អ្នកបើកបរម៉ូតូម្នាក់នៅទីក្រុងបាងកក បានទទួលការកោតសរសើរជាខ្លាំង បន្ទាប់ពីគាត់បានចែករំលែកវីដេអូអំពីបុរសអនាថារូបសង្ហាម្នាក់ ដែលមានមុខមាត់ស្រដៀងគ្រូជោគជ័យ អុីចឹង នៅលើបណ្តាញសង្គម TikTok ហើយវីដេអូនេះបានរីករាលដាល ទីបំផុត បុរសអនាថាវិកលចរឹករូបនោះ ក៏បានជួបជុំគ្រួសាររបស់គាត់វិញ និងព្រមទាំងទទួលបានការថែទាំសុខភាពផងដែរ។
អ្នកបើកបរម៉ូតូរូបនេះ ដែលធ្វើការនៅតំបន់ Asok ក្នុងទីក្រុងបាងកក និងជាម្ចាស់គណនី @Chaiyootkasron នៅលើ TikTok បានប្រាប់ឲ្យដឹងថា គាត់បានជួបបុរសអនាថាម្នាក់ ហើយគិតថាបុរសនោះសង្ហា ទើបគាត់សម្រេចចិត្តថតវីដេអូបុរសនោះ ហើយបន្ទាប់មកក៏បានចែករំលែកតាមអ៊ីនធឺណិត។
បុរសអនាថាម្នាក់នេះ ត្រូវបានគេដាក់រហស្សនាមថា « Pra-ek (ប្រាឯក)» ដែលមានន័យថា តារាភាពយន្ដជាភាសាថៃ។ ហើយវីដេអូនេះ ដែលគាត់បានដាក់ចំណងជើងថា “គាត់មើលទៅដូចជាតារាភាពយន្តចិន” ត្រូវបានបង្ហោះកាលពីថ្ងៃទី១០ ខែកុម្ភៈ ឆ្នាំ២០២២។
អ្នកបើកបរបានបង្ហើបថា បុរសអនាថានោះតែងតែបោកខោអាវនៅស្ថានីយ៍ប្រេងឥន្ធនៈក្នុងតំបន់។ ក្នុងការសន្ទនាគ្នា ជួនកាល គាត់អាចយល់បាន ហើយពេលខ្លះ ក៏មិនយល់ដែរ ព្រោះតែបុរសនេះនិយាយបែកៗ។
ប៉ុន្តែ អ្វីដែលរំភើបនោះ គឺបន្ទាប់វីដេអូនេះបានរីករាលដាល ក្រុមគ្រួសារបុរសអនាថានេះ ក៏បានទាក់ទងទៅគណនីនៅលើ TikTok របស់គាត់ ហើយគាត់ក៏បាននិយាយជាមួយក្រុមគ្រួសារដោយបញ្ជាក់នូវពាក្យនេះថា «គេក៏ជាមនុស្សដូចគ្នាដែរ»។ បន្ទាប់មក ក្រុមគ្រួសារបានផ្ញើរូបថតរបស់បុរសម្នាក់នេះដែលមានឈ្មោះថា Pond ដែលមើលទៅពិតជាដូចបុរសអនាថានេះតែម្តង។
ឪពុកបុរសអនាថានេះ បន្ទាប់មកបានធ្វើដំណើរទៅបាងកកពីស្រុកកំណើតនៅស្រុក Hua Hin ខេត្ត Prachuap Khiri Khan ហើយនៅទីបំផុត ឪពុកនិងកូនប្រុសបានឱបគ្នាដែលមើលទៅពិតជាគួរឲ្យរំជួលចិត្តណាស់។
គ្រួសារចង់មានគម្រោងនាំកូនប្រុសទៅផ្ទះភ្លាមៗ ប៉ុន្តែ ពេលនេះ Pond កំពុងតម្រូវឲ្យសម្រាកព្យាបាលនៅមន្ទីរពេទ្យ Srithanya ដែលជាមន្ទីរពេទ្យវិកលចរិកដ៏ធំបំផុតនៅក្នុងប្រទេសថៃ ក្នុងរយៈពេល ២ សប្តាហ៍។ វេជ្ជបណ្ឌិតបានបញ្ជាក់ថា មានឱកាសខ្ពស់ដែលគាត់នឹងត្រលប់មកធម្មតាវិញ ហើយបន្ទាប់មកគាត់នឹងធ្វើដំណើរទៅផ្ទះជាមួយក្រុមគ្រួសារបាន។
សូមបញ្ជាក់ថា នេះមិនមែនជាលើកទីមួយទេ ដែលអ្នកបើកបររូបនេះបង្ហោះវីដេអូស្រដៀងគ្នានេះ ដោយគាត់តែងតែបង្ហោះវីដេអូអំពីជនអនាថានៅលើអ៊ីនធឺណិត ដោយសង្ឃឹមថានឹងជួយពួកគេឱ្យបានជួបជុំគ្រួសារ ឬទទួលបានជំនួយដែលពួកគេត្រូវការ៕ រក្សាសិទ្ធិដោយ៖ លឹម ហុង
@chaiyootkasron #วินาทีที่สุดหล่อได้สู่อ้อมที่อบอุ่นที่สุดครับ🥰🥰🥰 ♬ เสียงต้นฉบับ – SAD MUSIC🖤 – 𝚂𝚊𝚍_𝚖𝚞𝚜𝚒𝚌