តារាល្បីឈ្មោះ Mor Pla នៅប្រទេសថៃ ដែលល្បីខាងលាតត្រដាងព្រះសង្ឃក្លែងក្លាយ បានបញ្ចេញរឿងថ្មីមួយដ៏ហួសចិត្ត ទាក់ទងស្រ្តីម្នាក់ បានក្លែងខ្លួនជាព្រះសង្ឃ រកចំណូលបានមិនចេះតិចរាប់លានបាតពីអ្នកភូមិដែលមានជំនឿដ៏ងប់ងល់ព្រោះតែគ្មានវិស័យផ្លូវការណាមួយ រួមទាំងការិយាល័យជាតិនៃព្រះពុទ្ធសាសនា (ONAB) ចាត់វិធានការនោះទេ។
លោក Mor Pla បានប្រាប់ឲ្យដឹងថា គាត់បានទទួលពាក្យបណ្តឹងពីអ្នកភូមិ អំពីស្ត្រីម្នាក់អាយុប្រហែល ៥០ ឆ្នាំ ធ្វើជាព្រះសង្ឃ ដោយស្ត្រីនោះកោរសក់ ហើយពាក់អាវពណ៌ទឹកក្រូច។ សកម្មភាពប្រចាំថ្ងៃសំខាន់ៗរបស់គាត់ រួមមានការប្រគេនពរជ័យដល់អ្នកភូមិ ដែលព្រះសង្ឃក្លែងក្លាយរូបនេះអះអាងថា ពួកគេសុទ្ធតែមានសំណាងអាក្រក់។
ព្រះសង្ឃក្លែងក្លាយជាស្រ្តីរូបនេះ មានទីតាំងនៅស្រុក Non Thai ខេត្ត Nakhon Ratchasima។ រឿងនេះត្រូវបានបែកធ្លាយគឺបន្ទាប់សមាជិកគ្រួសារមួយបានទាក់ទងលោក Mor Pla ដោយប្រាប់ថា មានព្រះសង្ឃក្លែងក្លាយម្នាក់ ដែលតាមពិតជាស្ត្រីដោយបានអះអាងថា គាត់ជាវិញ្ញាណរបស់ព្រះសង្ឃថៃដ៏ល្បីមួយអង្គ។
ក្រុមគ្រួសារនោះបានទៅជួបស្ត្រីជាសង្ឃក្លែងក្លាយនេះ ហើយត្រូវបានប្រាប់ថា មានមនុស្សក្នុងគ្រួសារបានសម្លាប់មនុស្សម្នាក់ ហើយត្រូវព្រលឹងខ្មោចតាមលង។ តែទោះជាយ៉ាងណា កូនប្រុសម្នាក់បានសម្រេចចិត្តទាក់ទងទៅតារាល្បីរូបនេះ ខណៈដែលឪពុកម្តាយរបស់គាត់នៅតែជឿជាក់លើការអះអាងរបស់ព្រះសង្ឃក្លែងក្លាយរូបនេះ បើទោះជាពួកគេបានចំណាយប្រាក់យ៉ាងច្រើនជាមួយនឹងគ្រឿងអលង្ការមាសរួចហើយក៏ដោយ។
ក្រោយរឿងនេះកើតឡើង មេធាវីម្នាក់ និងភរិយារបស់គាត់ ក៏បានចុះទៅជួបផ្ទាល់ស្រ្តីជាព្រះសង្ឃក្លែងក្លាយ ដោយពួកគាត់រៀបចំខ្លួនជាអ្នកភូមិធម្មតា។ ពិតណាស់ ព្រះសង្ឃស្រីរូបនេះ នឹងនិយាយជាមួយអ្នកដែលមើលទៅដូចជាមានលុយ ហើយចាប់ផ្តើមអះអាងថា ពួកគេមានសំណាងអាក្រក់ហើយសុំលុយ ១០,០០០ បាតជាថ្នូរនឹងផ្តល់ពរជ័យឱ្យពួកគេមានលាភសំណាង ឬជួយជួសជុលសំណាងអាក្រក់ទៅថ្ងៃអនាគត។ ស្ត្រីរូបនេះបានធ្វើបែបនេះប្រមាណ១០ឆ្នាំមកហើយជាមួយជនរងគ្រោះជាច្រើននាក់។ នាងមិនបង្ហាញការសោកស្ដាយចំពោះទង្វើរបស់នាងឡើយ។
ONAB បញ្ជាក់ថា គ្មានអ្វីដែលការិយាល័យអាចធ្វើបានទេ ព្រោះស្ត្រីនោះមិនមែនជាព្រះសង្ឃទេ។ គួរបញ្ជាក់ថា មានជនរងគ្រោះជាច្រើននាក់ទៀត ដែលបានលង់ក្នុងការទាមទាររបស់គាត់ ដោយពួកគេបានចំណាយប្រាក់យ៉ាងច្រើន ដើម្បីទទួលពរជ័យហើយជនរងគ្រោះសំខាន់ៗរបស់ស្រ្តីជាសង្ឃក្លែងក្លាយនេះ គឺជាមនុស្សចាស់ៗ ដោយសារពួកគេមានជំនឿខ្លាំង ទាក់ទងនឹងកត្តាវប្បធម៌៕ រក្សាសិទ្ធិដោយ៖ លឹម ហុង
