មួយរយៈចុងក្រោយនេះ ករណីអំពើចោរកម្ម ជាពិសេសពីសំណាក់ក្រុមស្ទាវៗដាច់លុយខ្លាំង ដែលសូម្បីតែសាំងដប ក៏ពួកគេធ្វើសុីអ្នកលក់ដែរ ធ្វើឲ្យគ្រប់គ្នាជាអ្នកលេងបណ្តាញសង្គម ឃើញហើយមហាសែនហួសចិត្តខ្លាំង សឹងរកពាក្យថ្លែងមិនចេញនោះទេ។
ដោយឡែក វីដេអូមួយដែលទើបត្រូវបានគេបង្ហោះនៅលើបណ្តាញសង្គម TikTok ថ្មីៗនេះ បានបង្ហាញចោរ២នាក់ ជិះម៉ូតូ ZoomerX មួយគ្រឿង ធ្វើសកម្មភាពសុីដាច់ផ្លែត្របែក១ថង់ ពីអ្នកលក់តាមដងផ្លូវមួយកន្លែង ជិះចាកចេញដោយសុវត្ថិភាព។
តាមរយៈវីដេអូកាមេរ៉ាម្ចាស់ផ្ទះ បានបង្ហាញលោកចោរម្នាក់ចុះទិញផ្លែឈើ ខណៈគ្នីគ្នារបស់វាម្នាក់ទៀត អង្គុយលើម៉ូតូ។ ប៉ុន្តែ បន្ទាប់ពីអ្នកលក់ប្រុសម្នាក់នោះ បានហុចថង់ត្របែកឲ្យ ចោររូបនោះបាន «បញ្ចោត» អ្នកលក់ថាទិញថែមទៀត ហើយនៅពេលអ្នកលក់ងាកខ្លួនយកថង់ ស្រាប់តែចោររូបនោះឡើងម៉ូតូគ្នីគ្នាដែលត្រៀមចាំជាស្រេច ដាក់មេប្រូតជិះចាកចេញយ៉ាងលឿងតែម្ដង។
ជាមួយគ្នានេះផងដែរ អ្នកលេងបណ្តាញសង្គម ក្រោយពីបានឃើញហួសចិត្តពេក ក៏បានបញ្ចេញមតិលើកឡើងថា «ថ្មីទៀតហើយ! បងប្អូនដែលលក់របស់របរនានា សូមបង្កើនការប្រុងប្រយ័ត្ន ព្រោះថា ឥឡូវនេះសូម្បីតែផ្លែឈើក៏វាធ្វើស៊ីយើងដែរ, ថ្ងៃមុនទើបតែសាំងដប ឥឡូវ ផ្លែត្របែក,… »។
ជាពិតណាស់ បើទោះជាសង្គមជាតិសុខសន្តិភាពក្តី តែអំពើលួចជាពិសេសឆក់នេះឯង នៅក្នុងសង្គមបច្ចុប្បន្ន តែងឆក់ឱកាសសម្រាប់ទីកន្លែង ដែលពួកចោរគិតថាសុវត្ថិភាព ហេតុនេះ មានការតែប្រុងប្រយ័ត្នប៉ុណ្ណោះ!!៕ រក្សាសិទ្ធិដោយ៖ លឹម ហុង
