យោងតាមរបាយការណ៍ថ្មីៗនេះ របស់វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI), អ៊ីស្រាអែល គឺជាប្រទេសនាំចេញអាវុធធំជាងគេទី១០ នៅលើពិភពលោក។
ពិតណាស់ ស្របពេលដែល រុស្ស៊ី និងអ៊ុយក្រែន កំពុងផ្ទុះជម្លោះដាក់គ្នា ខណៈពេលដែលអ៊ីស្រាអែល កំពុងតាមដានការអភិវឌ្ឍន៍នៃអរិភាពក្នុងប្រទេសអ៊ុយក្រែន ជាមួយនឹងការគណនានៃផលប៉ះពាល់នយោបាយ និងសេដ្ឋកិច្ច ដែលអាចធ្វើទៅបាន ខ្លួនក៏សង្ឃឹមថា នឹងសម្រេចបាននូវកិច្ចព្រមព្រៀងនាំចេញដែលទំនងជានឹងជំរុញឧស្សាហកម្មលក់អាវុធមួយនេះរបស់ខ្លួន។
ការនាំចេញអាវុធសរុបរបស់អ៊ីស្រាអែល កាលពីឆ្នាំមុន បានឈានដល់ ៩ ពាន់លានដុល្លារ កើនឡើងពី ៨.៣ ពាន់លានដុល្លារ ក្នុងឆ្នាំ ២០២០ ដែលស្មើនឹង ៣% នៃការចំណាយលើវិស័យយោធាសរុបរបស់ពិភពលោក។
ការនាំចេញអាវុធរបស់អ៊ីស្រាអែលត្រូវបានគេរំពឹងថា នឹងស្ទុះងើបឡើងវិញយ៉ាងខ្លាំងនៅឆ្នាំនេះ បន្ទាប់ពីយុទ្ធនាការយោធាដែលរុស្ស៊ីកំពុងចាប់ផ្តើមនៅក្នុងប្រទេសអ៊ុយក្រែន។
ការនាំចេញអាវុធមួយចំនួនរបស់អ៊ីស្រាអែល ក្នុងរយៈពេលប៉ុន្មានឆ្នាំនេះ បានទៅរដ្ឋអារ៉ាប់ឈូងសមុទ្រ (Gulf Arab) ដែលបានទិញសព្វាវុធ និងប្រព័ន្ធសន្តិសុខ ប៉ុន្តែមិនបានផ្សព្វផ្សាយជាសាធារណៈ សូម្បីតែមុនពេលពួកគេត្រូវបានប្រកាសកិច្ចព្រមព្រៀងធម្មតាក៏ដោយ។
នៅដើមឆ្នាំ ២០២០ ប្រទេសខាងលើទាំងនោះ បានចំណាយប្រាក់ចំនួន ៨០០ លានដុល្លារ ដល់អ៊ីស្រាអែល ដើម្បីទិញសព្វាវុធ រួមទាំងកម្មវិធីការពារវាយលុក និងអេឡិចត្រូនិកផងដែរ។
សូមបញ្ជាក់ថា ចំណែករបស់អ៊ីស្រាអែលនៃការនាំចេញអាវុធ គឺទៅកាន់អឺរ៉ុប 30%; អាស៊ី-ប៉ាស៊ីហ្វិក 44%; និងអាមេរិកខាងជើង 20% ។
នៅពេលដែលសង្រ្គាមនៅអ៊ុយក្រែនផ្ទុះឡើង វាមានន័យថា សព្វាវុធអ៊ីស្រាអែលកាន់តែច្រើន នឹងស្វែងរកផ្លូវទៅកាន់អឺរ៉ុប ដោយប្រកួតប្រជែងជាមួយឧស្សាហកម្មអាវុធរបស់សហរដ្ឋអាមេរិក។ បច្ចុប្បន្ន អឺរ៉ុបបាននាំចូល 54% នៃអាវុធ និងប្រព័ន្ធសន្តិសុខទាំងអស់របស់សហរដ្ឋអាមេរិក។
ការពិតដែលថាប្រទេសអាល្លឺម៉ង់ បានប្រកាសពីការដំឡើងថវិកាការពារជាតិប្រចាំឆ្នាំចំនួន ១០០ ពាន់លានអឺរ៉ូ គឺបានទទួលការយកចិត្តទុកដាក់ជាពិសេសពីអ៊ីស្រាអែល។ Tel Aviv ត្រូវបានគេរំពឹងថា នឹងនាំចេញកាំជ្រួចប្រឆាំងរថក្រោះ និងរថពាសដែកទៅកាន់ប្រទេសអាល្លឺម៉ង់ ជាថ្នូរដែលអាល្លឺម៉ង់នឹងផ្គត់ផ្គង់នាវាមុជទឹកដល់អ៊ីស្រាអែល។
ការកើនឡើងនៃថវិកាការពារជាតិរបស់ប្រទេសស៊ុយអែត ក៏ត្រូវបានគេរំពឹងថា នឹងទិញគ្រាប់កាំភ្លើងធំតម្លៃរាប់សិបលានដុល្លារ ពីអ៊ីស្រាអែលផងដែរ។ ចក្រភពអង់គ្លេសនឹងធ្វើដូចគ្នា បើទោះបីជាខ្លួនបានកាត់បន្ថយថវិកាការពារជាតិរបស់ខ្លួនយ៉ាងខ្លាំង ក្នុងរយៈពេលប៉ុន្មានទសវត្សរ៍ចុងក្រោយនេះក៏ដោយ។
ចំណែកឥណ្ឌាវិញ ក៏ជាជាប្រទេសនាំចូលអាវុធធំទីពីរក្នុងពិភពលោកនាំមុខ អេហ្ស៊ីប អូស្ត្រាលី និងចិន។ ការនាំចេញរបស់អ៊ីស្រាអែលទៅកាន់ប្រទេសឥណ្ឌា មានចំនួន ១ ពាន់លានដុល្លារក្នុងមួយឆ្នាំ។
New Delhi ត្រូវបានផ្តល់សិទ្ធិដោយ Tel Aviv ក្នុងការផលិត និងនាំចេញយន្តហោះគ្មានអ្នកបើកបរ និងគ្រាប់រំសេវ ដែលរចនាដោយអ៊ីស្រាអែល នៅទូទាំងអាស៊ីអាគ្នេយ៍។ ប្រព័ន្ធឡាស៊ែរដែលកំពុងត្រូវបានអភិវឌ្ឍនៅក្នុងប្រទេសអ៊ីស្រាអែល ក៏ត្រូវបានគេរំពឹងថា នឹងស្វែងរកផ្លូវទៅកាន់ប្រទេសឥណ្ឌាជាយថាហេតុ។
នេះបើយោងតាមអ្នកឃ្លាំមើលមជ្ឈិមបូព៌ា, នោះការពង្រីកជម្លោះប្រដាប់អាវុធជុំវិញពិភពលោក ជាក់ស្តែងថ្មីៗនេះនៅអ៊ុយក្រែន នឹងជំរុញឧស្សាហកម្មអាយុរបស់អ៊ីស្រាអែល នាពេលខាងមុខ៕ រក្សាសិទ្ធិដោយ៖ លឹម ហុង
