Friday, December 2, 2022

អត្រាឆ្លងជំងឺកូវីដ-១៩ នៅខេត្តព្រះសីហនុ ថយចុះគួរឱ្យគត់សំគាល់​ ខណៈនៅភ្នំពេញនៅបន្តរកឃើញអ្នកឆ្លងជាបន្តបន្ទាប់

spot_img

ព្រះសីហនុ៖ ខណៈដែលនៅរាជ​ធានីភ្នំពេញ មានករណីរកឃើញអ្នកឆ្លងជំងឺកូវីដ១៩​ ជាបន្តបន្ទាប់ អាជ្ញាធរខេត្តព្រះសីហនុ​បានប្រកាសថា អត្រាឆ្លងរាលដាលនៃជំងឺកូវីដ-១៩ នៅក្នុងខេត្តព្រះសីហនុ មានការថយចុះជាលំដាប់ ដោយរដ្ឋបាលខេត្តបានជំរុញឱ្យប្រជាពលរដ្ឋបន្តចូលរួមទប់ស្កាត់កូវីដ១៩។​​ ក្រសួងសុខាភិបាល បានប្រកាសរកឃើញអ្នកឆ្លងកូវីដ១៩ថ្មី តាមរយៈម៉ាស៊ីនតេស្ត​ PCR ប្រមាណ២០០នាក់ ក្នុងមួយថ្ងៃ។​ គិតត្រឹមថ្ងៃទី ១៨​ កុម្ភៈ​ ឆ្នាំ២០២២ នៅទូទាំងប្រទេសកម្ពុជា បានរកឃើញអ្នកឆ្លងជំងឺកូវីដ១៩ សរុបចំនួន ១២៥.២០១ នាក់, អ្នកជាសះស្បើយសរុបចំនួន ១១៩.៨៨០ នាក់, ស្លាប់សរុបចំនួន ៣.០១៥ នាក់។

អាជ្ញាធរខេត្តព្រះសីហនុ​ បានវាយតម្លៃខ្ពស់ និងលើកទឹកចិត្តឱ្យប្រជាពលរដ្ឋបន្តអនុវត្តតាមការណែនាំរបស់រដ្ឋបាលខេត្ត  និងវិធានការរបស់ក្រសួងសុខាភិបាល ព្រមទាំងវិធានការ ៣.ការពារ ៣.កុំរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា សំដៅទប់ស្កាត់ការឆ្លងរាលដាលនៃជំងឺកូវីដ-១៩  ជាពិសេសមេរោគបំប្លែងថ្មី  អូមីក្រុង។ ​

នៅក្នុងរយៈពេលនៃការអនុវត្តវិធានការរដ្ឋបាល នៅក្នុងភូមិសាស្ត្រនៃខេត្តព្រះសីហនុ ប្រជាពលរដ្ឋ និងអាជីវ​ករ​ទាំងអស់ បានចូលរួមសហការបានយ៉ាងល្អជាមួយអាជ្ញាធរខេត្ត ធ្វើឱ្យអត្រានៃការឆ្លងរាលដាលជំងឺកូវីដ-១៩ នៅក្នុងខេត្តព្រះសីហនុមានការថយចុះជាលំដាប់។

ស្ថានភាពនៃការឆ្លងរាលដាលជំងឺកូវីដ-១៩ នៅក្នុងខេត្តមានការថយចុះនេះ  ដោយសាររដ្ឋបាលខេត្តបានចេញសេចក្តីណែនាំ ស្តីពីការអនុវត្តវិធានការសុវត្ថិភាពផ្នែកសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ នៅតាមផ្សារ ដែលមានលក្ខណៈប្រមូលផ្ដុំ ក្នុងភូមិសាស្ត្រខេត្តព្រះសីហនុ។ ហើយបន្ទាប់ពីទទួលបានការណែនាំរបស់រដ្ឋបាលខេត្ត ប្រជាពលរដ្ឋ និងអាជីវករនៅតាមទីផ្សារទាំងអស់ បានចូលរួម ធ្វើ ការរៀបចំ កែលម្អទីតាំងលក់ដូរឱ្យមានសណ្តាប់ធ្នាប់របៀបរៀបរយ មានសោភណភាព អនាម័យ និងគម្លាតសុវត្ថិភាពសង្គម កាត់បន្ថយការឆ្លងរាលដាលជំងឺកូវីដ១៩ រហូតមកទល់បច្ចុប្បន្ននេះ បងប្អូនប្រជាពលរដ្ឋ​​ និង​អាជីវករ បានបន្តការលក់ដូរនៅក្នុងស្ថានភាពល្អប្រសើរ​​ កាត់បន្ថយករណីឆ្លងកូវីដ១៩បានជាបន្តបន្ទាប់។

សូមជម្រាថា កន្លងមក ដោយការរីករាលដាលនៃជំងឺកូវីដ-១៩  នៅក្នុងខេត្តព្រះសីហនុ  ជាពិសេសការឆ្លងរាលដាលនៅតាមទីផ្សារនានា ដែលជាទីតាំងដែលមានការប្រមូលផ្តុំ  រដ្ឋបាលខេត្ត បានដាក់ចេញនូវវិធានការរដ្ឋបាលដោយបានសម្រេចបិទខ្ទប់ក្រុងព្រះសីហនុ  និងមួយផ្នែកនៃក្រុងស្រុកនានា  ព្រមទាំងចេញសេចក្តីសម្រេចបិទផ្អាកជាបណ្តោះអាសន្ននូវដំណើរការអាជីវកម្មទីផ្សារនៅទូទាំងខេត្ត  ដើម្បីទប់ស្កាត់ការរីករាលដាលនៃជំងឺកូវីដ-១៩ នៅក្នុងសហគមន៍។