ខេត្តព្រះសីហនុ៖ ប្រជាពលរដ្ឋមានទំនាស់ធ្លីរាំរ៉ៃចំនួន ៦នាក់ រស់នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវខេត្តព្រះសីហនុ នៅព្រឹកថ្ងៃអង្គារ៍ ទី៨ ខែឧសភា ឆ្នាំ២០១៨នេះ បានបន្តឡើងតុលាការទៀត បន្ទាប់ពី ត្រូវបានកម្លាំងកងរាជអាវុធហត្ថខេត្តព្រះសីហនុ ចាប់ខ្លួនបញ្ជូនទៅកាន់សាលាដំបូងខេត្តនេះ តាមពាក្យបណ្តឹង របស់ លោកឧកញ៉ា តាន់ តាត់ អ្នកមានទ្រព្យដ៏ល្បីល្បាញម្នាក់រស់នៅខេត្តព្រះសីហនុ ប្តឹងចោទថា បានមករស់នៅលើដីមានកម្មសិទ្ធិស្របច្បាប់។
ប្រជាពលរដ្ឋទាំង ៦នាក់ ដែលត្រូវកម្លាំងកងរាជអាវុធហត្ថខេត្តព្រះសីហនុ ចាប់ឃាត់ខ្លួន កាលពីល្ងាចថ្ងៃអាទិត្យ ទី៦ ខែឧសភា ឆ្នាំ២០១៨ បានបញ្ជូនខ្លួនទៅកាន់សាលាដំបូងខេត្តព្រះសីហនុ នៅរសៀលថ្ងៃចន្ទ ទី៧ និងព្រឹកថ្ងៃអង្គារ៍ ទី៨ ខែឧសភា បានអះអាងថា ពួកគេ មានឯកសារកាន់កាប់ដី ដែលលោកឧកញ៉ា តាន់ តាត់ អះអាងថា ជាកម្មសិទ្ធិខ្លួននោះ ដូចគ្នាដែរ។
អ្នកស្រី ឡុច ទូច ស្ថិតក្នុងចំណោមប្រជាពលរដ្ឋរងគ្រោះដីធ្លីទាំង ៦នាក់ ដែលត្រូវកម្លាំងកងរាជអាវុធហត្ថខេត្ត ចាប់ដាក់ខ្នោះដៃ បញ្ជូនទៅកាន់សាលាដំបូងខេត្តព្រះសីហនុ តាមបណ្តឹង របស់លោកឧកញ៉ា តាន់ តាប់ បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេច ប៊ុន រ៉ានី ឲ្យជួយរកយុត្តិធ៌មលើទំនាស់ដីធ្លី ជូនប្រជាពលរដ្ឋរស់ នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ឲ្យទទួលបានយុត្តិធ៌ម ដោយក្តីអនុគ្រោះផង។
អ្នស្រីបន្តថា វាជារឿងអយុត្តិធ៌ម ដែលដីធ្លីធ្លាប់រុករានកាន់កាប់ របស់ប្រជាពលរដ្ឋក្នុងសហគមន៍អូរខ្សាច់ នាពេលកន្លងមក ប៉ុន្តែពេលនេះ បែរជាត្រូវគេរំលោភយក និងបានប្រើកម្លាំងសមត្ថកិច្ចកងរាជអាវុធហត្ថខេត្តព្រះសីហនុ មកចាប់ពលរដ្ឋដាក់ខ្នោះបញ្ជូនទៅតុលាការ ដើម្បីផ្គាប់ចិត្តឈ្មួញដី ឬឧកញ៉ា មានទ្រព្យទៅវិញ។
តំណាងសហគមន៍អូរខ្សាច់ អ្នកស្រី ឡុច ទូច បានសំណូមពរដល់សម្តេច ហ៊ុន សែន និងថ្នាក់ដឹកនាំស្ថាប័នពាក់ព័ន្ធ ពិសេសសាលាដំបូងខេត្តព្រះសីហនុ ឲ្យពិនិត្យ និងចុះអង្កេតលើវិវាទដីធ្លីនេះដល់ទីតាំងកើតមានទំនាស់។
ទាក់ទិនបញ្ហានេះ មន្ត្រីសង្គមស៊ីវិលជាតិ–អន្តរជាតិ ប្រចាំខេត្តព្រះសីហនុ ក៏កំពុងតាម ឃ្លាំមើលការចាប់បញ្ជូន ខ្លួនប្រជាពលរដ្ឋទាំង ៦នាក់ ដែលមានទំនាស់ដីធ្លី ជាមួយឧកញ៉ា តាន់ តាត់ អ្នកមានទ្រព្យដ៏ល្បីម្នាក់ រស់នៅខេត្តព្រះសីហនុ នាសាលាដំបូងខេត្តនេះ ដោយយកចិត្តទុកដាក់ នៅព្រឹកថ្ងៃអង្គារ៍នេះ។
មន្ត្រីសង្គមស៊ីវិល បានឲ្យដឹងថា ក្នុងចំណោមប្រជាពលរដ្ឋទាំង ៦នាក់ ដែលត្រូវកម្លាំងកងរាជអាវុធហត្ថខេត្តព្រះសីហនុ ចាប់ខ្លួន ក៏មានអ្នកស្រី ឡុច ទូច ជាតំណាងពលរដ្ឋមានទំនាស់ដីធ្លី នៅសហគមន៍អូរខ្សាច់ ស្ថិតក្នុងភូមិ៤ ឃុំអូរត្រេះ ស្រុកស្ទឹងហាវ ដែលធ្លាប់ចេញមុខតវ៉ាលើទំនាស់ដីធ្លីរាំរ៉ៃនាពេលកន្លងមក។
នៅព្រឹកថ្ងៃអង្គារ៍ ទី៨ ខែឧសភា ឆ្នាំ២០១៨នេះ ប្រជាពលរដ្ឋរងគ្រោះដីធ្លីទាំង ៦នាក់ខាងលើ ត្រូវបានមន្ត្រីកងរាជអាវុធហត្ថខេត្តព្រះសីហនុ បញ្ជូន ទៅកាទៅកាន់សាលាដំបូងខេត្តនេះ ដើម្បីបន្តនីតិវិធីទៅតាមបណ្តឹង របស់លោកឧកញ៉ា តាន់ តាត់ ដែលជាអ្នកមានទ្រព្យធនដ៏ល្បីម្នាក់នៅមូលដ្ឋាននេះ។
អ្នកយកព័ត៌មានគេហទំព័រ www.cen.com.kh ប្រចាំខេត្តព្រះសីហនុុ មិនទាន់មានប្រភពទាក់ទង លោកឧកញ៉ា តាន់ តាត់ ដើម្បីស្នើការបំភ្លឺបន្ថែមជុំវិញមូលហេតុ ដែលឈានដល់ រូបលោកបានដាក់ពាក្យបណ្តឹង ទៅកាន់ស្ថាប័នកងរាជអាវុធហត្ថខេត្តព្រះសីហនុ ឲ្យចាប់ខ្លួន ប្រជាពលរដ្ឋទាំង ៦នាក់ រស់នៅសហគមន៍អូរខ្សាច់ខាងលើបានទេ នៅព្រឹកថ្ងៃអង្គារ៍ ទី៨ ខែឧសភា ឆ្នាំ២០១៨។
ទាក់ទិនទំនាស់នេះ មន្ត្រីសង្គមស៊ីវិលជាតិ និងអន្តរជាតិ បានឲ្យដឹងថា កំពុងតាមឃ្លាំ និងអង្គេតទៅលើសកម្មភាព នៃការចាប់ខ្លួនប្រជាពលរដ្ឋ មានទំនាស់ដីធ្លីទាំង ៦នាក់ នៅសហគមន៍អូរខ្សាច់ មានទីតាំងនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុនេះ ដោយយកចិត្តទុកដាក់។
អ្នកឃ្លាំមើលផែនការអភិវឌ្ឍសង្គម ប្រចាំខេត្តព្រះសីហនុ បានអះអាងថា សកម្មភាពចាប់ខ្លួនប្រជាពលរដ្ឋមានទំនាស់ដីធ្លី រស់នៅសហគមន៍អូរខ្សាច់ ឃុំអូរត្រេះ ស្រុកស្ទឹងហាវខាងលើនេះ បានកើតមានជាថ្មី ស្របពេលតម្លៃទិញលក់ដី នៅខេត្តព្រះសីហនុ កំពុងមានហាងឆេងខ្ពស់ ដោយសារកំណើនអ្នកវិនិយោគទុនចិន បានហូរចូលមកមូលដ្ឋាននេះ មានចំនួនច្រើនគួរឲ្យកត់សម្គាល់នាពេលបច្ចុប្បន្ននេះ៕ ដែន សីមា
