កាលពីពេលថ្មីៗនេះ នារីម្នាក់នៅក្នុងប្រទេសចិន បានរងការរិះគន់ជាខ្លាំងលើ Weibo ចំពោះការត្អូញត្អែរអំពី «អាំងប៉ាវ» ដែលឪពុកម្តាយមិត្តប្រុសរបស់នាងបានផ្តល់ឲ្យនាង។
នារីរូបនេះ បាននិយាយថា មុនចូលឆ្នាំចិននាងបានរួមដំណើរទៅកាន់ស្រុកកំណើតមិត្តប្រុស ដើម្បីទៅលេងឪពុកម្តាយរបស់គាត់។ ហើយនេះក៏ជាលើកទីមួយដែលនាងជួបពួកគេ។
អំឡុងពេលនាងស្នាក់នៅទីនោះ នាងត្រូវបានឪពុកម្តាយផ្តល់អាហារឆ្ងាញ់ៗ ដែលនាងមានអារម្មណ៍ថា “មិនអន់ពេកទេ” ហើយផ្តល់ឱ្យនាងនូវចំណាប់អារម្មណ៍ថា ពួកគេមិន “ខ្វះលុយ” ឬ “ក្រអឺតក្រទម” នោះដែរ។
នៅថ្ងៃចុងក្រោយសម្រាប់ការស្នាក់នៅ ម្តាយរបស់គាត់បានផ្តល់អាំងប៉ាវដល់រូបនាង ហើយក្រោយមក នាងក៏បានបើកអ៊ុតមើលពេលកំពុងជិះរថយន្តវិលត្រឡប់ទៅក្រុងវិញ។ នាងបាននិយាយថា “នៅពេលខ្ញុំបើកកញ្ចប់ពណ៌ក្រហមនៅក្នុងឡាន ចំណាប់អារម្មណ៍របស់ខ្ញុំចំពោះគ្រួសាររបស់ពួកគេបានផ្លាស់ប្តូរទាំងស្រុង ព្រោះថា ក្នុងអាំងប៉ាវនោះមានលុយត្រឹមតែចំនួន ១២៥៨ ដុល្លារ ប៉ុណ្ណោះ។ ហេតុនេះ ខ្ញុំមានអារម្មណ៍ថា ត្រូវគេប្រមាថ និងមិនគោរព។ ហិរញ្ញវត្ថុរបស់ពួកគេមិនអន់ទេ ដែលពួកគេមិនគួរផ្តល់ឲ្យខ្ញុំតិចតួចបែបនេះសោះ!”។
អ្វីដែលគួរឲ្យហួសចិត្តនោះ ដើម្បីចង់ដឹងចម្លើយ នារីមានចិត្តលោភលន់រូបនេះ បានសួរនាំមិត្តសម្លាញ់ម្នាក់ ដែលបាននិយាយថា ចំនួននេះមិនអីទេ ហើយនាងគួរតែសរសើរទឹកចិត្តពួកគេទៅ។ តែទោះយ៉ាងណា នារីរូបនេះនៅតែមិនអាចទទួលយកបាន ហើយបាននិយាយថា «បើពួកគេស្ទាក់ស្ទើរក្នុងថ្ងៃចូលឆ្នាំចិនលើកដំបូងបែបនេះទៅហើយ តើអនាគតថ្ងៃខាងមុខ ទៅជាយ៉ាងណា?»។
ដោយឡែក អ្នកលេងបណ្តាញសង្គម ក្រោយពីបានអានការបង្ហោះរបស់នាងរួច បានបញ្ចេញមតិរិះគន់យ៉ាងចាស់ៗដៃថា៖ «តើឪពុកម្តាយរបស់អ្នកឱ្យអ្នកប៉ុន្មាន?, អ្នកត្រូវដឹងថា អាំងប៉ាវ គឺជានិមិត្តសញ្ញាចេញពីបេះដូង ហើយមនុស្សមិនគួរមានអារម្មណ៍ថា មានសិទ្ធិទទួលបានទ្រព្យសម្បត្តិរបស់អ្នកដទៃនោះឡើយ, ទោះបីជាពួកគេផ្តល់ឱ្យអ្នក 1$ ក៏ដោយ ក៏វានៅតែជាអ្វីមួយដែលយើងគួរដឹងគុណ និងមិនត្អូញត្អែរឈ្លើយសឹករបៀបនេះនោះទេ!!»៕ រក្សាសិទ្ធិដោយ៖ លឹម ហុង
