យន្តហោះ Mriya របស់អ៊ុយក្រែន ដែលត្រូវបានទទួលស្គាល់ដោយសៀវភៅកំណត់ត្រាពិភពលោក Guinness ថាធំជាងគេបំផុតក្នុងពិភពលោក ត្រូវបានបំផ្លាញទាំងស្រុង បន្ទាប់ពីកងកម្លាំងរុស្ស៊ី បានវាយប្រហារព្រលាន Antonov ក្នុងទីក្រុង Hostomel។
យោងតាមកាសែត Washington Post កងកម្លាំងអ៊ុយក្រែនកាលពីចុងសប្តាហ៍មុន បានដណ្តើមបានមកវិញនូវតំបន់ជាយក្រុងជុំវិញរដ្ឋធានីគៀវ បន្ទាប់ពីកងកម្លាំងរុស្ស៊ីបានចាប់ផ្តើមដកខ្លួនចេញពីទីនោះ។
ទោះជាយ៉ាងណា ភាគច្រើននៃតំបន់ទាំងនោះ ត្រូវបានរងការខូចខាតយ៉ាងខ្លាំងដោយសារតែការប្រយុទ្ធគ្នា។ ក្នុងនោះយន្តហោះយក្ស Antonov AN-225 ដែលគេស្គាល់ថាជា Mriya (អ៊ុយក្រែនសម្រាប់សុបិន) ដែលធ្លាប់បានបំបែកឯតទគ្គកម្មពិភពលោក Guinness ថាជាយន្តហោះធំបំផុតក្នុងពិភពលោក ត្រូវបានបំផ្លាញ។
ជាមួយនឹងទម្ងន់ប្រហែល ៧០៥ តោន និងស្លាបប្រវែង ៨៨ ម៉ែត្រ Mriya ត្រូវបានបំផ្លាញបន្ទាប់ពីការវាយប្រហារដោយកងកម្លាំងរុស្ស៊ី ដើម្បីទទួលបានការគ្រប់គ្រងអាកាសយានដ្ឋាន Antonov នៅ Hostomel ដែលមានទីតាំងយុទ្ធសាស្ត្រប្រហែល ១០ គីឡូម៉ែត្រ ភាគអាគ្នេយ៍ពីរដ្ឋធានី Kiev ។
ព្រលានយន្តហោះនេះ ជាព្រលានទីមួយក្នុងប្រទេសអ៊ុយក្រែនដែលបានធ្លាក់ទៅក្នុងដៃរុស្ស៊ី បន្ទាប់ពីក្រុងម៉ូស្គូបានបើកប្រតិបត្តិការយោធាពិសេសជាផ្លូវការមកលើប្រទេសអ៊ុយក្រែនកាលពីថ្ងៃទី២៤ ខែកុម្ភៈ។
មុនពេលរុស្ស៊ីចុះចតនៅ Hostomel យន្តហោះផ្សេងទៀតនៅអាកាសយានដ្ឋាន Antonov ត្រូវបានផ្លាស់ប្តូរទីតាំង។ ទោះបីជាយ៉ាងណាក៏ដោយ យន្តហោះ Mriya ស្ថិតនៅក្រោមការថែទាំ ហើយមិនអាចហោះឡើងបានឡើយ នេះបើយោងតាមក្រុមហ៊ុន Ukroboronprom ជាក្រុមហ៊ុនបំពាក់ឧបករណ៍ការពារអ៊ុយក្រែនដែលគ្រប់គ្រងយន្តហោះ។
មុខងារដើមរបស់យន្តហោះនេះ គឺដឹកជញ្ជូនយានអវកាសសូវៀត។ នេះក៏ជាយន្តហោះតែមួយគត់ដែលមានម៉ាស៊ីន turbofan ចំនួន ៦ អាចមានល្បឿន ៨០០ គីឡូម៉ែត្រក្នុងមួយម៉ោង និងទម្ងន់ផ្ទុកបានដល់ទៅ ២៥០ តោន។
ក្នុងឆ្នាំ ២០០៩ សៀវភៅកំណត់ត្រាពិភពលោក Guinness បានទទួលស្គាល់ Mriya ថាមានសមត្ថភាពលើកវត្ថុធ្ងន់បំផុតនៃយន្តហោះផ្សេងទៀត៖ ម៉ាស៊ីនទម្ងន់ ១៨៧.៦ តោន។ លើសពីនេះ យន្តហោះនេះទទួលបានកំណត់ត្រាមួយចំនួនទៀត រួមមានៈ យន្តហោះតែមួយគត់ដែលមានទម្ងន់ចុះចតអតិបរមាលើសពី ៦០០ តោន និងជាយន្តហោះដែលមានស្លាបធំទូលាយជាងគេ។
ថ្វីត្បិតតែមានកំណត់ត្រាពិភពលោកជាច្រើនក៏ដោយ ក៏យន្តហោះនេះកម្រនឹងហោះចេញ ដោយសារតែតម្លៃប្រតិបត្តិការខ្ពស់។ តាមការប៉ាន់ស្មានថា ក្នុងមួយម៉ោងនៃការហោះហើររបស់ Mriya ត្រូវចំណាយប្រេងជាង ២០ តោន ស្មើនឹង ៦៧០០ ដុល្លារ។
Mriya ត្រូវបានប្រើសម្រាប់តែបេសកកម្មដែលទាមទារច្រើនបំផុត។ មានពេលមួយដែលយន្តហោះនេះត្រូវ “ដាក់កន្ទេល” នៅក្នុងឃ្លាំងអស់រយៈពេល ៧ ឆ្នាំ បណ្តាលឱ្យផ្នែកជាច្រើនច្រេះ មុនពេលត្រូវបានជួសជុលឡើងវិញនៅឆ្នាំ ២០០១។
Ukroboronprom ប៉ាន់ប្រមាណថា ខ្លួននឹងចំណាយពេលរហូតដល់ ៥ ឆ្នាំ និងចំណាយអស់ប្រហែល ៣ ពាន់លានដុល្លារអាមេរិក ដើម្បីសាងសង់យន្តហោះមួយទៀតដែលមានទំហំ និងមុខងារស្រដៀងគ្នាទៅនឹងយន្តហោះ Mriya៕ រក្សាសិទ្ធិដោយ៖ លឹម ហុង
