ភ្នំពេញ៖ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានធ្វើការប្រជុំផ្សព្វផ្សាយសេចក្តីណែនាំលេខ ០៣៥ សណន ចុះថ្ងៃទី២០ ខែតុលា ឆ្នាំ២០១៧ ស្តីពីការកែតម្រូវ និងការធ្វើមោឃភាពទិន្នន័យ នៃបញ្ជីអត្តានុកូលដ្ឋាន នៅរសៀលថ្ងៃទី ៣១ ខែតុលា ឆ្នាំ២០១៧ នេះ នៅក្រសួងមហាផ្ទៃ ក្រោមអធិបតីភាពនាយឧត្តមសេនីយ៍ ម៉ៅ ច័ន្ទតារា អគ្គនាយក នៃអគ្គនាយដ្ឋានអត្តសញ្ញាណកម្ម។
នាយឧត្តមសេនីយ៍ ម៉ៅ ច័ន្ទតារា អគ្គនាយកដ្ឋានអត្តសញ្ញាណកម្ម បានថ្លែងបញ្ជាក់ថា ការបើកយុទ្ធនាការផ្តល់លិខិតអត្រានុកូលដ្ឋានជូនប្រជាពលរដ្ឋ ក្រសួមហាផ្ទៃបានចាប់ផ្តើមដំរការកាលពីឆ្នាំ២០០២ ដល់ឆ្នាំ២០០៦។ ហើយដោយសារថា បញ្ជីអត្រានុកូលដ្ឋានត្រូវបាត់បង់ស្ទើរតែទាំងស្រុងនៅក្នុងរបបបខ្មែរក្រហម មិនមែនតែបញ្ជីអត្រានុកូលដ្ឋានទេ គឺឯកសារជាទូទៅស្ទើរតែបាត់ទាំងអស់។ ហើយក្រសួងមហាផ្ទៃចាប់ផ្តើមធ្វើយុទ្ធនាការដើម្បីផ្តល់ និងចុះបញ្ជីឡើងវិញពីឆ្នាំ២០០២ រហូតដល់ឆ្នាំ២០០៦។ ហើយក្នុងនោះដោយក្រសួងមហាផ្ទៃ គិតថា វាជាយុទ្ធនាការ ហើយយយុទ្ធនាការប្រហែលជាមានការខុសទិន្នន័យ ហើយក៏បានរៀបចំឲ្យប្រជាពលរដ្ឋស្នើសុំកែតម្រូវពីឆ្នាំ២០០៦ ដល់ឆ្នាំ២០០៨ គឺទុកពេល២ឆ្នាំឲ្យប្រជាពលរដ្ឋកែតម្រូវ ដោយសារដំណាក់កាលនោះ សេចក្តីត្រូវការរបស់ប្រជាពលរដ្ឋពាក់ព័ន្ធដល់ឯកសារបញ្ជាក់អត្តសញ្ញាណ គឺថាវាមិនត្រឹមត្រូវតាមច្បាប់ និងមានឯកសារផ្សេងៗមួយចំនួនក៏អាចជំនួសឯកសារបញ្ជាក់អត្តសញ្ញាណនេះ ជាពិសេសសំបុត្រអត្រានុកូលដ្ឋាននេះ វាមិនក្លាយទៅជាតម្រូវការចាំបាច់របស់ប្រជាពលរដ្ឋ។
នាយឧត្តមសេនីយ៍ ម៉ៅ ច័ន្ទតារា បានបន្តថា នៅពេលដែលបង្កើតអគ្គនាយកដ្ឋានអត្តសញ្ញាណកម្ម នៅពេលដែលយើងធ្វើការត្រួត និងធ្វើការសិក្សាបានរកឃើញថា មាន៣៥% ដែលនៅតែខុស។ ដោយឃើញពីបញ្ហាសំខាន់បែបនេះ ហើយបើមិនមានវិធានការដោះទេ ទិសដៅរបស់ក្រសួងមហាផ្ទៃ គឺវាអត់អាចសម្រេចបានទេ។ ហេតុនេហើយបានជាក្រុមការងារអគ្គនាយកដ្ឋានអត្តសញ្ញណកម្ម បានស្នើសុំគោលការណ៍សម្តេចក្រឡាហោម ស ខេង ដើម្បីអនុញ្ញាតឲ្យក្រុមការងារអគ្គនាយកដ្ឋានអត្តសញ្ញាណកម្ម គឺធ្វើការងារជាមួយក្រសួងយុត្តិធម៌ មានវិធានការសម្រាប់កែតម្រូវទិន្នន័យ។ ជារួមក្រសួងយុត្តិធម៌បានឯកភាពត្រូវតែធ្វើការកែសម្រួលទិន្នន័យនេះ ដោយប្រើរយៈពេល២ឆ្នាំបន្តទៀត។
សូមជម្រាបថា តាមរយៈការសិក្សាផ្ទៀងផ្ទាត់ទិន្នន័យប្រជាពលរដ្ឋនាពេលកន្លងមក ក្រសួងមហាផ្ទៃបានកត់សម្គាល់ឃើញថា ប្រជាពលរដ្ឋប្រមាណជិត៣៥% កំពុងជួបប្រទះខុសទិន្នន័យអត្តសញ្ញាណរបស់ខ្លួននៅក្នុងបញ្ជីនិងសំបុត្រអត្រានុកូលដ្ឋាន ជាមួយឯកសារអត្តសញ្ញាណដទៃទៀត និងប្រជាពលរដ្ឋខ្លះបានចុះបញ្ជីអត្រានុកូលដ្ឋានប្រភេទតែមួយលើសពីមួយដង ជាពិសេសការចុះបញ្ជីក្នុងអំឡុងពេលយុទ្ធនាការចុះបញ្ជីអត្រានុកូលដ្ឋានចល័ត ដែលធ្វើអោយសាម៉ីខ្លួនជួបការលំបាកយ៉ាងខ្លាំងក្នុងការស្នើសុំសេវារដ្ឋបាលផ្សេងៗ។ នីតិវិធីក្នុងការកែតម្រូវនិងការមោឃភាពបញ្ជីអត្រានុកូលដ្ឋានបច្ចុប្បន្នមានភាពលំបាកស្មុគស្មាញដែលមិនអាចឆ្លើយតបបាន និងសំណូមពររបស់ប្រជាពលរដ្ឋ៕ ដោយៈ មុនីរាជ
