នេះជារដូវកាលសែនផ្នូរដូនតា ឪពុកម្តាយ ញាតិសន្តាន ដែលបានចែកឋាន ជារៀងរាល់ឆ្នាំ នៅក្នុងអំឡុងដើមខែមេសា ដែលពលរដ្ឋខ្មែរជាប់ខ្សែស្រឡាយចិន តែងហៅថា «ឆេង ម៉េង» ។ ហើយក្នុងអំឡុងពេលនេះ អ្នកដែលគោរពប្រតិបត្តិ នឹងចេញទៅកាន់ទីបញ្ចុះសព ឬផ្នូរដូនតានៅតាមវត្តអារាម ដើម្បីសម្អាត និងបួងសួងគោរពបូជា ដោយគេមានជំនឿថា វិញ្ញាណរបស់អ្នកដែលបានស្លាប់ទៅ នឹងតាមថែរក្សាអ្នកដែលនៅរស់មានសេចក្តីសុខសប្បាយ ប្រកបមុខរបររកស៊ីកាក់កប បំពេញភារកិច្ចការងារកាន់តែរលូន និងជោគជ័យ។
សូមបញ្ជាក់ថា ពិធីសែនឆេងម៉េងឬ Ching Ming នេះ គឺជាប្រពៃណីរដ៏ពេញនិយមរបស់ជនជាតិចិន តៃវ៉ាន់ ហុងកុង ម៉ាកាវ សឹង្ហបុរី ឥណ្ឌូនេស៊ី មីយ៉ាន់ម៉ា ថៃ កម្ពុជា និងម៉ាឡេស៊ី ដែលតែងតែប្រារព្ធឡើងជារៀងរាល់ឆ្នាំ មិនអាចរំលងនោះទេ។
ដើមឡើយ ក្រដាសសែនត្រូវបានចាត់ទុកថាជាបទដ្ឋាន ប៉ុន្តែ ឥឡូវនេះ មនុស្សកំពុងមាននិន្នាការប្លែកៗ តាមរយៈសែនដុតអគារធនាគារទាំងមូល (ធ្វើពីក្រដាស) ឬរថយន្តក្រដាស ដែលមានទំហំប្រហាក់ប្រហែលនឹងរថយន្តពិតៗអុីចឹង ដែលធ្វើឲ្យមានការភ្ញាក់ផ្អើល និងហួសចិត្តជាខ្លាំង។
ជាក់ស្តែង ឆេង ម៉េង នៅម៉ាឡេស៊ី បានធ្វើឲ្យមានការភ្ញាក់ផ្អើលជាខ្លាំង ខណៈគ្រួសារមួយបានដឹករថយន្តក្រដាសដូចរថយន្តពិតៗ ទៅកាន់ទីបញ្ចុះសព តាមរយៈឡានដឹកទំនិញ។
តែទោះយ៉ាងណា ក្រោយពីបានឃើញបែបនេះ អ្នកលេងអុីនធើរណែតបានបញ្ចេញមតិសើចចំអកថា៖ «ខ្ញុំបានដុតកុំព្យូទ័រទំនើបមួយចំនួន ដើម្បីឱ្យពួកវាអាចលួច (hack) ចូលធនាគារពីផ្ទះបាន»។
ភាគច្រើននៃអ្នកនិយមលេងអុីនធើរណែតផ្សេងទៀតជឿថា ពេលវេលាដ៏ល្អបំផុត ដើម្បីបង្ហាញពីភាពកតញ្ញូតាធម៌ គឺមិនមែនបន្ទាប់ពីសមាជិកគ្រួសារអ្នកបានស្លាប់នោះទេ ប៉ុន្តែ ជាពេលដ៏ល្អគួរធ្វើ គឺនៅពេលពួកគេនៅរស់តណ៎ា!។ ហើយការធ្វើបែបនេះបន្ទាប់ពីមនុស្សជាទីស្រឡាញ់ស្លាប់គឺគ្មានប្រយោជន៍អ្វីឡើយ គ្មាននរណាដឹងថា តើពួកគេនឹង ‘ទទួល’ វាឬអត់។ តែផ្ទុយទៅវិញ នេះគ្រាន់តែជាលេសដើម្បីលួងចិត្តខ្លួនឯងប៉ុណ្ណោះ៕ រក្សាសិទ្ធិដោយ៖ លឹមហុង
