ទីក្រុងហាណូយ៖ អ្នកជំនាញបានលើកឡើងពីការព្រួយបារម្ភអំពីការចូលរួមរបស់ក្រុមហ៊ុនអចលនទ្រព្យទៅប្រព័ន្ធធនាគារ ជាពិសេសក្នុងធនាគារពាណិជ្ជ ដោយព្រមានថា វាអាចបង្កហានិភ័យដល់ប្រព័ន្ធហិរញ្ញវត្ថុ និងសេដ្ឋកិច្ចទាំងមូល។
យោងតាមអ្នកជំនាញ ការចូលរួមរបស់ក្រុមហ៊ុនអចលនទ្រព្យនៅក្នុងវិស័យធនាគារអាចមានឥទ្ធិពលអាក្រក់ដល់ការអនុវត្តការផ្តល់កម្ចីរបស់ធនាគារទាំងនេះ។ សារព័ត៌មានអនឡាញ bnews.vn បានរាយការណ៍ថា អ្នកដឹកនាំក្រុមហ៊ុនអចលនទ្រព្យ ដែលជាអ្នកដឹកនាំធនាគារមួយចំនួនអាចផ្តល់ប្រាក់កម្ចីបន្ថែមទៀតដល់គម្រោងអចលនទ្រព្យរបស់ពួកគេ។
អ្នកជំនាញម្នាក់ឈ្មោះ ង្វៀន ទ្រីហៃ (Nguyễn Trí Hiếu) បាននិយាយថា ក្រុមហ៊ុនអចលនទ្រព្យ ដែលបម្រើ “Backyard” ឱ្យធនាគារ តែងតែលក់ចេញមូលបត្របំណុល ហើយលក់វាទៅធនាគារ។ នេះក៏ជាទម្រង់នៃការផ្តល់ប្រាក់កម្ចី និងត្រូវបានប្រើប្រាស់ជាឧបករណ៍ហិរញ្ញវត្ថុដ៏មានប្រសិទ្ធភាពមួយដើម្បីជួយអ្នកអភិវឌ្ឍន៍អចលនទ្រព្យទទួលបានប្រាក់កម្ចីពីធនាគារ ប៉ុន្តែហានិភ័យនៃការផ្តល់ប្រាក់កម្ចីត្រូវបានបិទបាំង។
ជាក់ស្តែង ក្នុងប៉ុន្មានឆ្នាំថ្មីៗនេះ រួមជាមួយនឹងគោលនយោបាយរបស់រដ្ឋាភិបាលក្នុងការលើកកម្ពស់ការអភិវឌ្ឍន៍ទីផ្សារមូលធនរបស់ប្រទេស ទម្រង់នៃការចេញសញ្ញាប័ណ្ណសាជីវកម្មត្រូវបានគាំទ្រដោយក្រុមហ៊ុនអចលនទ្រព្យជាច្រើន។ ទោះជាយ៉ាងណាក៏ដោយ វាត្រូវបានកត់សម្គាល់ឃើញថា ធនាគារ និងក្រុមហ៊ុនមូលបត្រត្រូវបានគេរាយការណ៍ថាជាអ្នកទិញមូលបត្របំណុលច្រើនជាងគេ។
ស្ថិតិថ្មីៗនេះរបស់សាជីវកម្មមូលបត្រសៃហ្កន (Saigon) បានបង្ហាញថាក្រុមហ៊ុនបានចេញមូលបត្របំណុលដែលមានតម្លៃសរុបចំនួន ៧២២ ពាន់ពាន់លានដុងក្នុងឆ្នាំ ២០២១ កើនឡើង 56 ភាគរយបើធៀបនឹងឆ្នាំ 2020។ ក្នុងចំនោមពួកគេ ក្រុមហ៊ុនអចលនទ្រព្យជាអ្នកចេញប័ណ្ណធំជាងគេដែលមានចំនួន ៤៤ ភាគរយនៃ ចំនួនសរុបនៃមូលបត្របំណុល និងកើនឡើង 66.3 ភាគរយធៀបនឹងឆ្នាំមុន។
លោក លី សុនញ៉ា(Lê Xuân Nghĩa) នាយកវិទ្យាស្ថានស្រាវជ្រាវ និងអភិវឌ្ឍន៍ធុរកិច្ច ក៏បានសម្តែងការព្រួយបារម្ភផងដែរថា ប្រាក់កម្ចីធនាគារបានហូរចូលទៅក្នុងក្រុមហ៊ុនអចលនទ្រព្យ ដែលបម្រើជា
“ជន្ទុល” របស់ធនាគារ តាមរយៈការទិញមូលបត្របំណុលសាជីវកម្ម។ វាជារឿងគួរឲ្យព្រួយបារម្ភ ដោយសារប្រាក់កម្ចីមានចំនួនច្រើន៕ ប្រភព៖ VNS