ក្រុមគ្រួសារអ្នកគ្រូពេទ្យរងគ្រោះ Waraluk Supawatjariyakul ដែលបានស្លាប់ ដោយសារប៉ូលិសម្នាក់ ជិះម៉ូតូមិនគោរពច្បាប់ចរាចរណ៍ បើកក្នុងល្បឿនយ៉ាងលឿន បុកយ៉ាងពេញទំហឹង ខណៈអ្នកគ្រូកំពុងឆ្លងផ្លូវសម្រាប់ថ្មើរជើងមួយកន្លែង ក្នុងទីក្រុងបាងកក បានដាក់ពាក្យប្ដឹងកាលពីម្សិលមិញ ទាមទារសំណងចំនួន ៧២ លានបាត (ស្មើនឹង ២,២ លានដុល្លារអាមេរិក) ពីប៉ូលីសភូមិន្ទថៃរូបនេះ។
គួរបញ្ជាក់ថា Norawit Buadok ជាប៉ូលីសបង្ក បានជិះម៉ូតូ Ducati ដែលមិនបានចុះបញ្ជីបានបើកបុកអ្នកគ្រូពេទ្យ Waraluck រហូតបាត់បង់ជីវិត នៅពេលនាងឆ្លងកាត់ផ្លូវ Phaya Thai កាលពីវេលាម៉ោងប្រហែល ៣ រសៀល នៅថ្ងៃទី២១ ខែមករា ឆ្នាំ២០២២។
លោក Anirut Supawatjariyakul ដែលជាឪពុករបស់អ្នកគ្រូពេទ្យរងគ្រោះ Waraluck បាននិយាយថា គ្មានតម្លៃណាអាចដាក់លើជីវិតកូនស្រីរបស់គាត់បានឡើយ ប៉ុន្តែតួលេខនេះស្មើនឹង “ការវាយតម្លៃដំបូង” នៃការរួមចំណែកដ៏មានសក្តានុពលរបស់នាងចំពោះប្រទេសមួយនេះ។
តែទោះយ៉ាងណា តុលាការរដ្ឋប្បវេណីនឹងពិចារណាថា តើត្រូវទទួលយកពាក្យបណ្ដឹងនេះ ដោយកំណត់ថ្ងៃទី២០ ខែមេសា ឲ្យចុងចោទចូលខ្លួនដែរឬអត់នោះទេ។
បន្ទាប់មកលោក Anirut និងប្រពន្ធរបស់អ្នកស្រី Ratchanee Supawatjariyakul គ្រោងនឹងប្តឹងរដ្ឋបាលក្រុងបាងកក និងភ្នាក់ងារចំនួនពីរគឺ ការិយាល័យចរាចរណ៍ និងដឹកជញ្ជូន និងមជ្ឈមណ្ឌលសុវត្ថិភាពផ្លូវថ្នល់ ពីបទធ្វេសប្រហែសក្នុងការគ្រប់គ្រងសុវត្ថិភាពចរាចរណ៍។ ក្រុមគ្រួសាររបស់ពួកគាត់នឹងទាមទារចំនួនដូចគ្នា ខណៈពួកគេកំពុងទាមទារពី Norawit ៧២ លានបាត។
Waraluck បានស្លាប់នៅកន្លែងកើតហេតុកាលពីខែមុន នៅមុខមន្ទីរពេទ្យ Bhumirajanagarinda Kidney Institute ខណៈ Norawit រងរបួសស្រាលប៉ុណ្ណោះ។ ហើយម៉ូតូ Ducati Monster ដែលគាត់ជិះ ត្រូវបានគេរាយការណ៍ថា មិនមានកញ្ចក់ ឬស្លាកលេខនោះទេ៕ រក្សាសិទ្ធិដោយ៖ លឹម ហុង
