ក្រោយពីបាត់មុខមួយរយៈធំនៅក្នុងសង្គមសិល្បៈ ស្រាប់តែពេលនេះមានដំណឹងដ៏ភ្ញាក់ផ្អើលមួយ គឺតារាសម្ដែងគ្រងដំណែងតារាស្រីសិចស៊ី កញ្ញា វ៉ាង ស្រីណូ បានប្រកាសចូលសិល្បៈវិញ ព្រមទាំងបានទទួលការងារសិល្បៈមួយចំនួនផងដែរ កាលពីពេលថ្មីៗនេះ ។
ទស្សនិកជាច្រើនបានស្គាល់រួចមកហើយ ក្នុងអំឡុងឆ្នាំ ២០០០ កញ្ញា វ៉ាង ស្រីណូ បានគ្រងដំណែងជាតារាស្រីសិចស៊ីប្រចាំប្រទេស ហើយកេរ្តិ៍ឈ្មោះរបស់កញ្ញា បានល្បីល្បាញរហូតដល់ក្រៅប្រទេសថែមទៀតផង ។
ក្រោយមក តារាស្រីនិយមសម្ញែងដើមទ្រូងខាងលើ ក៏បានផ្អាកពីសិល្បៈដោយសាររវល់ខ្លាំង ជាមួយការងារជំនួញផ្ទាល់ខ្លួន ប៉ុន្តែអ្វីដែលភ្ញាក់ផ្អើលជាថ្មីនេះ គឺគេបានឃើញ វ៉ាង ស្រីណូ បង្ហោះសារខ្លីមួយនៅគណនីហ្វេសប៊ុករបស់នាង ដោយសរសេរថា «អូនចូលថតរឿង និងខារ៉ាអូខេវិញហេីយណា» ។ សម្រាប់សារមួយនេះ បានបញ្ជាក់ឱ្យឃើញថា កញ្ញា វ៉ាង ស្រីណូ បានឈានជើងចូលសិល្បៈម្ដងទៀត បន្ទាប់ពីសម្រាកមួយរយៈធំជាមួយការងារផ្ទាល់ខ្លួន ហើយសង្ឃឹមថា កញ្ញា នៅតែមានការគាំទ្រខ្លាំងដូចមុន ៕ សាវុធ
