ភ្នំពេញ ៖ នៅថ្ងៃសៅរ៍ ទី២៦ ខែមីនា ឆ្នាំ២០២២ នៅទីស្តីការក្រសួង ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញ ជាអធិបតីក្នុងពិធីតាំងពិព័រណ៍យានយន្តអគ្គិសនី និងសម្ពោធដាក់ឱ្យប្រើប្រាស់ស្ថានីយបញ្ចូលថាមពល សម្រាប់យានយន្តអគ្គិសនី ដោយមានការអញ្ជើញចូលរួមពីថ្នាក់ដឹកនាំក្រសួង មន្ត្រីរាជការក្រោមឱវាទ ក្រសួង ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូតនៃបណ្តាប្រទេសជាមិត្តប្រចាំព្រះរាជាណាចក្រកម្ពុជា លោកជំទាវ តំណាងកម្មវិធីអភិវឌ្ឍន៍អង្គការសហប្រជាជាតិ (UNDP) តំណាង Energy Lab តំណាង SMMR/GIZ តំណាងក្រសួង-ស្ថាប័នពាក់ព័ន្ធ តំណាងសហព័ន្ធសមាគមយានយន្តនៅកម្ពុជា វិស័យឯកជន និងក្រុមហ៊ុនយានយន្តអគ្គិសនីចំនួន១២ផងដែរ។
ពិធីនេះ រៀបចំឡើងដោយក្រសួងសាធារណការ និងដឹកជញ្ជូន សហការជាមួយអង្គការ UNDP, Energy Lab និង SMMR/GIZ ដើម្បីបើកឡើងទំព័រប្រវត្តិសាស្រ្តថ្មីមួយរបស់កម្ពុជា ក្នុងគោលបំណងបញ្ជ្រាបការយល់ដឹងដល់សាធារណជន អំពីបច្ចេកវិទ្យា ឧបករណ៍ បរិក្ខារ និងអត្ថប្រយោជន៍នានា នៃយានយន្តអគ្គិសនីសំដៅលើកកម្ពស់ការប្រើប្រាស់យានយន្តអគ្គិសនីនៅកម្ពុជាឱ្យកាន់តែទូលំទូលាយថែមទៀត។
ថ្លែងក្នុងរបាយការណ៍គោរពជូនឯកឧត្តមទេសរដ្ឋមន្ត្រី និងអង្គពិធីនាឱកាសនោះ ឯកឧត្តម ឈួន វ៉ន់ អគ្គនាយកនៃអគ្គនាយកដ្ឋានក្រសួងសាធារណការ និងដឹកជញ្ជូន បានគូសបញ្ជាក់ថា៖ ចំនួនយានយន្តអគ្គិសនីដែលបានចុះបញ្ជីមានចំនួនតែ០២គ្រឿងប៉ុណ្ណោះ ក្នុងឆ្នាំ២០២០ និងចំនួន៦២គ្រឿងនៅឆ្នាំ ២០២១ ហើយនៅក្នុងរយៈពេលតែ៣ខែប៉ុណ្ណោះពោលគឺ៖ ពីខែមករាដល់ខែមីនា ឆ្នាំ២០២២នេះ ការចុះ បញ្ជីយានយន្តអគ្គិសនីមានរហូតដល់៤៧គ្រឿង បើធៀបនឹងឆ្នាំ២០២១ក្នុងរយៈពេលដូចគ្នា (ចំនួន០៧ គ្រឿងប៉ុណ្ណោះ) មានការកើនឡើង៦៧១% ដែលនេះគឺជាកំណើននៃការប្រើប្រាស់យានយន្តអគ្គិសនីមួយគួរឱ្យកត់សម្គាល់។
ថ្លែងក្នុងមតិសំណេះសំណាលទៅកាន់អង្គពិធីនាឱកាសនោះ ឯកឧត្តមទេសរដ្ឋមន្ត្រី បានគូសបញ្ជាក់ពីសមត្ថកិច្ចរបស់ក្រសួងសាធារណការ និងដឹកជញ្ជូនក្នុងការគ្រប់គ្រង និងអភិវឌ្ឍវិស័យដឹកជញ្ជូន ដឹកនាំការងាររៀបចំ និងអនុវត្តគោលនយោបាយ ផែនការយុទ្ធសាស្ត្រ និងវិធានការចាំបាច់នានាដើម្បីឈានទៅ សម្រេចបាននូវការប្រើប្រាស់រថយន្តអគ្គិសនីក្នុងអត្រា៤០% និងទោចក្រយានយន្ត(ម៉ូតូ) អគ្គិសនីក្នុងអត្រា៧០% នៅឆ្នាំ២០៥០ ស្របតាមការកំណត់ទិសដៅជាក់លាក់ ដែលមានចែងនៅក្នុងរបាយការណ៍បច្ចុប្បន្នភាព នៃការរួមចំណែករបស់ជាតិ និងយុទ្ធសាស្រ្តអភិវឌ្ឍន៍រយៈពេលវែងសំដៅ សម្រេចបានអត្រាកាបូនសូន្យនៅឆ្នាំ២០៥០នៅកម្ពុជា (Long-term Strategy for Carbon Neutrality 2050) និង និន្នាការនៃការប្រើប្រាស់យានយន្តអគ្គិសនីរបស់ពិភពលោក តំបន់ ក៏ដូចជាកម្ពុជាផងដែរ។
ឯកឧត្តមទេសរដ្ឋមន្ត្រី បានបន្ថែមថា៖ ដើម្បីសម្រេចបានគោលដៅនេះ ទាមទារឱ្យមានការចូលរួមពី ក្រសួង-សា្ថប័ន និងភាគីពាក់ព័ន្ធទាំងអស់ ដើម្បីរៀបចំ និងអនុវត្តគោលនយោបាយ ផែនការយុទ្ធសាស្ត្រ និងវិធានការនានាប្រកបដោយប្រសិទ្ធភាព និងប្រសិទ្ធផល ជំរុញការគាំទ្រ និងការលើកទឹកចិត្តដល់ការអភិវឌ្ឍ និងការប្រើប្រាស់យានយន្តអគ្គិសនី ដោយផ្តោតទៅលើយុទ្ធសាស្ត្រទាក់ទាញ ឱ្យមានកំណើននៃការប្រើប្រាស់ យានយន្តអគ្គិសនី កំណើននៃការបង្កើតស្ថានីយបញ្ចូលថាមពលយានយន្ត អគ្គីសនី និងការគ្រប់គ្រង ការកែច្នៃ និងការបោះបង់សំណល់អាគុយប្រកបដោយសុវត្ថិភាព។
ឯកឧត្តមទេសរដ្ឋមន្ត្រី បានជម្រាបជូនផងដែរថា៖ ក្រសួងបានទទួលជំនួយពីអង្គការ UNDP នូវឧបករណ៍បញ្ចូលថាមពលយានយន្តអគ្គិសនី ចំនួន០៤គ្រឿង ហើយក្រុមហ៊ុនឯកជនដែលជាដៃគូ បានសន្យាគាំទ្រលើការជំរុញការប្រើប្រាស់យានយន្តអគ្គិសនីនៅកម្ពុជា ដោយជំហានដំបូងសន្យាផ្តល់ ឧបករណ៍បញ្ចូលថាមពលយានយន្តអគ្គិសនីចំនួន១០គ្រឿង។ ក្រៅពីនេះ ក្រសួងក៏បានជួបពិភាក្សា ជាមួយក្រុមហ៊ុនមួយចំនួន ដែលមានចំណាប់អារម្មណ៍ លើការវិនិយោគស្ថានីយ បញ្ចូលថាមពលយានយន្តអគ្គិសនីផងដែរ។
ជាមួយគ្នានោះ ឯកឧត្តមទេសរដ្ឋមន្ត្រី បានសម្តែងជំនឿយ៉ាងមុតមាំថា៖ ការតាំងពិព័រណ៍យានយន្តអគ្គិសនី និងសម្ពោធដាក់ឱ្យប្រើប្រាស់ ស្ថានីយបញ្ចូលថាមពលសម្រាប់យានយន្តអគ្គិសនីនេះ នឹងជួយជំរុញឱ្យមានការចូលរួមអភិវឌ្ឍ និងលើកកម្ពស់ការប្រើប្រាស់យានយន្តអគ្គិសនីនៅកម្ពុជា ដើម្បីចូលរួមជាមួយរាជរដ្ឋាភិបាល ក៏ដូចជាពិភពលោក ក្នុងការកាត់បន្ថយការបំភាយឧស្ម័នកាបូនឌីអុកស៊ីត (CO2) ចេញពីវិស័យយានយន្ត ដែលជាផ្នែកមួយនៃការកើនឡើងនូវឧស្ម័នផ្ទះកញ្ចក់ (GHG)បណ្តាលឱ្យមានការឡើងកំដៅផែនដី បម្រែបម្រួលអាកាសធាតុ ការធ្លាក់ចុះនូវគុណភាពខ្យល់ និងការបំពុលបរិស្ថាន។
ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់អង្គការ UNDP, EnergyLab និងអង្គការ SMMR/GIZ ផ្នែកឯកជន និងដៃគូអភិវឌ្ឍន៍ពាក់ព័ន្ធនានា ដែលបានជួយគាំទ្រនូវសកម្មភាពលើការអភិវឌ្ឍ និងលើកកម្ពស់ការប្រើប្រាស់យានយន្តអគ្គិសនីនៅកម្ពុជា តាមរយៈការជួបពិភាក្សា និងការរៀបចំសិក្ខាសាលាជាបន្តបន្ទាប់កន្លងមក
និងបានសំណូមពរដល់ស្ថាប័នពាក់ព័ន្ធទាំងអស់យកចិត្តទុកដាក់សហការគ្នាឱ្យកាន់តែប្រសើរថែមទៀតដើម្បីអភិវឌ្ឍ និងលើកកម្ពស់វិស័យយានយន្តអគ្គីសនីនៅកម្ពុជា ។
សូមជម្រាបជូនថា៖ ក្រសួងសាធារណការ និងដឹកជញ្ជូន សហការជាមួយក្រសួងស្ថាប័នពាក់ព័ន្ធ និងដៃគូ អភិវឌ្ឍន៍នានា បាននិងកំពុងធ្វើការងារមួយចំនួនពាក់ព័ន្ធទៅនឹងការអភិវឌ្ឍ និងការលើកកម្ពស់ការប្រើ ប្រាស់យានយន្តអគ្គិសនីដូចជាការរៀបចំសេចក្តីព្រាងគោលនយោបាយជាតិស្តីពីអភិវឌ្ឍន៍វិស័យដឹក ជញ្ជូនផ្លូវគោកដែលមានបញ្ចូលនូវចំណុចស្តីពីការលើកទឹកចិត្តដល់ការប្រើប្រាស់យានយន្តអគ្គិសនី ការលើកទឹកចិត្តឱ្យមានការបង្គុំដំឡើង និងការផលិតយានយន្តអគ្គិសនីនៅកម្ពុជា ការចងក្រងឯកសារគតិយុត្តដើម្បីគាំទ្រដល់ការអភិវឌ្ឍយានយន្តអគ្គិសនី ការកំណត់យកបទដ្ឋានបច្ចេកទេស និងការរៀបចំ ផែនទីបង្ហាញផ្លូវក្នុងការរៀបចំហេដ្ឋារចនាសម្ព័ន្ធគាំទ្រជាដើម។
ដើម្បីអនុវត្តការងារនេះកាន់តែមានប្រសិទ្ធភាព វឌ្ឍនភាព និងអនុលោមតាមបទដ្ឋានអន្តរជាតិ និងផ្សព្វ ផ្សាយឱ្យបានទូលំទូលាយ ក្រសួងកំពុងស្វែករកជំនួយជាថវិកា និងបច្ចេកទេសពីដៃគូអភិវឌ្ឍន៍ និងពីវិស័យឯកជន ជាពិសេសស្វែងរកការគាំទ្រ និងចូលរួមសហការពីបណ្តាក្រសួងស្ថាប័នពាក់ព័ន្ធដើម្បីរួមគ្នាអភិវឌ្ឍវិស័យយានយន្តអគ្គិសនីនៅកម្ពុជា រួមទាំងពិធីពិព័រណ៍យានយន្តអគ្គិសនីនាថ្ងៃនេះផងដែរ។
គួរកត់សម្គាល់ថា៖ ការបំភាយឧស្ម័នកាបូនឌីអុកស៊ីត(CO2) ចេញពីយានយន្តគឺជាកត្តាដ៏ចំបងមួយនៃការកើនឡើងនូវឧស្ម័នផ្ទះកញ្ចក់(GHG) ដែលនាំឱ្យផែនដីឡើងកម្តៅ មានការប្រែប្រួលអាកាសធាតុ ការ ធ្លាក់ចុះនូវគុណភាពខ្យល់ និងការបំពុលបរិស្ថានពិភពលោកទាំងមូល។ ឆ្លើយតបទៅនឹងបញ្ហាខាងលើ ប្រទេសនានានៅក្នុងពិភពលោក និងតំបន់ បានផ្តោតការយកចិត្តទុកដាក់ទៅលើការប្រើប្រាស់យានយន្ត អគ្គិសនី ដែលមានការកើនឡើងជាលំដាប់ពីមួយថ្ងៃទៅមួយថ្ងៃ៕រក្សាសិទ្ធិដោយ ៖ សុទ្ធ លី
