ព្រះសង្ឃថៃមួយអង្គ ដែលឈ្នះ ១៨ លានបាត (ស្មើជាង ៥៣ ម៉ឺនដុល្លារ) ពីឆ្នោតរដ្ឋាភិបាល បានចែករំលែកការឈ្នះរបស់គាត់ ទៅដល់អ្នកស្រុក និងអង្គការនានា ដែលឃើញហើយពិតជាគួរឲ្យគោរពសរសើរជាខ្លាំង។
យោងតាម The Thaiger ព្រះសង្ឃ Phanom Prechakon (ព្រះជន្ម ៤៧ វស្សា) មកពីព្រះវត្ត Phra That Phanom Woramahawihan ក្នុងខេត្ត Nakhon Phanom បានទិញសន្លឹកឆ្នោតឈ្នះ បន្ទាប់ពីអ្នកលក់សុំឲ្យព្រះអង្គជួយទិញដោយនិយាយថា អាជីវកម្មរបស់គាត់បានរងផលប៉ះពាល់ដោយសារជំងឺរាតត្បាតកូវីដ១៩។
គួរបញ្ជាក់ឲ្យដឹងថា នៅប្រទេសថៃ ក្រៅពីកន្លែងលក់ឆ្នោត អ្នកលក់ក៏អាចត្រូវបានគេឃើញមានវត្តមាននៅតាមផ្សារ និងតាមដងផ្លូវផងដែរ។ សន្លឹកឆ្នោតត្រូវបានលក់ជាគូក្នុងតម្លៃផ្លូវការ ៨០ បាត បើទោះបីជាចំនួននេះត្រូវបានអ្នកលក់មាននិន្នាការលក់ចាប់ពី ១០០ បាតទៅ ១៣០ បាតក៏ដោយ។
ព្រះសង្ឃចិត្តបុណ្យរូបនេះ បានឲ្យដឹងថា គាត់បានទិញឆ្នោតចំនួន ៣ សន្លឹក ហើយឈ្នះសន្លឹកទី១ ដែលមានលេខ 061905។
តែទោះយ៉ាងណា ជាមួយលាភសំណាងនេះ ព្រះអង្គមិនទុកទេ ដោយបានសម្រេចបរិច្ចាគទៅអ្នកស្រុក ព្រះសង្ឃ និងអ្នកធ្វើការនៅវត្តផ្សេងទៀតផងដែរ។
អ្នកស្រុកត្រូវបានកំណត់ទទួលបានការចែកទាន ៥០០ បាត (ស្មើជិត ១៥ ដុល្លារ) ក្នុងម្នាក់ៗ ដែលមានចំនួនជាង ១ពាន់នាក់។
តែទោះជាយ៉ាងណា Khaosod បានរាយការណ៍ថា ដោយសារចំនួនមនុស្សមកច្រើន ក្រោយមក ចំនួនខាងលើត្រូវកាត់បន្ថយមកត្រឹម ២០០ បាត ដោយសារព្រះសង្ឃខ្លាចថា មិនអាចមានសាច់ប្រាក់គ្រប់គ្រាន់។ Khaosod ក៏បានប៉ាន់ប្រមាណថា ហ្វូងមនុស្សដែលបានបង្ហាញខ្លួនមានចំនួនជាង ៣ ពាន់នាក់ឯណោះ។
គិតមកត្រឹមថ្ងៃទី៧ ខែមីនា ព្រះអង្គបានបរិច្ចាគទានចំនួន ១,៥ លានបាត (ស្មើជាង ៤៤ ម៉ឺនដុល្លារ) ហើយប្រាក់ចំនួន ៤ លានបាត (ស្មើជាង១១ម៉ឺនដុល្លារ) ផ្សេងទៀត ត្រូវបានបរិច្ចាគដល់វត្ត ខណៈដែលនៅសល់ ត្រូវបានប្រគល់ទៅឱ្យស្ថាប័ន និងអង្គការផ្សេងៗ សម្រាប់គោលបំណងសប្បុរសធម៌៕ រក្សាសិទ្ធិដោយ៖ លឹម ហុង
