វីដេអូដែលថតបាននៅកន្លែងកើតហេតុបានបង្ហាញថា ផ្នែកខាងរថយន្តបានផ្ទុះឆេះសន្ធោសន្ធៅ។ រថយន្តនោះត្រូវបានគេនិយាយថា បានបើកបុកទ្វារស្ថានទូតរុស្ស៊ី នៅទីក្រុង Bucharest (រ៉ូម៉ានី) ក្នុងល្បឿនលឿន ប៉ុន្តែមិនអាចចូលទៅក្នុងបរិវេណស្ថានទូតបានទេ។
ក្រោយទទួលដំណឹងថា មានហេតុការណ៍បានកើតឡើងភ្លាមៗរថយន្តពន្លត់អគ្គិភ័យបានទៅដល់កន្លែងកើតហេតុ ប៉ុន្តែ អ្នកបើកបរបានស្លាប់នៅនឹងកន្លែងទៅហើយ។
យោងតាមស្ថានីយទូរទស្សន៍ Digi 24 របស់ប្រទេសរ៉ូម៉ានី មានមនុស្សតែម្នាក់គត់នៅក្នុងរថយន្តដែលបង្កគ្រោះថ្នាក់នេះ។ តែទោះយ៉ាងណា នៅពេលនោះ គេក៏មិនទាន់ដឹងច្បាស់ថា តើឧបទ្ទវហេតុនេះជាគ្រោះថ្នាក់ដោយចេតនា ឬយ៉ាងណានោះទេ។
ប៉ូលីស Bucharest បាននិយាយថា ពួកគេបានទទួលព័ត៌មានអំពីឧបទ្ទវហេតុនេះ នៅស្ថានទូតរុស្ស៊ីនៅម៉ោង ៦ ព្រឹក ថ្ងៃទី ៦ ខែមេសា (ម៉ោងក្នុងតំបន់)។ អ្នកបើកបរត្រូវបានគេប្រកាសថាស្លាប់ពេលក្រុមពន្លត់អគ្គីភ័យបានមកដល់កន្លែងកើតហេតុ។
ប៉ូលីសបាននិយាយថា ពួកគេកំពុងស៊ើបអង្កេតឧប្បត្តិហេតុនេះ ប៉ុន្តែ បានបដិសេធមិនបង្ហាញអត្តសញ្ញាណអ្នកបើកបរនោះទេ។
កាលពីថ្ងៃទី៥ ខែមេសា ប្រទេសរូម៉ានីបានប្រកាសថា ខ្លួននឹងច្រានចោលការចោទប្រកាន់របស់រុស្ស៊ីចំនួន១០ ពីបទ “ប្រព្រឹត្តមិនស្របនឹងបទដ្ឋានអន្តរជាតិ” ខណៈប្រទេសអឺរ៉ុបមួយចំនួនផ្សេងទៀត ក៏បានធ្វើចលនាស្រដៀងគ្នានេះ ក្នុងរយៈពេលប៉ុន្មានថ្ងៃថ្មីៗនេះ។
សូមបញ្ជាក់ថា ប្រជាជនអ៊ុយក្រែនជិត 624,860 នាក់ ត្រូវបានជម្លៀសទៅកាន់ប្រទេសរ៉ូម៉ានី ចាប់តាំងពីប្រទេសរុស្ស៊ីបានចាប់ផ្តើមប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ។ ហើយបច្ចុប្បន្ន ប្រជាជនប្រហែល 80,000 នាក់ នៅតែស្ថិតក្នុងប្រទេសរ៉ូម៉ានី៕ រក្សាសិទ្ធិដោយ៖ លឹម ហុង
