វីដេអូមួយបានបង្ហាញយុវជនមួយក្រុមជិះរថយន្តទំនើប Maruti Suzuki Ertiga ខណៈ២នាក់ឡើងរាំលើដំបូលរថយន្ត ស្ថិតក្នុងស្ថានភាពហាក់ស្រវឹងស្រា បើទោះបីជារថយន្តកំពុងចលនា បានទាក់ទាញចំណាប់អារម្មណ៍ និងហួសចិត្តយ៉ាងខ្លាំង ពីអ្នកធ្វើដំណើរឆ្លងកាត់។
តាមរយៈវីដេអូរយៈពេល ៣៣ វិនាទី ដែលថតដោយអ្នកដំណើរម្នាក់ បានបង្ហាញរថយន្ត Ertiga កំពុងចលនាទៅមុខយឺតៗនៅលើផ្លូវដ៏មមាញឹក ហើយបុរសវ័យក្មេងពីរនាក់ កំពុងឈររាំនៅលើដំបូល ហើយថែមទាំងលើកដបស្រាបង្ហាញទៀតផង។ ប៉ុន្តែ នៅពេលដែលពួកគេដឹងថា មាននរណាម្នាក់កំពុងថតវីដេអូ ពួកគេក៏ចុះមកដីវិញ រួចនាំគ្នាចូលទៅក្នុងរថយន្តទាំងអារម្មណ៍ហាក់មិនសប្បាយចិត្តនោះទេ។
តែទោះជាយ៉ាងណា រូបភាពដ៏ព្រហើនខាងលើនេះបានទទួលការយកចិត្តទុកដាក់ជាពិសេសពីប៉ូលីសនៃទីក្រុង Ghaziabad រដ្ឋ Uttar Pradesh ប្រទេសឥណ្ឌា។ ដោយផ្អែកលើស្លាកលេខទីបំផុត ប៉ូលិសបានកោះហៅយុវជនពាក់ព័ន្ធចំនួន៥នាក់។
ក្រៅពីត្រូវពិន័យជាប្រាក់ចំនួន ២០,០០០ រូពី (ប្រហែល ២៦៥ ដុល្លារ) យុវជនទាំង ៥ នាក់ ក៏ត្រូវទទួលទណ្ឌកម្មពីការងើបឈរ និងអង្គុយ ជាច្រើនដង និងនិយាយពាក្យសុំទោស «ឈប់ប្រព្រឹត្តបែបនេះម្តងទៀតហើយ»។
គួរបញ្ជាក់ឲ្យដឹងថា ថ្មីៗនេះ ប៉ូលីសឥណ្ឌា បានធ្វើសកម្មភាពយ៉ាងខ្លាំង ក្នុងការដាក់ទណ្ឌកម្មលើអ្នកបំពានច្បាប់ចរាចរណ៍ ដោយផ្អែកលើព័ត៌មាន និងវីដេអូរបស់សាធារណជន។ ហើយអ្នកទាំងអស់នោះ គឺគ្មាននរណាម្នាក់អាចគេចផុតពីការផាកពិន័យ និងរងទទួលទណ្ឌកម្មបន្ថែមឡើយ៕ រក្សាសិទ្ធិដោយ៖ លឹម ហុង
गाज़ियाबाद में युवकों को गाड़ी की छत पर नाचना पड़ा भारी वायरल वीडियो संज्ञान में आने के बाद पुलिस ने काटा 20000 का चालान और 5 को गिरफ्तार किया गया pic.twitter.com/GmUhlZSgfb
— prateek kaushik (@ImprateeKaushik) April 2, 2022