ភ្នំពេញ៖ នៅក្នុងឱកាសនៃថ្ងៃបើកបវេសនកាលឆ្នាំសិក្សា ២០១៧-២០១៨ នាថ្ងៃទី១ ខែវិច្ឆិកា ឆ្នាំ២០១៧នេះ សម្តេចតេជោ ហ៊ុន សែននាយករដ្ឋមន្ត្រីកម្ពុជា បានចេញសារលិខិតផ្តាំផ្ញើដល់សិស្សានុសិស្សទូទាំងប្រទេស ត្រូវខិតខំសិក្សារៀនសូត្រ ក្រេបជញ្ជក់ចំណេះដឹង ដើម្បីបានជាពន្លឺនៃសុភមង្គលជីវិតទៅថ្ងៃអនាគត។ ចំណេះដឹង គឺជាទ្រព្យសម្បត្តិ ដែលពុំមាននរណាម្នាក់ ដណ្តើមឬលួច យកបានឡើយ។
សម្តេចតេជោ បានបញ្ជាក់ថា “សិស្សានុសិស្សខិតខំរៀនសូត្រ និងប្រតិបត្តិខ្លួនឲ្យក្លាយជាកូនល្អ សិស្សល្អ មិត្តល្អ និងពលរដ្ឋល្អក្នុងសង្គម។ ទន្ទឹមនឹងនោះដែរ សម្តេចតេជោ បានផ្តាំផ្ញើសិស្សានុសិស្សត្រូវចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗ ។ សូមអរគុណលោកឪពុកអ្នកម្តាយ អាណាព្យាបាលសិស្ស ដែលផ្តល់ឱកាសឲ្យកូនចៅ បានសិក្សារៀនសូត្រ និង សូមអរគុណដល់លោកគ្រូ អ្នកគ្រូ ដែលបានយកចិត្តទុកដាក់បង្ហាត់បង្រៀន ផ្តល់ចំណេះដឹង ដល់កុលបុត្រខ្មែរគ្រប់រូប ឲ្យទទួលបានចំណេះដឹង ចំណេះធ្វើ និងជំនាញពិតប្រាកដក្នុងជីវិត”។
ថ្ងៃបើកបវេសនកាល នាថ្ងៃទី១ខែវិច្ឆិកាឆ្នាំ២០១៧នេះ គឺជាថ្ងៃបង្ហាញនូវឆន្ទៈមោះមុត និងបុព្វហេតុយកចិត្តទុកដាក់លើកកម្ពស់វិស័យអប់រំ ពិសេសជំរុញការកសាងធនធានមនុស្ស ឲ្យប្រកបដោយគុណភាព។ការអប់រំល្អនឹងផ្តល់អត្ថប្រយោជន៍យ៉ាងធំធេងដល់បុគ្គល គ្រួសារ និងសង្គមជាតិទាំងមូល ព្រមទាំងទាក់ទាញការវិនិយោគ ធុរកិច្ច បន្ថែមទៀត ពោលការអប់រំល្អនឹងនាំដល់ការផ្គត់ផ្គង់ធនធានមនុស្ស កម្លាំងពលកម្មដែលមានចំណេះដឹង ជំនាញវិជ្ជាជីវៈឆ្លើយតបកាន់តែមានប្រសិទ្ធភាព ទៅនឹងទីផ្សារការងារ និងតម្រូវការអភិវឌ្ឍសង្គមជាតិ។ សង្គមជាតិមួយអាចរីកចម្រើន អាស្រ័យដោយសង្គមជាតិនោះសម្បូរដោយធនធានមនុស្សប្រកបដោយសក្តានុពល សមត្ថភាពដែលអាចប្រែក្លាយសង្គមជាតិនោះ ឲ្យមានការអភិវឌ្ឍន៍ជឿនលឿនបានយ៉ាងឆាប់រហ័ស និងមានភាពកាន់តែរឹងមាំ។ ការអប់រំល្អគឺជាកូនសោសម្រាប់ដោះស្រាយរាល់បញ្ហាសង្គម និងសេដ្ឋកិច្ចជាតិ ។ ក្នុងយុគសម័យសេដ្ឋកិច្ចនិងបច្ចេកវិទ្យាព័ត៌មាន នេះឧត្តមភាពប្រកួតប្រជែងកាន់តែមានសារសំខាន់នៅលើកត្តាធនធានមនុស្ស ដែលមានចំណេះដឹង ចំណេះធ្វើទូលំទូលាយ មានភាពច្នៃប្រឌិតខ្ពស់ និងមានជំនាញច្បាស់លាស់។ ប្រការនេះតម្រូវឲ្យរាជរដ្ឋាភិបាលត្រូវបន្តផ្តោតការយកចិត្តទុកដាក់កាន់តែខ្លាំងឡើងៗ ទៅលើ
ការអភិវឌ្ឍ មូលធនមនុស្សនេះ ដើម្បីធ្វើឲ្យមុតស្រួចក្នុងការទ្រទ្រង់ដល់កំណើនសេដ្ឋកិច្ចកម្ពុជាឆាប់រហ័ស ទាំងក្នុងពេលបច្ចុប្បន្ននិងទៅអនាគត។ កម្ពុជាក៏មានចក្ខុវិស័យច្បាស់លាស់ ក្នុងការបណ្តុះបណ្តាលធនធានមនុស្ស ក្នុងគោលដៅឆ្ពោះទៅកាន់សង្គមពុទ្ធិ និងវិបុសភាព ប្រជាជនមានចំណេះដឹង មានវប្បធម៌ជ្រៅជ្រះ មានផលិតភាព និងភាពប្រកួតប្រជែង ខ្ពស់នៅក្នុងប្រព័ន្ធសេដ្ឋកិច្ចសកលភាវូបនីយកម្ម ដោយឆ្លើយតបយ៉ាងសមស្រប និងទាន់ពេលវេលាទៅនឹងគោលនយោបាយ របស់រាជរដ្ឋាភិបាលនិងសេចក្តីត្រូវការរបស់ប្រទេសជាតិ ជាពិសេសក្នុងពេលដែលកម្ពុជា មានចក្ខុវិស័យប្រែក្លាយពីប្រទេសដែលមានប្រាក់ចំណូលមធ្យមកម្រិតទាប នាពេលបច្ចុប្បន្នទៅជាប្រទេសដែលមានប្រាក់ចំណូលមធ្យមកម្រិតខ្ពស់ នាឆ្នាំ២០៣០និងក្លាយទៅជាប្រទេសមានចំណូលខ្ពស់នាឆ្នាំ២០៥០ខាងមុខ។
សម្តេចតេជោ នាយករដ្ឋមន្ត្រី បានថ្លែងបន្តថា រាជរដ្ឋាភិបាលបានប្តេជ្ញាហើយថា នឹងបន្តលើកកម្ពស់គោលការណ៍ ការអប់រំប្រកបដោយចីរភាព តាមរយៈការធានាឲ្យបាននូវលទ្ធភាពទទួលបានសេវាអប់រំប្រកបដោយសមធម៌ ដែលផ្តល់ឱកាសស្នើៗគ្នា ដល់កុមារ និងយុវជនកម្ពុជា ទាំងអស់ ជាពិសេសនៅតាមតំបន់ជនបទដាច់ស្រយាល និងនៅតាមតំបន់ព្រំដែនឲ្យទទួលការអប់រំជាមូលដ្ឋាន ទាំងក្នុងប្រព័ន្ធនិងក្រៅប្រព័ន្ធ។ កិច្ចការនេះអនឹងត្រូវពង្រឹងនិងពង្រីកជាបន្តបន្ទាប់ពីព្រោះការសិក្សារៀនសូត្រ គឺជារៀង
ដែលត្រូវធ្វើគ្មានទីបញ្ចប់។ ដូច្នេះ យើងទាំងអស់គ្នាត្រូវចូលរួមជំរុញឲ្យមានការអប់រំ បណ្តុះបណ្តាលឲ្យកាន់តែខ្ពស់ ដោយមិនត្រូវអនុញ្ញាតឲ្យកូនចៅណាម្នាក់ ស្ថិតនៅក្រៅសេវាអប់រំនោះឡើយ។ រាជរដ្ឋាភិបាលមានការប្តេជ្ញាចិត្តខ្ពស់ ក្នុងការខិតខំពុះពារបន្តដោះស្រាយរាល់ចំណុចសេសសល់ និងសំណូមពរនានា ក្នុងបុព្វហេតុលើកកម្ពស់វិស័យអប់រំ ទាំងអ្នកសិក្សានិងគ្រូបង្រៀនប្រកបដោយគុណភាព និងប្រសិទ្ធភាព ស្រមតាមនិន្នាការរីកចម្រើន និងបទដ្ឋានអប់រំ ទាំងក្នុងតំបន់ និងពិភពលោក។ យើងក៏ត្រូវប្រមូលកម្លាំងនិងធនធានសរុបពីគ្រប់អ្នកពាក់ព័ន្ធទាំងអស់ ដើម្បីរួមគ្នាគាំទ្រលើកកម្ពស់វិស័យអប់រំជាតិ ដោយមិនឲ្យនរណាម្នាក់នៅក្រៅសេវាអប់រំ និងត្រូវបណ្តុះបណ្តាលកូនចៅជាយុវជនជំនាន់ក្រោយឲ្យក្លាយជាមូលធនមនុស្ស ដែលពោរពេញដោយសមត្ថភាព ជំនាញខ្ពស់គ្រប់ៗគ្នា និប្រកបដោយសក្តានុពល៕ ដោយ៖ជាលី
