អតីតប្រធានាធិបតីរុស្ស៊ី និងជាមន្ត្រីសន្តិសុខជាន់ខ្ពស់ លោក Dmitry Medvedev បានថ្លែងកាលពីថ្ងៃទី៣ ខែមេសា កន្លងទៅនេះថា អាហារគឺជា “អាវុធស្ងាត់” ក្នុងការប្រយុទ្ធប្រឆាំងនឹងទណ្ឌកម្មរបស់លោកខាងលិច។ រុស្ស៊ីអាចបញ្ឈប់ការទិញលក់អាហារជាមួយប្រទេសដែលរុស្ស៊ី “ចាត់ទុកថាមិនរាក់ទាក់” ដោយនាំតែទៅកាន់ប្រទេសជាមិត្តប៉ុណ្ណោះ។
លោក Medvedev បានព្រមានកាលពីថ្ងៃសុក្រនៅលើ Telegram របស់គាត់ថា ជាការសងសឹកចំពោះទណ្ឌកម្មដែលដាក់ដោយលោកខាងលិច ជុំវិញការឈ្លានពានអ៊ុយក្រែន នោះរុស្ស៊ីនឹង «មិនផ្គត់ផ្គង់ផលិតផល និងផលិតផលកសិកម្មដល់សត្រូវរបស់យើងទេ»។
លោក Medvedev បាននិយាយថា «យើងនឹងផ្គត់ផ្គង់ស្បៀងអាហារ និងដំណាំសម្រាប់តែមិត្តភក្តិរបស់យើងប៉ុណ្ណោះ»។ លោកក៏បាននិយាយថា រុស្ស៊ីនឹងមិនទិញអ្វីពី «សត្រូវរបស់ខ្លួន» ឡើយ។
រុស្ស៊ី គឺជាប្រទេសផលិតគ្រាប់ធញ្ញជាតិដ៏ធំបំផុតមួយរបស់ពិភពលោក រួមជាមួយប្រទេសឥណ្ឌា និងប្រទេសចិន។ រុស្ស៊ីក៏ជាអ្នកនាំចេញស្រូវសាលីធំជាងគេផងដែរ។
ប្រទេសរុស្ស៊ីផ្គត់ផ្គង់ 18% នៃស្រូវសាលីរបស់ពិភពលោក និង 39% នៃប្រេង canola ។ ប្រសិនបើរុស្ស៊ីដាក់កម្រិតលើការនាំចេញរបស់របរទាំងនេះ ឬពិភពលោកមិនព្រមនាំចូលទំនិញទាំងនេះពីរុស្ស៊ីទេនោះ វាអាចបំបាត់ភាពអត់ឃ្លានជាសកល នេះបើយោងតាមកាសែត Washington Post។
ការនាំចេញកសិផលបាននាំប្រទេសរុស្ស៊ី ទទួលបាន ៣៧ ពាន់លានដុល្លារ ក្នុងឆ្នាំ ២០២១ ហើយរុស្ស៊ីមាន «អតិថិជនច្រើន» នៅខាងក្រៅអឺរ៉ុប និងអាមេរិកខាងជើង។
ក្នុងឆ្នាំ ២០១៤ បន្ទាប់ពីរុស្ស៊ីបញ្ចូលឧបទ្វីបគ្រីមេ សហរដ្ឋអាមេរិក និងសហភាពអឺរ៉ុប (EU) បានដាក់ទណ្ឌកម្មសេដ្ឋកិច្ចយ៉ាងមានប្រសិទ្ធភាពលើទីក្រុងម៉ូស្គូ។ ហើយទន្ទឹមនឹងនោះ រុស្ស៊ីក៏បានឆ្លើយតបនឹងវិធានការមួយចំនួន រួមទាំងការហាមប្រាមការនាំចូលអាហារជាច្រើន។ តែទោះជាយ៉ាងណា ប្រទេសលោកខាងលិចបានដាក់ទណ្ឌកម្មបន្ថែមទៀត ចាប់តាំងពីថ្ងៃទី២៤ ខែកុម្ភៈ នៅពេលដែលរុស្ស៊ីធ្វើប្រតិបត្តិការយោធាពិសេសនៅអ៊ុយក្រែន។
ហានិភ័យនៃការខ្វះខាតស្បៀងអាហារក្នុងពិភពលោកត្រូវប្រុងប្រយ័ត្នបន្ទាប់ពីសង្គ្រាមរុស្ស៊ី និងអ៊ុយក្រែនបានផ្ទុះឡើង។ អ៊ុយក្រែនក៏ជាប្រទេសផលិតស្រូវសាលីឈានមុខគេក្នុងពិភពលោកផងដែរ។
នៅថ្ងៃទី៣១ ខែមីនា ប្រធានាធិបតីរុស្ស៊ី លោក Vladimir Putin បានចុះហត្ថលេខាលើក្រឹត្យមួយ ក្នុងការនាំចេញឧស្ម័នទៅកាន់ «បណ្តាប្រទេសដែលមិនរួសរាយរាក់ទាក់» (ដែលត្រូវបានដាក់ទណ្ឌកម្មសេដ្ឋកិច្ចលើប្រទេសរុស្ស៊ី) នឹងត្រូវទូទាត់ជាប្រាក់រូពី ចាប់ពីថ្ងៃទី១ ខែមេសា៕ រក្សាសិទ្ធិដោយ៖ លឹម ហុង
