ភ្នំពេញ ៖ ប្រទះឃើញសាកសពស្ត្រីជនអនាថាម្នាក់នៅម៉ោង៤និង១០នាទីរសៀល ថ្ងៃទី៧ ខែឧសភា ឆ្នាំ២០១៨ ស្ថិតនៅក្នុងដីឡូត៍មួយកន្លែងតាមផ្លូវបេតុង ភូមិថ្មី សង្កាត់ដង្កោ ខណ្ឌដង្កោ ។
សាកសពស្ត្រីអនាថាខាងលើ មិនត្រូវបានគេស្គាល់អត្តសញ្ញាណឡើយ មានអាយុជាង៤០ឆ្នាំ ។ បើតាមប្រជាពលរដ្ឋរស់នៅក្នុងភូមិកើតហេតុ បានឲ្យដឹងថា ស្ត្រីខាងលើត្រូវបានគេឃើញ វត្តមាន មកម្តុំនេះក្នុងពេលថ្មីៗនេះក្នុងស្ថានភាពទីទ័ល ជាជនអនាថា ហើយក៏ត្រូវបានបងប្អូនប្រជាពលរដ្ឋធ្លាប់ឲ្យជា បាយចំណីផងដែរ ដោយមិនដឹងថាផ្ទះសម្បែង និងស្រុកនៅទីណាដែរ ។
មុនពេលស្លាប់គេឃើញគាត់ស្នាក់អាស្រ័យបានដោយនៅតាមចិញ្ចើមផ្លូវ សំយ៉ាបផ្ទះពលរដ្ឋ ដើរត្រាច់ចរគ្មានគោលដៅ ទើបតែមកដល់រសៀលថ្ងៃនេះ បន្ទាប់ពីមានអ្នក ធ្វើដំណើរទៅបរិវេណដីឡូត៍ ចំណុចកើតហេតុខាងលើ ក៏ប្រទះឃើញ ស្ត្រីខាងលើដេកស្លាប់ទៅវិញ ទើបរាយការណ៍ប្រាប់សមត្ថកិច្ច អាជ្ញាធរចុះមកពិនិត្យមើលជាក់ស្តែង ។
ក្រោយកើតហេតុសាកសពស្ត្រីខាងលើសមត្ថកិច្ចជំនាញចុះមកពិនិត្យ ពុំមានស្លាកស្នាមអ្វី គួរឲ្យកត់សំគាល់ ឬអាចសន្និដ្ឋានបានថាស្លាប់ដោយសារជម្ងឺខ្យល់គរ។ក្រោយពីពិនិត្យរួចសាកសពសមត្ថកិច្ចដឹកយកទៅតណកល់ទុកធ្វើបុណ្យតាមប្រពៃណីនៅវត្តឫស្សីសាញ់ និងបន្តស្រាវស្រាវស្វែងរកសាច់ញាតិ ៕ ដោយ៖បញ្ញាស័ក្តិ
