ខណៈពេលដែលពិធីបុណ្យចូលឆ្នាំថ្មីប្រពៃណី កាន់តែកៀកខិតជិតចូលមកដល់ គេសង្កេតឃើញថា ប្រពលរដ្ឋខ្មែរ ជាពិសេសពីសំណាក់ប្រុសៗ កំពុងចាប់ផ្តើមប្រជុំជើងគ្នា ព័ទ្ធវង់ផឹកស៊ីជាបណ្តើរៗ ដោយចាក់ធុងបាស់កងរំពង លាន់ឮស្ទើរគ្រប់ទីកន្លែងតែម្តង បន្ទាប់២ឆ្នាំកន្លងមកនេះ ពុំបានជួបជុំសប្បាយ ដោយសារតែជំងឺរាតត្បាតកូវីដ១៩។
តែទោះជាយ៉ាងណា ទន្ទឹមនឹងនេះផងដែរ ក៏សូមបងប្អូន ហូបចុកឲ្យចេះប្រមាណខ្លួន កុំដាក់ដល់ថា្នក់លែងស្គាល់ផ្លូវណាទៅផ្ទះ ពោលគឺបើស្រវឹងធ្លាក់ភ្នែកហើយ គួរតែសម្រាកនៅនឹងកន្លែង កុំបើកបរ ឬធ្វើដំណើរទាំងស្រវឹង ដើម្បីបង្ការជៀសវាងកើតមានគ្រោះថ្នាក់ជាយថាហេតុណាមួយកើតឡើងនៅតាមផ្លូវ ដែលនាំតែទុក្ខដាក់ខ្លួនប៉ុណ្ណោះ។
ដោយឡែក វីដេអូមួយបង្ហាញអ្នកផឹក២នាក់ នាំគ្នាទៅផ្ទះយ៉ាងត្រដាបត្រដួស (លូនផង វារផង) ហើយទីបំផុត ម្នាក់ក្នុងចំណោមអ្នកទាំងពីរ «ឡើង» ស្ពាន មិនរួច ផុតដៃផុតជើង ដាច់ផ្ងាររមៀលធ្លាក់ចុះក្រោម ឡើងច្រងិបច្រងិល ធ្វើឲ្យអ្នកលេងបណ្តាញសង្គម ផ្ទុះសំណើចហួសចិត្តយ៉ាងខ្លាំងតែម្តង។
ក្រោយពីឃើញមហាវេទនាបែបនេះ គ្រប់គ្នាគ្មានពាក្យអ្វីគួរត្រូវថ្លាថ្លែង គឺបានត្រឹមអស់សំណើចតែប៉ុណ្ណោះ៕ រក្សាសិទ្ធិដោយ៖ លឹមហុង
