មានច្បាប់មួយចំនួនដែលអ្នកជិះម៉ូតូត្រូវអនុវត្តនៅពេលជិះលើដងផ្លូវសាធារណៈ។ ក្នុងនោះដូចជា ពួកគេត្រូវតែពាក់មួកសុវត្ថិភាព ហើយជិះក្នុងលក្ខណៈសុវត្ថិភាពដែលមិនបង្កគ្រោះថ្នាក់ដល់ខ្លួនឯង ឬអ្នកដទៃ។ លើសពីនេះ ក៏មានទំនួលខុសត្រូវក្នុងការធ្វើជាឪពុកគេដែរ ដូចជាការមិនបង្កគ្រោះថ្នាក់ដល់កូនៗ។
ទាក់ទងការលើកឡើងខាងលើ ថ្មីៗនេះ ផេកជាភាសាចិនមួយ បានចែករំលែកវីដេអូមួយ បង្ហាញឲ្យឃើញបុរសជាឪពុកម្នាក់ ពុំត្រឹមតែបើកបរបំពានច្បាប់ទេ តែថែមទាំងធ្វើរឿងដ៏ប្រឈមគ្រោះថ្នាក់ ដោយដាក់កូនស្រីតូចអង្គុយខាងមុខ រួចបង្ហោះម៉ូតូយ៉ាងរំភើយ ទាំងមិនពាក់មួកសុវត្ថិភាពសោះឡើយ។
ក្រោយពីបានឃើញបែបនេះ មហាជនបានធ្វើការថ្កោលទោសយ៉ាងខ្លាំង ទៅលើបុរសជាឪពុកស្ទាវរូបនេះ ដែលអាចនឹងបង្កគ្រោះថ្នាក់ដល់កូនស្រីតូចរបស់គាត់ ក្នុងថ្ងៃណាមួយ។ អ្នកខ្លះបារម្ភថា កូនស្រីតូចនោះ នៅពេលធំដឹងក្តីអាចដើរតាមគន្លងឪពុកពុំខាន ហើយនៅពេលមានគ្រោះថ្នាក់កើតឡើង សួរថាតើអ្នកណាទទួលខុសត្រូវ!?។
តាមរយៈនេះ គេសង្ឃឹមយ៉ាងមុតមាំថា អាជ្ញាធរតាមចាប់បុរសជាឪពុករូបនោះ ហើយចាត់វិធានការចំពោះគាត់ មុនពេលគាត់បន្តធ្វើសកម្មភាពឡើងវិញ និងអាចបង្កគ្រោះថ្នាក់ដល់កូនគាត់ពិតប្រាកដ៕ រក្សាសិទ្ធិដោយ៖ លឹម ហុង
