ភ្នំពេញ ៖ ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់ថា ដើម្បីធានាឱ្យការឃោសនាបោះឆ្នោត និងការបោះឆ្នោតប្រព្រឹត្តទៅដោយសេរី ត្រឹមត្រូវ យុត្តិធម៌ ដោយស្មើភាព និងគ្មានការគំរាមកំហែង ក្នុងនាមអាជ្ញាធររៀបចំការបោះឆ្នោត អំពាវនាវដល់គ្រប់គណបក្សនយោបាយ ត្រូវគោរពច្បាប់ បទបញ្ជា និងនីតិវិធីសម្រាប់ការបោះឆ្នោត និងក្រមសីលធម៌សម្រាប់គណបក្សនយោបាយឱ្យបានហ្មត់ចត់។អាជ្ញាធរសាធារណៈទាំងអស់ ត្រូវប្រកាន់ជំហរអព្យាក្រឹត ឥតលម្អៀងក្នុងសកម្មភាព ការងាររបស់ខ្លួន និងហាមយកសម្ភារ និងមធ្យោបាយដឹកជញ្ជូនរបស់រដ្ឋ ដើម្បីបម្រើ ផលប្រយោជន៍គណបក្សនយោបាយ។
ការអំពាវនាវនេះ បានធ្វើឡើងនៅក្នុងកិច្ចប្រជុំផ្សព្វផ្សាយ ផែនការអន្តរស្ថាប័ន ស្តីពីកិច្ចការពារការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ និង ការបោះឆ្នោតថ្នាក់ជាតិ-ថ្នាក់ក្រោមជាតិ ចាប់ពីឆ្នាំ២០២២ ដល់ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ របស់ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គណៈបញ្ជាការសន្តិសុខអចិន្រ្តៃយ៍សម្រាប់ការបោះឆ្នោត តាមប្រព័ន្ធវីដេអូអនឡាញកាលពីព្រឹកថ្ងៃទី២៨ ខែមីនា ឆ្នាំ២០២២។
ឯកឧត្តម ប្រាជ្ញ ចន្ទ បានអំពាវនាវដល់កងយោធពលខេមរភូមិន្ទ កងនគរបាលជាតិ ត្រូវប្រកាន់ជំហរអព្យាក្រឹត និងត្រូវគោរព តាមក្រមសីលធម៌សម្រាប់កងយោធពលខេមរភូមិន្ទ និងកងនគរបាលជាតិ ដែលរៀបចំ ដោយ គ.ជ.ប។ ទប់ស្កាត់ឱ្យបាននូវរាល់អំពើបំភិតបំភ័យ គំរាមកំហែង ដល់បេក្ខជន សកម្មជនគណបក្ស នយោបាយ និងអ្នកបោះឆ្នោតតាមគ្រប់រូបភាព។ គ្រប់ប្រព័ន្ធព័ត៌មានទាំងអស់ត្រូវគោរពច្បាប់ ស្តីពីរបបសារព័ត៌មាន ច្បាប់ស្តីពីការ បោះឆ្នោត បទបញ្ជា និងនីតិវិធីសម្រាប់ការបោះឆ្នោត និងគោរពក្រមសីលធម៌សម្រាប់ ប្រព័ន្ធផ្សព្វផ្សាយព័ត៌មាន។ គណៈបញ្ជាការឯកភាពរដ្ឋបាលរាជធានី ខេត្ត គណៈកម្មការរាជធានី ខេត្តរៀបចំការ បោះឆ្នោត (គធ.ខប) គណៈកម្មការឃុំ សង្កាត់រៀបចំការបោះឆ្នោត (គឃ.សប) គណបក្ស នយោបាយ អង្គការមិនមែនរដ្ឋាភិបាល ត្រូវសហការសម្របសម្រួល ដោះស្រាយបញ្ហា ដែលអាចកើតមានក្នុងដំណាក់កាលនៃការឃោសនាបោះឆ្នោត និងការបោះឆ្នោត នៅ តាមរាជធានី ខេត្តរបស់ខ្លួន។
ប្រធាន គ.ជ.ប អំពាវនាវឲ្យភាគីពាក់ព័ន្ធនឹងការបោះឆ្នោតទាំងអស់ ត្រូវគោរព និងអនុវត្តឱ្យបានល្អ ត្រឹមត្រូវតាម ច្បាប់ បទបញ្ជា និងនីតិវិធីសម្រាប់ការបោះឆ្នោត និងរួមគ្នាគោរពវិធានការសុខាភិបាល ដើម្បីទប់ស្កាត់ការរីករាលដាលនៃជំងឺកូវីដ-១៩។
ឯកឧត្តម ប្រាជ្ញ ចន្ទ បានបញ្ជាក់ថា សម្រាប់ឆ្នាំ២០២២នេះ គណៈកម្មាធិការជាតិរៀបចំការបោះឆ្នោត (គ.ជ.ប) មានការងារ ដែលត្រូវធ្វើចំនួនពីរ គឺការរៀបចំការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ដែល ប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២ និងការពិនិត្យបញ្ជីឈ្មោះ និងការចុះឈ្មោះបោះឆ្នោត ប្រចាំឆ្នាំ ដើម្បីបម្រើឱ្យការបោះឆ្នោតជ្រើសតាំងតំណាងរាស្រ្ត ឆ្នាំ២០២៣ខាងមុខនេះ៕រក្សាសិទ្ធិដោយ ៖ ចេស្តារ
