មិនថាអ្នកប្រយ័ត្នយ៉ាងណា ក៏អ្វីនៅតែអាចកើតឡើងនៅលើផ្លូវបានគ្រប់ពេល។ ជាក់ស្តែង ថ្មីៗនេះ ស្រ្តីម្នាក់នៅក្នុងប្រទេសថៃ បានចែករំលែកបទពិសោធន៍របស់នាងស្ទើរបាត់បង់ជីវិត ខណៈកំពុងបើកម៉ូតូដូចសព្វមួយដង ស្រាប់តែខ្សែដ៏អាថ៌កំបាំងមិនដឹងមកពីណា បានទាក់រុំ.ក និងកាត់សសៃពួរម្រាមដៃរបស់នាងអស់ចំនួន២។
ស្រ្តីរងគ្រោះដែលមានឈ្មោះ Wasana Konkrue អាយុ ២៨ ឆ្នាំ មកពីខេត្តប៊ូរីរ៉ាម បានចែកលែកករណីនេះនៅលើផេក Jang Kaow Khu Mueang កាលពីថ្ងៃទី៣១ ខែមករា ឆ្នាំ២០២២ ជាភាសាថៃឲ្យដឹងថា នាងធ្វើការរោងចក្រឥដ្ឋ ក្នុងខេត្ត។ នៅថ្ងៃកើតហេតុ វេលាម៉ោង ៥ ព្រឹក ថៅកែរបស់នាងបានហៅឲ្យទៅយករបស់របរខ្លះ សម្រាប់ចូលឆ្នាំចិន។ បន្ទាប់មក នាងបានជិះម៉ូតូចាកចេញពីផ្ទះតាមផ្លូវ Khu Mueang-Puthaisong ដែលជាផ្លូវធំមាន៤គន្លង។ ប៉ុន្តែ ពេលនាងកំពុងបើកម៉ូតូ ក៏ស្រាប់តែមានខ្សែមួយដែលនាងជឿថាខ្សែនីឡុង បានរុំជុំកវិញនាង និងរឹតកាន់តែតឹងទៅៗ។ នៅពេលនោះ នាងពិតជាពិបាកដកដង្ហើម ហើយព្យាយាមទាញខ្សែចេញពីករបស់នាង។
Wasana បានយកដៃឆ្វេង ទាញខ្សែ ខណៈដៃស្តាំគ្រប់គ្រងបន្ធូរល្បឿនម៉ូតូ ដើម្បីឈប់។ នាងឈឺចុកចាប់ទាំងនៅលើ.ក និងម្រាមដៃ ហើយនាងគិតថា នាងនឹងស្លាប់។
តែទោះយ៉ាងណា ពិតជាសំណាង ដោយករណីនេះពុំបណ្តាលឲ្យនាងបាត់បង់ជីវិត ហើយនាងព្យាយាមរក្សាភាពស្ងប់ស្ងាត់ គ្រប់គ្រងជិះម៉ូតូទៅរកប្តីរបស់នាង ដែលបាននាំយកនាងទៅព្យាបាលរបួសភ្លាមៗ។ Wasana មានរបួសជម្រៅប្រហែល១សង់ទីម៉ែត្រនៅក និងសរសៃពួរម្រាមដៃ២ រងរបួស។ បុរសជាប្តីបានរាយការណ៍ទៅនគរបាលខេត្តឃួមឿង។ បន្ទាប់មក ប៉ូលិសបានចុះទៅពិនិត្យផ្លូវនោះ ប៉ុន្តែរកមិនឃើញខ្សែនោះនៅកន្លែងណាទេ៕ រក្សាសិទ្ធិដោយ៖ លឹម ហុង
