នេះជាហេតុការណ៍គ្រោះថ្នាក់ចរាចរណ៍មួយ ពិតជារន្ធត់ខ្លាំងណាស់ នៅពេលដែលរថយន្ត Ford Ranger ១គ្រឿង បានបើកបោះពួយដូចយន្តហោះ បុកម៉ូតូកំពុងជិះផ្ទុយទិសគ្នាយ៉ាងសាហាវតែម្តង។
តាមរយៈវីដេអូឃ្លីប ដែលកត់ត្រាបានដោយរថយន្ត១គ្រឿងទៀត បានបង្ហាញរថយន្ត Ford Ranger កំពុងបើកចូលមកនៅកន្លែងផ្លូវកោងយ៉ាងលឿន ដោយមិនបន្ថយល្បឿននោះទេ ហើយក៏បានប៉ះទង្គិចរថយន្តពណ៌ខ្មៅ១គ្រឿង កំពុងចតនៅខាងស្តាំ បណ្តាលឲ្យខ្ទាតមកគន្លេងឆ្វេងទទឹងផ្លូវ និងកិនពីលើម៉ូតូ៣គ្រឿង យ៉ាងសាហាវ បណ្តាលឲ្យសិស្សស្រី៤នាក់ និងបុរសម្នាក់ ផ្លោងខ្ទាតទៅលើដីគួរឲ្យអាសូរជាខ្លាំង។
សំណាងល្អណាស់ ដែលរថយន្តមានកាមេរ៉ា មកពីខាងក្រោយ ជាន់ហ្វ្រាំងទាន់ពេលវេលា ហើយមនុស្សទាំង៥នាក់នោះ ក៏បានរួចផុតពីការបុក។ អ្នកបើកបររថយន្ត ford បាននិយាយថា ដោយសារស្បែកជើងរបស់គាត់ជាប់កល់ក្រោមឈ្នាន់ហ្វ្រាំង ទើបគាត់មិនអាចឈប់រថយន្តបាន។
លទ្ធផលតេស្តក៏បានបង្ហាញថា បុគ្គលនេះមិនបានបំពានលើកំហាប់ជាតិអាល់កុលនោះទេ។ នៅពេលកើតហេតុ អ្នកបើកបរបានសារភាពថា ខ្លួនបានបើករថយន្តក្នុងល្បឿនប្រហែល ៨០ គីឡូម៉ែត្រក្នុងមួយម៉ោង។
គេបានដឹងថា ក្នុងចំណោមជនរងគ្រោះទាំង៥នាក់ ក្នុងនោះ ៤នាក់រងរបួសស្រាល និងម្នាក់ទៀតរបួសធ្ងន់៕ រក្សាសិទ្ធិដោយ៖ លឹម ហុង
