់កូដកម្ម បាតុកម្ម និងដោះស្រាយវិវាទដោយសន្តិវិធី និងស្របតាមនីតិវិធីច្បាប់ បទប្បញ្ញត្តិ និងអនុសញ្ញាអន្តរជាតិពាក់ព័ន្ធនឹងវិស័យការងារ។
២-បន្តរៀបចំនូវបណ្តាលិខិតបទដ្ឋានគតិយុត្តសម្រាប់ដាក់ឱ្យដំណើរ ការការអនុវត្តច្បាប់ស្តីពីសហជីព។
៣-ត្រូវបន្តអនុវត្តអនុសាសន៍ទាំង ៩ចំណុច ដោយតាមដានការអនុវត្តប្រាក់ឈ្នួលអប្បបរមា ១៧០ដុល្លារអាមេរិក កម្មករនិយោជិតទទួលការពិនិត្យព្យាបាលជំងឺដោយមិនបង់ប្រាក់ កម្មការិនីបានទទួលប្រាក់ឈ្នួល ១២០ភាគរយ និងឈប់សម្រាករយៈពេល៣ខែ ក្នុងពេលសម្រាលកូន ការផ្តល់ប្រាក់ឧបត្ថម្ភដល់កម្មការិនីសម្រាលកូន កាតព្វកិច្ចរបស់និយោជកបង់ភាគទានរបបសន្តិសុខសង្គមផ្នែកថែទាំសុខភាព១០០% ជំនួសកម្មករនិយោជិត ការត្រួតពិនិត្យជាប្រចាំនូវថ្លៃឈ្នួលផ្ទះ ថ្លៃទឹក និងថ្លៃអគ្គិសនី នៅតាមផ្ទះជួល និងកំពុងបន្តជំរុញការតភ្ជាប់បណ្តាញអគ្គិសនី និងទឹកស្អាតនៅតាមតំបន់ផ្ទះជួលរបស់កម្មករនិយោជិត ការដាក់ឲ្យអនុវត្តរបបសន្តិសុខសង្គមផ្នែកសោធននិវត្តន៍ឆ្នាំ២០១៩ និងការដោះស្រាយបើកផ្តល់អត្ថប្រយោជន៍ផ្សេងៗ ជូនកម្មករនិយោជិត ដែលរោងចក្របិទទ្វារ។
៤-បន្តរៀបចំធ្វើវិសោធនកម្មច្បាប់ស្តីពីការងារលើចំណុចមួយចំនួន ដើម្បីសម្រួលនីតិវិធីក្នុងការបើកផ្តល់ ប្រាក់អត្ថប្រយោជន៍ផ្សេងៗជូនកម្មករនិយោជិត។ ជំរុញរៀបចំសេចក្តីព្រាងច្បាប់ស្តីពីប្រាក់ឈ្នួលអប្បបរមា ច្បាប់ស្តីពីរបបសន្តិសុខសង្គម។
៥-បន្តអនុវត្តកម្មវិធីពិភាក្សាប្រាក់ឈ្នួលអប្បបរមាប្រចាំឆ្នាំតាមរូបមន្ត និងយន្តការត្រីភាគីដែលគ្រប់ភាគី ទទួលយកបានកន្លងមកក្នុងការកំណត់ការដំឡើងប្រាក់ឈ្នួលអប្បបរមា សម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង។
៦-បន្តលើកទឹកចិត្តដល់មាតាបិតា អាណាព្យាបាល កម្មករនិយោជិត និងយុវជន ដើម្បីទទួលការបណ្តុះបណ្តាលបច្ចេកទេសវិជ្ជាជីវៈ ដើម្បីលើកកម្ពស់ជំនាញ ផលិតភាពការងារ និងមានសមត្ថភាពប្រកួត ប្រជែង។
៧-បន្តពង្រឹងការអនុវត្តអនុសញ្ញាអន្តរជាតិខាងការងារដែលបានផ្តល់សច្ចាប័ន។ បន្តសហការជាមួយគម្រោងរោងចក្រកាន់តែប្រសើរនៅកម្ពុជា (ILO-BFC) និងគម្រោងសហការជាមួយដៃគូអភិវឌ្ឍផ្សេងទៀត។
បន្ទាប់មកឯកឧត្តមរដ្ឋមន្ត្រីបានធ្វើការបំភ្លឺនូវសំណូមពរមួយចំនួនដែលសមាគមនិយោជក អង្គការសហជីព បានស្នើអោយក្រសួងជួយដោះស្រាយ ហើយនៅសល់ចំណុចផ្សេងៗទៀត ក្រសួងនឹងដោះស្រាយទៅតាមនីតិវិធីនៃច្បាប់នូវរាល់ចំណុចអស់ទាំងនោះ៕ ដោយ៖បញ្ញាស័ក្តិ
