ទីក្រុងសេអ៊ូល៖ ក្រសួងការបរទេសរបស់ទីក្រុងសេអ៊ូល បាននិយាយកាលពីថ្ងៃចន្ទ ថា ប្រទេសកូរ៉េខាងត្បូងនឹង រឹតបន្តឹងការនាំចេញប្រឆាំងនឹងរុស្ស៊ីដោយការហាមឃាត់ការនាំចេញទំនិញយុទ្ធសាស្ត្រ និងចូលរួមជាមួយវិធានការរបស់បណ្តាប្រទេសលោកខាងលិចក្នុងការរារាំងធនាគាររុស្ស៊ីមួយចំនួនពីប្រព័ន្ធទូទាត់អន្តរជាតិSWIFT ។
ក្រសួងការបរទេសកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា “រដ្ឋាភិបាលកូរ៉េបានថ្កោលទោសការលុកលុយដោយប្រដាប់អាវុធរបស់រុស្ស៊ីមកលើអ៊ុយក្រែន ហើយក្នុងនាមជាសមាជិកដែលមានទំនួលខុសត្រូវនៃសហគមន៍អន្តរជាតិ បានសម្រេចចិត្តចូលរួមយ៉ាងសកម្មក្នុងកិច្ចខិតខំប្រឹងប្រែងរបស់សហគមន៍អន្តរជាតិ រួមទាំងការដាក់ទណ្ឌកម្មសេដ្ឋកិច្ច សម្រាប់ដំណោះស្រាយដោយសន្តិវិធីនៃស្ថានភាព” ។
ក្នុងចំណោមទំនិញយុទ្ធសាស្ត្រដែលនឹងត្រូវបានគ្រប់គ្រងរួមមានការផ្គត់ផ្គង់គ្រឿងអេឡិចត្រូនិក កុំព្យូទ័រ ព័ត៌មាន និងទំនាក់ទំនង ឧបករណ៍ចាប់សញ្ញា និងឡាស៊ែរ ការរុករក និងអាកាសចរណ៍ និងឧបករណ៍សមុទ្រ និងអវកាស។ ធនាគារឈានមុខគេចំនួន០២ នៅក្នុងប្រទេសកូរ៉េខាងត្បូងបានបញ្ជាក់កាលពីថ្ងៃចន្ទថា ខណៈពេលដែលពួកគេមិនទាន់ទទួលបានការណែនាំជាក់លាក់ពី SWIFT ដែលជាប្រព័ន្ធទូទាត់អន្តរធនាគារពួកគេ បានបញ្ឈប់ការផ្តល់ហិរញ្ញប្បទានពាណិជ្ជកម្មជាមួយធនាគាររុស្ស៊ីយ៉ាងហោចណាស់ចំនួន០៧។
ធនាគារ Shinhan របស់កូរ៉េខាងត្បូង និងអ្នកផ្តល់ប្រាក់កម្ចីឈានមុខគេមួយរូបផ្សេងទៀតបាននិយាយថា ពួកគេបានបញ្ឈប់ការចេញលិខិតឥណទាន និងហិរញ្ញប្បទានពាណិជ្ជកម្មផ្សេងទៀតទៅកាន់ PSB, VEB, VTB, Bank Otkritie, Novikombank, Sovcombank និង Sberbank ។ ធនាគារកូរ៉េទីពីរបដិសេធមិនត្រូវបានគេកំណត់អត្តសញ្ញាណទេ ដោយសារតែមានភាពរសើបនៃបញ្ហានេះ។
លោក Jeong Min-hyeon សេដ្ឋវិទូដែលជាអ្នកជំនាញផ្នែករុស្សីនិងអឺរ៉ុបនៅវិទ្យាស្ថានកូរ៉េសម្រាប់គោលនយោបាយសេដ្ឋកិច្ចអន្តរជាតិបាននិយាយថា “ការទប់ស្កាត់ SWIFT នឹងប៉ះពាល់យ៉ាងធ្ងន់ធ្ងរដល់ហិរញ្ញប្បទានពាណិជ្ជកម្ម បើទោះបីជាការនាំចូលឧស្ម័នធម្មជាតិ និងប្រេងរបស់កូរ៉េខាងត្បូងសរុបពីរុស្ស៊ីមិនមានទំហំធំនោះទេ គឺប្រហែល 5-10%” នៃចំនួនសរុប។ ។ “ការលំបាកគឺអ្នកទិញរបស់កូរ៉េខាងត្បូងលើទំនិញរុស្ស៊ី និងអ្នកនាំចេញផ្សេងទៀតរងភាពលំបាកលើការទូទាត់ដែលអាចនាំឱ្យមានការរំខានដល់ការផ្គត់ផ្គង់ និងការកើនឡើងតម្លៃ”។
នៅក្នុងសេចក្តីថ្លែងការណ៍របស់ខ្លួន ក្រសួងការបរទេសកូរ៉េ ក៏បាននិយាយផងដែរថា រដ្ឋាភិបាលកូរ៉េ បានសម្រេចចិត្តជំរុញការនាំចេញបន្ថែមនៃទុនបម្រុងប្រេងយុទ្ធសាស្ត្រសម្រាប់ស្ថេរភាពនៃទីផ្សារថាមពលអន្តរជាតិ និងដើម្បីពិនិត្យមើលបន្ថែមទៀតនូវវិធានការផ្សេងទៀតដូចជាការលក់ឡើងវិញនូវឧស្ម័នធម្មជាតិរាវ (LNG) ទៅកាន់អឺរ៉ុប។
ក្រសួងបាននិយាយបន្ថែមថា កូរ៉េខាងត្បូងនឹងលើកកម្ពស់ជំនួយមនុស្សធម៌ដល់អ៊ុយក្រែន ដោយនិយាយថាការសម្រេចចិត្តរបស់ខ្លួនត្រូវបានជូនដំណឹងជាផ្លូវការដល់រដ្ឋាភិបាលសហរដ្ឋអាមេរិកតាមរយៈបណ្តាញការទូត៕
