លោក Nguyen Van Nui មកពីភូមិ Can Ngon ឃុំ Thanh Yen ស្រុក U Minh Thuong ខេត្ត Kien Giang ប្រទេសវៀតណាម បានកំពុងល្បីល្បាញខ្លាំងណាស់ នៅលើអុិនធើរណិត ព្រោះតែស្តាយល៍ប្លែកៗដ៏អស្ចារ្យរបស់គាត់ ក្នុងការឡើងដូង។
កើតក្នុងគ្រួសារជាកសិករដ៏លំបាក ទាំងឪពុក ទាំងម្តាយ ថ្ងៃណាក៏ដៃជើងប្រឡាក់សុទ្ធតែភក់ ព្រោះរស់នៅពឹងតែលើមុខរបរស៊ីឈ្នួលកាប់គាស់ឲ្យគេ តាំងពីតូចមក លោក Nui តស៊ូរកស៊ីចិញ្ចឹមជីវិត មិនដែលស្គាល់ភាពស្រណុកសុខស្រួលនោះទេ។
លោក Nui បាននិយាយថា កាលពីកុមារភាព លោកតែងតែដើរតាមឪពុក និងបងប្អូន ទៅកាន់វាលស្រែ ដើម្បីឃ្វាលក្របី រកខ្យង និងស៊ីឈ្នួលឡើងកាប់ដូង។ កាលនោះ ឪពុករបស់គាត់ជាអ្នកឡើងកាប់ដូង ខណៈគាត់នៅខាងក្រោមមដើម្បីប្រមូលផ្លែ។
ក្នុងដំណើរជីវិតដ៏កំសត់នេះ បន្ទាប់មក គាត់ក៏បានហាត់ឡើងដូងដូចឪពុករបស់គាត់ដែរ ដោយឆ្លងកាត់ការធ្លាក់ជាច្រើនដង រហូតដល់អាយុ ១៤ ឆ្នាំ ទើបឡើងស្ទាត់ ចេញដើររកលុយដោយខ្លួនឯង។
កំពូលអ្នកឡើងដូងវ័យ ៤០ ឆ្នាំ រូបនេះ បានចែករំលេកថា «កាលពីមុន ខ្ញុំមិនទទួលបានប្រាក់ឈ្នួលឡើងកាប់ដូងដូចពេលនេះទេ ប៉ុន្តែ ពេលកាប់ដូងឲ្យគេ ខ្លះគេឲ្យដូងខ្ញុំពីរបីផ្លែ ឬត្រី សាច់ ជាដើម»។ ប៉ុន្តែ ឥឡូវវាខុសគ្នា ដោយឡើងកាប់ដូង១ដើម ទទួលបានថ្លៃឈ្នួលចន្លោះពី ២៥០០០ ដុង ទៅ ៣០០០០ ដុង។
មិនថាខួបប្រាំង ខួបវស្សា លោក Nui បានដើរសុីឈ្នួលឡើងកាប់ដូងដ៏ខ្ពស់ៗ ដើម្បីរកប្រាក់ចិញ្ចឹមខ្លួនឯង និងចិញ្ចឹមឪពុកម្តាយចាស់ជរារបស់គាត់។ ប៉ុន្តែមិនដូចអ្នកដទៃទេ ឧបករណ៍របស់គាត់សម្រាប់ឡើងដូងគឺមានតែកាំបិតនិងខ្សែសម្រាប់ចងធ្លាយដូងប៉ុណ្ណោះ។
ទាក់ទងការឡើងវិញ លោក Nui គ្រាន់តែយកកាំបិតខាំនិងមាត់ ចងខ្សែរុំចង្កេះ គាត់មិនបានអោបដើមទេ ដោយគ្រាន់តែប្រើដៃ និងជើងឡើងធម្មតា។ ឥរិយាបថឡើងដូងរបស់គាត់គឺខុសពីអ្នកផ្សេង បើយោងតាមការសង្កេត ក្នុងរយៈពេលប្រហែលដប់វិនាទី គឺគាត់បានឡើងដល់កំពូលចុងដូងដែលមានកំពស់ ១០ ម៉ែត្រ ហើយ។
លោកបានឲ្យដឹងទៀតថា «កាប់ដូង ពុះដូង ស្តាយល៍ឡើងដូង ខ្ញុំធ្វើបានគ្រប់ទាំងអស់ ហើយមួយម៉ោង ខ្ញុំកាប់ដូងបាន ៣ដើម ជាធម្យមខ្ញុំរកប្រាក់បាន ២០០០០ ទៅ ៣០០០០ ដុង ក្នុង១ដើម និងរកចំណូលបានជាង ៥០០០០ ដុង (ជាង ២ដុល្លារ) ក្នុងមួយថ្ងៃ»។
ពិតណាស់ តាមរយៈវីដេអូលោក Nui បានបញ្ចេញស្ទីលបង្វិលខ្លួន ក្នុងអំឡុងពេលចុះពីដើម ឬសម្រូតក្បាលមកមុនតាមធាងដូង និងសូម្បីដើរឆ្លងផ្លោះពីដើមដូងមួយទៅដើមដូងមួយទៀតប្រៀបដូចសត្វស្វាអី។ លើសពីនេះ លោក Nui ក៏បានបង្ហាញភាពអស្ចារ្យ យកឆ្មេញខាំសកសំបកដូងទុំនិងប្រើកែងដៃពុះបំបែកផ្លែដូងទៀតផង។
នៅពេលសួរពីឈ្មោះហៅក្រៅថា «coconut climbing saint» លោក Nui សើចទាំងអៀនបន្តិច ហើយនិយាយថា៖ «នេះជាឈ្មោះគួរឲ្យអស់សំណើចណាស់ កាលពីប៉ុន្មានឆ្នាំមុន មានអ្នក youtuber ថតឃ្លីបខ្ញុំឡើងដើមដូងធ្វើសៀកគ្រប់ប្រភេទនៅលើដើម រួចបង្ហោះវា ខ្ញុំមិននឹកស្មានថា មនុស្សម្នាចាប់អារម្មណ៍ច្រើនដល់ម្លុឹងទេ ហើយក៏មានមតិជាច្រើនបានសរសើរខ្ញុំថាជា ពួកបរិសុទ្ធឡើងដូងខាងលិច»៕ រក្សាសិទ្ធិដោយ៖ លឹម ហុង
