អ្នកវិទ្យាសាស្ត្របានសន្មត់ជាយូរមកហើយថា ការផុតពូជនៃដាយណូស័រ គឺទាក់ទងនឹងការបុកគ្នារវាងអាចម៍ផ្កាយ Chicxulub និងផែនដី។
ជាក់ស្តែង ថ្មីៗនេះ ជាលើកទីមួយហើយ ដែលក្រុមបុរាណវត្ថុវិទូ បានរកឃើញហ្វូស៊ីលសំណល់ នៃដាយណូស័រ ដែលកាលបរិច្ឆេទស្លាប់ ស្របគ្នានឹងឥទ្ធិពលអាចម៍ផ្កាយតែម្តង។
សាស្ត្រាចារ្យ Paul Barrett នៃសារមន្ទីរប្រវត្តិសាស្ត្រធម្មជាតិនៅទីក្រុងឡុងដ៍ (ចក្រភពអង់គ្លេស) បាននិយាយថា ហ្វូស៊ីលជើងដាយណូស័រ នោះ ជាកម្មសិទ្ធិរបស់បុគ្គលនៅក្នុងពពួក Thescelosaurus ។
តាមការប៉ាន់ស្មានថា ការប៉ះទង្គិចគ្នានេះកើតឡើងប្រហែល ៦៦ លានឆ្នាំមុន។ ហ្វូស៊ីល Thescelosaurus មានទីតាំងនៅជិតបំណែកថ្មអវកាសដ៏ធំមួយ ដែលគេជឿថាជាពិរុទ្ធជននៃការស្លាប់។
អ្នកបុរាណវិទូបានរកឃើញហ្វូស៊ីលនៅកន្លែង Tanis ក្នុងរដ្ឋ North Dakota សហរដ្ឋអាមេរិក ដែលត្រូវបានគេស្គាល់ថាជាកន្លែងបញ្ចុះសពដាយណូស័រ។
នេះជាលើកទីមួយហើយ ដែលជនរងគ្រោះដាយណូស័រ ត្រូវបានរកឃើញពីកន្លែងផលប៉ះពាល់នៃអាចម៍ផ្កាយ ដែលបានបន្សល់ទុកនូវរណ្ដៅដីដែលមានទទឹងរហូតដល់ ១៥០ គីឡូម៉ែត្រ ក្នុងឈូងសមុទ្រម៉ិកស៊ិក នាពេលបច្ចុប្បន្ននេះ។
ការបុកគ្នានេះ ត្រូវបានគេសង្ស័យថា ជាពិរុទ្ធជនដែលបណ្តាលឱ្យចុងបញ្ចប់នៃយុគសម័យដាយណូស័រ និងការកើនឡើងនៃថនិកសត្វ។
Robert DePalma បុរាណវិទូនៅសាកលវិទ្យាល័យ Manchester បាននិយាយថា “យើងមានភស្តុតាងដំបូងនៃដាយណូស័រ ត្រូវបានសម្លាប់ដោយផលប៉ះពាល់អាចម៍ផ្កាយ នៅចុងបញ្ចប់នៃ Cretaceous” ។
យោងតាមអ្នកជំនាញ ការរកឃើញហ្វូស៊ីលដាយណូស័រនៅថ្ងៃនៃការបំផ្លិចបំផ្លាញ គឺជារឿងមិនធម្មតា។ នៅពេលដែលអាចម៍ផ្កាយបានបុកនឹងផែនដី នោះវាបានអង្រួនចានទ្វីប ហើយបណ្តាលឱ្យមានរលកធំៗនៃទន្លេ បឹង និងមហាសមុទ្រ។
Tanis មានចម្ងាយប្រហែល 2,896 គីឡូម៉ែត្រ ពីទីតាំងនៃឥទ្ធិពលអាចម៍ផ្កាយនៅក្នុងឈូងសមុទ្រម៉ិកស៊ិកបច្ចុប្បន្ន ចេញពីឧបទ្វីប Yucatan ។ រលករញ្ជួយដែលបញ្ចេញដោយឥទ្ធិពលអាចម៍ផ្កាយ បានទៅដល់ Tanis ក្នុងរយៈពេលប៉ុន្មាននាទីប៉ុណ្ណោះ៕ រក្សាសិទ្ធិដោយ៖ លឹម ហុង
