កណ្តាល ៖ ជនសង្ស័យ៣នាក់ ក្នុងករណីជួញដូរនិងប្រើប្រាស់ដោយខុសច្បាប់នូវសារធាតុញៀន ត្រូវបានកម្លាំងនគរបាលប៉ុស្តិ៍រដ្ឋបាលស្វាយជ្រំ នៃអធិការដ្ឋាននគរបាលស្រុកខ្សាច់កណ្តាល បង្ក្រាបនិងឃាត់ខ្លួន កាលពីថ្ងៃអង្គារ ទី១ ខែឧសភា ឆ្នាំ២០១៨ វេលាម៉ោង១៧និង៣០នាទីនៅចំណុចភូមិបារាជ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលជំនាញប្រឆាំងគ្រឿងញៀនស្រុកខ្សាច់កណ្តាល បានឲ្យដឹងថា ជនសង្ស័យសមត្ថកិច្ចឃាត់ខ្លួនមានចំនួន៣នាក់ ១-ឈ្មោះ ប្រាក់ សាវុធ ភេទប្រុស អាយុ៣៧ឆ្នាំ មុខរបរ កសិករ ជនជាតិខ្មែរ មានទីលំនៅភូមិបារាជ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល។ ២-ឈ្មោះ ឡុង រតនា ភេទប្រុស អាយុ ២៧ឆ្នាំ មុខរបរលក់ថ្នាំញៀន ជនជាតិខ្មែរ មានទីលំនៅភូមិ/ឃុំអរិយក្សត្រ ស្រុកល្វាឯម ខេត្តកណ្តាល និងទី៣-ឈ្មោះ គឹម ពិសី ភេទស្រី អាយុ២២ឆ្នាំ មុខរបរ កូនជាងអ៊ុតសក់ ជនជាតិខ្មែរ មានទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ វត្ថុតាងចាប់យករួមមាន៖ ម្ស៉ៅក្រាមពណ៌សថ្លាសង្ស័យជាសារធាតុញៀនចំនួន១៤កញ្ចប់តូច (ទម្ងន់សរុប០,៨០ក្រាម) កូនកន្ត្រៃចំនួន១ ទូរស័ព្ទម៉ាកSAMSUNG ម៉ូតូម៉ាកហុងដា C100 កូរ៉េពណ៌ក្រហមស៊េរីចាស់ចំនួន១គ្រឿង និងឧបករណ៍ប្រើប្រាស់វេចខ្ចប់ថ្នាំញៀនមួយចំនួន។ នៅមុនពេលកើតហេតុ កម្លាំងប៉ុស្តិ៍នគរបាលរដ្ឋបាលស្វាយជ្រំ បានដើរល្បាតក្នុងភូមិសាស្ត្រហើយមាន ប្រជាពលរដ្ឋល្អបានរាយការណ៍ថា មានការជួញដូរ និងប្រើប្រាស់ថ្នាំញៀន នៅចំណុចកើតហេតុ ភ្លាមនោះសមត្ថកិច្ចនគរបាលប៉ុស្តិ៍រដ្ឋបាលស្វាយជ្រំ បានចុះបង្ក្រាប និងឃាត់ខ្លួនជនសង្ស័យ បានចំនួន៣នាក់ និងដកហូតបានវត្ថុតាង ដូចបានរៀបរាប់ខាងលើរួចបញ្ជូនជនសង្ស័យ រួមជាមួយវត្ថុតាងមកកាន់អធិការដ្ឋាននគរបាលស្រុកខ្សាច់កណ្តាលកសាងសំណុំរឿងចាត់ការតាមនីតិវិធីច្បាប់៕ ដោយ ៖ បញ្ញាស័ក្តិ
