ប្រព័ន្ធផ្សព្វផ្សាយថៃឲ្យដឹងនៅថ្ងៃទី ៧ ខែឧសភាថា ក្រុមបាតុករទាមទាររៀបចំការបោះឆ្នោតនៅថៃ បានទាមទារការដាក់ចេញឱសានវាទ ក្នុងរង្វង់៧ថ្ងៃ ឲ្យរដ្ឋការយោធាថៃត្រូវកំណត់ពេលវេលាបោះឆ្នោត ពុំនោះសោតនឹងត្រូវប្រឈមមុខនឹងបាតុកម្មយ៉ាងគគ្រឹកគគ្រេងនៅពីមុខអគាររដ្ឋាភិបាល។
ឧត្តមសេនីយ៍ប្រាយុទ្ធ ចាន់អូចារ
មុននោះនៅថ្ងៃ ៥ ខែឧសភា បាតុកររាប់រយនាក់បានចូលរួមក្នុងការប្រមូលផ្តុំរៀបចំដោយក្រុមស្តារលទ្ធិប្រជាធិបតេយ្យ (DRG) រៀបចំឡើងក្នុងឧទ្យានសកលវិទ្យាល័យ Tammasat ដែលជាមូលដ្ឋានប្រវត្តិសាស្ត្រមួយរបស់កងកម្លាំងទាមទារប្រជាធិបតេយ្យនៅថៃ ។
ថ្លែងក្នុងព្រឹត្តិការណ៍នេះ បណ្តាមេក្រុមបាតុករលើកឡើងថា ឧត្តមសេនីយ៍ប្រាយុទ្ធចាន់អូចារ ដែលជាមេដឹកនាំរដ្ឋការយោធា ត្រូវកំណត់ពេលវេលាបោះឆ្នោតមុនឱកាសប្រារព្ធពិធីរំលឹកខួបលើកទី ៤ ថ្ងៃផ្ទុះរដ្ឋប្រហារយោធា 22/5/2014-22/5/2018 ។
ដោយឡែករដ្ឋការយោធាថៃ បានព្រមានថា បាតុករត្រូវទទួលខុសត្រូវប្រសិនបើការជួបជុំរបស់ពួកគេបំណងបង្កចលាចល និងធ្វើឲ្យអស្ថិរភាពសង្គម ។ កម្លាំងសន្តិសុខ និងកងទ័ពក៏ត្រូវបានបញ្ជាឲ្យត្រៀមបម្រុងដើម្បីប្រឈមមុខនឹងលទ្ធភាពដែលស្ថានការណ៍វិវឌ្ឍន៍ហួសពីការគ្រប់គ្រងបាន ៕ សូយន