រាជធានីភ្នំពេញ ៖ គណបក្ស គណបក្សឆន្ទៈខ្មែរ និងគណបក្ស មាតុភូមិយើង ដែលជាគណបក្សនយោបាយ ទើបនឹងបង្កើតថ្មី បានចេញសេចក្តីថ្លែងការណ៍រួមមួយ ដោយបានថ្កោលទោសចលនាសង្គ្រោះជាតិ ដឹកនាំដោយលោក សម រង្ស៊ី និងការអំពាវនាវរបស់អតីតមេបក្សប្រឆាំង ដែលបានអំពាវនាវ ឲ្យប្រជាពលរដ្ឋ មិនទៅបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រដែលនឹងប្រព្រឹត្តទៅនាថ្ងៃទី២៩ ខែកក្កដា ឆ្នាំ២០១៨ ខាងមុខនេះ ។
គណបក្ស គណបក្សឆន្ទៈខ្មែរ ដែលមានលោក គង់ មុនីកា កូនប្រុសពៅលោក គង់ គាំ អតីតមន្ត្រីជាន់ខ្ពស់មួយរូបរបស់អតីតគណបក្សប្រឆាំងជាប្រធាន និង គណបក្ស មាតុភូមិយើង គឺលោកច័ន្ទ ប៊ុនហេង ជាប្រធាន។
សេចក្តីថ្លែងការណ៍រួមដែលចុះហត្ថលេខាដោយលោក គង់ មុនីកា និងលោក ច័ន្ទ ប៊ុនហន បានបញ្ជាក់ថា ៖ គណបក្សឆន្ទៈខ្មែរ និងគណបក្សមាតុភូមិយើង ថ្កោលទោសចលនាសង្គ្រោះជាតិដឹកនាំដោយលោក សម រង្ស៊ី និងគោលបំណងចែកខិត្តប័ណ្ណ ព្រមទាំងអំពាវនាវឲ្យប្រជាពលរដ្ឋមិនទៅបោះឆ្នោត ហើយញុះញង់ឲ្យបង្កើតព្រឹត្តិការណ៍ និងការឆាចោលលទ្ធផលបោះឆ្នោតខាងមុខទាំងគ្មានហេតុផល គឺសុទ្ធតែជាគំនិតអាត្មានិយមជ្រុល របស់ក្រុមជនល្មោភអំណាចតាមអំពើហិង្សាជាបន្តបន្ទាប់ជាប់មិនដាច់ ដែលបណ្តាលឲ្យប្រជាពលរដ្ឋ សកម្មជន កម្មកររងគ្រោះគ្រប់យ៉ាង មានជាប់គុក និងស្លាប់បាត់បង់ជីវិតជំនួសពួកគេជាហូរហែ ។
សេចក្តីថ្លែងការណ៍ថ្កោលទោសរបស់គណបក្សទាំងពីរនេះ បានធ្វើឡើងបន្ទាប់ពី លោក សម រង្ស៊ី បានអំពាវនាវឱ្យចែកចាយខិត្តប័ណ្ណ ដោយអំពាវនាវកុំឱ្យប្រជាពលរដ្ឋ ទៅបោះឆ្នោតជ្រើសតាំងតំណាងរាស្ត្រអាណត្តិទី៦ នាចុងខែកក្កដា ឆ្នាំ២០១៨ ខាងមុខនេះ។
សេចក្តីថ្លែងការណ៍របស់គណបក្សឆន្ទៈខ្មែរ និងគណបក្សមាតុភូមិយើង បានបញ្ជាក់យ៉ាងដូច្នេះថា៖ គណបក្សយើងខ្ញុំ ថ្កោលទោសអំពើខ្វះការទទួលខុសត្រូវ មូលបង្កាច់ បន្ទាបបន្ថោកសិទ្ធិនយោបាយ និងសិទ្ធិពលរដ្ឋ ដែលក្រោយកិច្ចព្រមព្រៀងទីក្រុងប៉ារីស និងក្រោមរដ្ឋធម្មនុញ្ញនៃព្រះរាជាណាចក្រកម្ពុជា បានគាំទ្រ និងលើកកម្ពស់លទ្ធិប្រជាធិបតេយ្យ ស្ថិរភាព សន្តិភាព និងការអភិវឌ្ឍសម្រាប់ប្រទេស និងប្រជាពលរដ្ឋ គ្រប់កាលទេសៈ។
ជាអ្នកនយោបាយ និងប្រជាពលរដ្ឋខ្មែរនៅក្នុងប្រទេសយ៉ាងទូលំទូលាយ បដិសេធទាំងស្រុងចំពោះការប្រមាថ និងផែនការខ្មៅងងឹតរបស់លោក សម រង្ស៊ី និងក្រុមស្រេកឃ្លានអំណាចតាមអំពើហិង្សា ស្រេកឃ្លានសោកនាកម្ម និងវិនាសកម្មចំពោះប្រទេសកម្ពុជា និងប្រជាពលរដ្ឋខ្មែរ ដើម្បីតែខ្លួនឯង និងក្រុមខ្លួន។
សូមសាធារណជនមតិជាតិ-អន្តរជាតិ ស្ថិតនៅឱ្យឆ្ងាយពីគំនិត និងគម្រោងញុះញង់របស់ លោក សម រង្ស៊ី និងបក្ខពួក ហើយសូមចូលរួមចៀសវាង និងរារាំងភាពឧត្បាតចង្រៃនេះកុំឱ្យកើតមានឱ្យសោះ។
ពាក់ព័ន្ធនឹងការចុះឈ្មោះបោះឆ្នោតនេះផងដែរ គណបក្សភ្លើងទៀន ដែលជាអតីតគណបក្ស សម រង្ស៊ី ដែលជាស្ថាបនិកគណបក្សសង្គ្រោះជាតិ បានចេញសេចក្តីថ្លែងការណ៍មួយ ដោយប្រកាសថានឹងមិនចូលរួមការ បោះឆ្នោតជ្រើសតាំងតំណាងរាស្ត្រី នីតិកាលទី៦ ដែលនឹងប្រព្រឹត្តឡើងនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះទេ។ នេះបើយោងតាមសេចក្តីថ្លែងការណ៍របស់គណបក្សភ្លើងទៀន នៅរសៀលថ្ងៃទី៣ ខែឧសភា ឆ្នាំ២០១៨នេះ បានទាមទារឱ្យមានការដោះស្រាយវិបត្តិនយោបាយ ដើម្បីធានាឱ្យមានការបោះឆ្នោតដោយសេរី ត្រឹមត្រូវ និងយុត្តិធម៌ ដែលឆ្លុះបញ្ចាំងពីឆន្ទៈរបស់ប្រជាពរដ្ឋខ្មែរ។
ទោះបីជាគណបក្សភ្លើងទៀន ប្រកាសមិនចូលរួមការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ក៏នៅពេលមានគណបក្សនយោបាយជាច្រើនទៀត បានប្រកាសចូលរួមការបោះឆ្នោតនៅចុងខែកក្កដាខាងមុខនេះផងដែរ។
រហូតមកដល់ពេលនេះ មានគណបក្សនយោបាយចំនួន៣ហើយ បានចុះបញ្ជីឈរឈ្មោះបោះឆ្នោត និងបញ្ជីបេក្ខជនឈរឈ្មោះជូនគ.ជ.ប ខណៈគណបក្សនយោបាយចំនួន១៦ ផ្សេងទៀត បានមកទទួលពាក្យសុំចុះបញ្ជីឈ្មោះ។ គណបក្សនយោបាយទាំង៣ ដែលបានចុះបញ្ជីរួចរួមមាន៖ គណបក្សយុវជនកម្ពុជា, គណបក្សប្រជាជនកម្ពុជា និងគណបក្សសញ្ជាតិកម្ពុជា។
អ្នកនាំពាក្យ គណៈកម្មាធិការជាតិរៀបចំការបោះឆ្នោត ឱ្យដឹងថា ការបោះឆ្នោតជ្រើសតាំងតំណាងរាស្ត្រ នីតិកាលទី៦ នាពេលនេះ នឹងមានគណបក្សនយោបាយជាច្រើន បានចុះឈ្មោះបោះឆ្នោតច្រើនជាងអាណត្តិមុនផងដែរ។
ចំណែក លោកម៊ុត ចន្ថា នាយកខុទ្ទកាល័យលោកកឹមសុខា បានបញ្ជាកថា គណបក្សភ្លើងទៀន ដែលប្តូរមកពីគណបក្ស សម រង្ស៊ី បានសម្រេចមិនចូលរួមក្នុងការបោះឆ្នោត នៅទី២៩ ខែកក្កដា ឆ្នាំ២០១៨ ដោយទាមទារឲ្យមានដំណោះស្រាយ។
គណបក្ស សម រង្ស៊ី ជាដៃគូជាមួយគណបក្សសិទ្ធិមនុស្ស ដែលបានរួមគ្នាបង្កើតគណបក្សសង្គ្រោះជាតិ នៅឆ្នាំ២០១២។ គណបក្សសិទ្ធិមនុស្ស បានប្រកាសរំលាយខ្លួនឯង កាលពីថ្ងៃទី២៨ ខែកមរា ឆ្នាំ២០១៨។
លោកបន្តថា ដោយឡែក គណបក្សសង្គ្រោះជាតិ បានចេញសេចក្តីថ្លែងការណ៍មួយ កាលពីថ្ងៃទី២ ខែឧសភា ឆ្នាំ២០១៨ ដោយបានបញ្ជាក់ជំហរដោយបន្តគោរពតាមឆន្ទៈរបស់ប្រជាពលរដ្ឋម្ចាស់ឆ្នោត។ សូមបញ្ជាក់ថា គណបក្សសង្គ្រោះជាតិ ត្រូវបានក្រសួងមហាផ្ទៃ ចេញលិខិតរំលាយមិនមានឈ្មោះ រួមនឹងតំណាងរាស្ត្រនៅក្នុងបញ្ជីគណបក្សនយោបាយ ក្នុងក្រសួងមហាផ្ទៃទៀតនោះ ប៉ុន្តែអតីតតំណារាស្ត្រ នៃបក្សមួយនេះ នៅតែប្រើ និងប្រកាន់គោលជំហររបស់ខ្លួនថា គណបក្សសង្គ្រោះជាតិ នៅតែមានជីវិតក្នុងឆាកនយោបាយដដែល៕ ដោយ ៖ បញ្ញាស័ក្តិ
