បងប្អូនប្រុសស្រីបង្កើតចំនួន ៤ នាក់ រស់នៅទីក្រុង Greenfield រដ្ឋ Wisconsin សហរដ្ឋអាមេរិក កាលពីពេលថ្មីៗនេះ បានឈ្នះកំណត់ត្រាពិភពលោកហ្គីណេស ជាមួយនឹងអាយុរួមគ្នា ៣៨៥ ឆ្នាំ ដែលក្នុងនោះអាយុចាស់ជាងគេគឺ ១០០ ឆ្នាំ។
លោកយាយ Gerry Bulger អាយុ ១០០ ឆ្នាំដែលចាស់ជាងគេក្នុងគ្រួសារពិតជារីករាយជាខ្លាំងដែលបានទទួលកិត្តិយសនេះ ដោយគាត់បាននិយាយថា “ខ្ញុំមិនអាចរង់ចាំមើលសៀវភៅកំណត់ត្រាពិភពលោកដែលមានឈ្មោះរបស់ពួកយើងនៅលើនោះបានទៀតទេ។ វាពិតជាអស្ចារ្យណាស់។ លោកយាយ Gerry ក៏បានបញ្ជាក់ឲ្យដឹងថា «យើងទាំងអស់គ្នាមានសុខភាពល្អដូចគ្នា»។
លោកយាយ Gerry មានប្អូនៗបង្កើត៣នាក់គឺ Marjorie Gilmartin អាយុ ៩៧ ឆ្នាំ, Robert Goebel អាយុ ៩៥ ឆ្នាំ និង Richard Goebel អាយុ ៩៣ ឆ្នាំ។
ទន្ទឹមនេះផងដែរ កូនស្រីរបស់គាត់ អ្នកស្រី Ginny Bulger Cowan បានចែករំលែកថា អាថ៌កំបាំងមួយក្នុងការជួយម្តាយ និងពូមីងទាំង៣នាក់របស់គាត់ ឱ្យមានអាយុវែង គឺការមានសុទិដ្ឋិនិយម និងតែងតែសប្បាយរីករាយក្នុងជីវិត។
អ្នកស្រី Ginny បាននិយាយថា «រាល់ការជួបជុំគ្រួសារ គឺជាពេលវេលាដ៏រីករាយ និងសើចច្រើន។ ម្តាយរបស់ខ្ញុំ គាត់ជាមនុស្សសុទិដ្ឋិនិយមខ្លាំងណាស់ ដែលស្រលាញ់ជីវិត»៕ រក្សាសិទ្ធិដោយ៖ លឹម ហុង
