កងកម្លាំងរុស្ស៊ីបានឆ្លងកាត់ព្រំដែនអ៊ុយក្រែន កាលពីថ្ងៃព្រហស្បតិ៍ ហើយបានបើកការវាយប្រហារយ៉ាងសាហាវតែម្តង។ ហើយឥឡូវនេះ ពួកគេកំពុងនៅជិតរដ្ឋធានី Kyiv។
តែទោះជាយ៉ាងណា នៅពេលដែលឃើញទាហានរុស្ស៊ីឆ្លងកាត់ព្រំដែនអ៊ុយក្រែន ហើយចូលលុកលុយតាមដងផ្លូវ ប្រជាជនអ៊ុយក្រែនបានចាប់ផ្តើមធ្វើការតវ៉ាយ៉ាងផុសផុល នៅទូទាំងពិភពលោក ដើម្បីបរិហារពីការឈ្លានពានមួយនេះ។ ពិតណាស់ ពីតូក្យូទៅញូវយ៉ក ការតវ៉ាត្រូវបានរៀបចំនៅខាងក្រៅស្ថានទូតរុស្ស៊ី និងទីសាធារណៈ។
ប៉ុន្តែ អ្វីដែលមិននឹកស្មានដល់នោះ គឺនៅលើបណ្តាញសង្គម ពិតជាមានការចាប់អារម្មណ៍ខ្លាំងតែម្តង ខណៈដែលគេបានឃើញស្ត្រីជនជាតិអ៊ុយក្រែនម្នាក់បានប្រឈមមុខនឹងទាហានរុស្ស៊ីដោយ “គ្មានការភ័យខ្លាច” អ្វីសោះឡើយ ដើម្បីនិយាយឲ្យដឹងខុសត្រូវ នូវអ្វីដែលពួកគេកំពុងធ្វើនៅក្នុងប្រទេសរបស់នាងដែលធ្វើឲ្យមនុស្សជាច្រើននៅលើ Twitter និងវេទិកាប្រព័ន្ធផ្សព្វផ្សាយសង្គមផ្សេងទៀត សម្តែងនូវការកោតសរសើរជាខ្លាំង។
ក្នុងឃ្លីបខ្លី ស្ត្រីដ៏ក្លាហានរូបនោះ បានសួរទាហានប្រដាប់អាវុធម្នាក់នោះជាលើកដំបូងថា៖ «អ្នកជានរណា? ទាហានឆ្លើយថា យើងមានលំហាត់នៅទីនេះ។ សូមទៅតាមផ្លូវនេះ»។ នៅពេលនាងដឹងថា ពួកគេជាទាហានរុស្ស៊ី ស្ត្រីនៅទីក្រុងកំពង់ផែ Henichesk បាននិយាយថា “តើអ្នកឯងកំពុងធ្វើអ្វីនៅទីនេះ?”។
ទាហានដែលមានកាំភ្លើងយន្តធំ បានព្យាយាមធ្វើឲ្យស្ត្រីនោះស្ងប់ស្ងាត់ដោយនិយាយថា «ការពិភាក្សារបស់យើងនឹងមិនមានអ្វីកើតឡើងឡើយ»។ ប៉ុន្តែស្ត្រីនោះហាក់ដូចជាមិនភ័យខ្លាច ហើយនិយាយជំនួសវិញថា “អ្នកឯងជាអ្នកកាន់កាប់ អ្នកឯងជាពួកហ្វាស៊ីស! តើអ្នកឯងកំពុងធ្វើអ្វីឆ្កូតឡប់នៅលើទឹកដីរបស់យើង ជាមួយនឹងកាំភ្លើងទាំងអស់នេះ? យកគ្រាប់ពូជទាំងនេះដាក់ក្នុងហោប៉ៅរបស់អ្នកឯង ក្រែងលោពួកអ្នកឯងរាល់គ្នាស្លាប់ វានឹងដុះនៅលើទឹកដីនេះ»។
គួរបញ្ជាក់ថា វីដេអូនេះត្រូវបានថតដោយមនុស្សម្នាក់ធ្វើដំណើរឆ្លងកាត់ និងបន្ទាប់មក ក៏បានបង្ហោះនៅលើបណ្តាញសង្គម៕ រក្សាសិទ្ធិដោយ៖ លឹម ហុង
