កាលពីម្សិលមិញនេះ ថ្ងៃទី១១ ខែមីនា ឆ្នាំ២០២២ រឿងរ៉ាវមួយទាក់ទងកម្មករសំណង់មួយក្រុម នៅក្នុងភូមិស្វាយធំ ឃុំគ្រាងអំពិល សង្កាត់កំពង់បាយ ខេត្តកំពត សម្លាប់សត្វឆ្កែ Husky ស្អាតៗទាំងមេ ទាំងកូនចំនួន៣ក្បាល ដើម្បីធ្វើម្ហូប ដែលធ្វើឲ្យម្ចាស់ឆ្កែស្រែកទ្រោយំស្ទើរសន្លប់ ព្រោះតែគាត់ស្រឡាញ់ឆ្កែចាត់ទុកដូចកូន ឃើញថាបានធ្វើឲ្យមហាជនផ្ទុះកំហឹងយ៉ាងខ្លាំងតែម្តង នៅលើបណ្តាញសង្គម។
ទន្ទឹមនឹងនេះផងដែរ ម្ចាស់ឆ្កែដែលមានគណនីហ្វេសប៊ុកឈ្មោះ សំអាងការ ស្រីម៉ៅមង្គល ក៏បានឲ្យដឹងផងដែរថា គាត់មិនចង់បានអ្វីពីក្រុមសម្លាប់ឆ្កែរបស់គាត់ទាំងនោះទេ ប៉ុន្តែ គាត់ចង់ឲ្យពួកគេ មកក្រាបសុំទោសនៅចំពោះមុខផ្នូរសត្វឆ្កែជាទីស្រឡាញ់របស់គាត់។
តែយ៉ាងណាមិញ ក្រោយករណីនេះបានផ្ទុះឡើង ខណៈមហាជនក៏បានថ្កោលទោសធ្ងន់ៗ នៅពេលនេះ ស្នងការនគរបាលខេត្តកំពត បានធ្វើការឃាត់ខ្លួនមនុស្សចំនួន ៩ នាក់ យកទៅធ្វើការសាកសួរ និងស្វែងរកជនដៃដល់ដែលបានសម្លាប់សត្វឆ្កែទាំងនោះ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ហើយ។ នេះបើតាមគណនីហ្វេសប៊ុកឈ្មោះ Rangsey Roth បានប្រាប់ឲ្យដឹងនៅលើបណ្តាញសង្គម។
សូមបញ្ជាក់ថា យោងតាមច្បាប់ស្តីពី សុខភាពសត្វ និងផលិតកម្មសត្វ បានបញ្ជាក់ថា ការដើរទាក់លក់ ឬ ទិញ និងពិឃាតសត្វអាណាធិបតេយ្យ គ្មានច្បាប់ទម្លាប់ ផ្ទុយនឹងខ្លឹមសារនៃច្បាប់ស្តីពី សុខភាពសត្វ និងផលិតកម្មសត្វ ដែលនឹងត្រូវទទួលទោសយ៉ាងធ្ងន់ធ្ងរ តាមមាត្រា១១២, ១១៣, ១១៥ នៃច្បាប់នេះ ៕ រក្សាសិទ្ធិដោយ៖ លឹម ហុង
