ព្រះសីហនុ៖ បច្ចុប្បន្ននេះ ក្រោយពីបានដាក់ឲ្យដំណើរការទទួលភ្ញៀវទេសចរណ៍ ចូលលេងកម្សាន្ត សហគមន៍អេកូទេសចរណ៍ព្រៃកោងកាងព្រែកតាសុខ ស្ថិតនៅក្នុងសង្កាត់កោះរ៉ុងក្រុងកោះរ៉ុង បានផ្ដល់ឱកាសការងារជូនប្រជាពលរដ្ឋជាច្រើនតាមរយៈការបង្កើតមុខរបរ និងទទួលសេវាកម្មទេសចរណ៍។
ឯកឧត្តម គួច ចំរើន អភិបាលខេត្តព្រះសីហនុបាន ដឹកនាំក្រុមការងារមន្ទីរអាជ្ញាធរក្រុងចុះពិនិត្យមើលសហគមន៍អេកូទេសចរណ៍ព្រៃកោងកាងដែលជាធនធានធម្មជាតិដ៏ស្រស់បំព្រង សម្រាប់ទាក់ទាញភ្ញៀវទេសចរទាំងជាតិនិងអន្តរជាតិ មកលំហែកម្សាន្ត។
ឯកឧត្តម បានណែនាំឱ្យប្រធានសហគមអេកូទេសចរណ៍ព្រៃកកោងកាងព្រែកតាសុខនេះ ត្រូវខិតខំកែច្នៃឱ្យក្លាយជាតំបន់ទេសចរណ៍ដ៏ទាក់ទាញ ព្រោះទីតាំង ព្រៃកោងកាងនេះសម្បូរទៅដោយជីវចម្រុះជា ច្រើនប្រភេទដែលរស់នៅតាមបែបធម្មជាតិ ដូច្នេះយើងត្រូវចេះកែច្នៃតំបន់ព្រៃកោងកាងជាកន្លែងកម្សាន្តសម្រាប់ភ្ញៀវទេសចរជាតិ និងទេសចរបរទេស បន្ទាប់ពីជំងឺកូវីដ-១៩ ស្ងប់ស្ងាត់ទៅវិញនៅពេលខាងមុខ។
ឯកឧត្តម អភិបាលខេត្ត បានបញ្ជាក់ថា តំបន់សហគមន៍អេកូទេសចរណ៍នេះ នៅពេលខាងមុខប្រែមុខមាត់ថ្មី អាចជួយបង្កើនការងារជូនប្រជាពលរដ្ឋរស់នៅតំបន់កោះឱ្យមានជីវភាពកាន់តែល្អប្រសើរឡើង ដូច្នេះយើងត្រូវរួមគ្នាថែរក្សាអនាសម័យ បរិស្ថាន ពិសេសរួមគ្នាអភិរក្សព្រៃឈើ ប្រកបដោយចីរភាព ដែលជាតម្រូវ ការចាំបាច់សម្រាប់ភ្ញៀវទេសចរមកលេងកម្សាន្តនៅតាមបណ្តាកោះនៅក្នុងភូមិសាស្ត្រក្រុងកោះរ៉ុងនេះ បានកាន់តែច្រើនបន្ថែមទៀតនាពេលខាងមុខ៕
