រាជធានីភ្នំពេញ៖ មន្ត្រីគណៈកម្មាធិការជាតិរៀបចំបុណ្យជាតិ-អន្តរជាតិ បានឲ្យអ្នកយកព័ត៌មាន CEN.COM.KH ដឹងថា ថ្ងៃចាប់ផ្តើមព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅទន្លេចតុមុខ មុខព្រះបរមរាជវាំង រាជធានីភ្នំពេញ ថ្ងៃទី២ ខែវិច្ឆិកា ឆ្នាំ២០១៧ មិនទាន់មានមនុស្ស ឬភ្ញៀវទេសចរជាតិ-អន្តរជាតិ ចូលរួមច្រើនកុះករទេ។
យ៉ាងនេះក្តី មន្ត្រីរៀបចំបុណ្យជាតិ បានព្យាករណ៍ថា ចំនួនប្រជាពលរដ្ឋ ឬភ្ញៀវទេសចរ នឹងអាចមានចំនួនច្រើននៅពេលល្ងាច។
សមត្ថកិច្ចកងរាជអាវុធហត្ថ ប្រចាំការនៅតាមបណ្តោយផ្លូវជាតិលេខ ៥ គោលដៅខាងជើងរាជធានីភ្នំពេញ បានឲ្យដឹងដែរថា នៅកាលពីព្រឹកថ្ងៃទី២ ខែវិច្ឆិកានេះ មានប្រជាពលរដ្ឋធ្វើដំណើរចាកចេញពីរាជធានីភ្នំពេញ តាមមធ្យោបាយផ្សេងៗ ពិសេសរថយន្តមានចំនួនច្រើន ប៉ុន្តែមិនដឹងថា គោលដៅ របស់ប្រជាពលរដ្ឋទាំងនោះ នឹងវិលត្រឡប់ចូលក្រុងវិញ នៅពេលល្ងាច ឬបែបណានោះទេ។ លោកថា នៅថ្ងៃដំបូងព្រះរាជពិធីបុណ្យអុំទូក ឆ្នាំនេះ មិនសូវឃើញរថយន្ត ដឹកប្រជាពលរដ្ឋ មកពីតាមបណ្តាលខេត្តនានា តាមបណ្តោយផ្លូវជាតិលេខ ៥ ចូលមកក្នុងក្រុងភ្នំពេញច្រើននោះទេ។
ព្រះរាជពិធីបុណ្យអុំទូក មានរយៈពេល ៣ថ្ងៃ គឺចាប់ពីថ្ងៃទី២ ដល់ថ្ងៃទី៤ ខែវិច្ឆិកា ឆ្នាំ២០១៧។
ខាងក្រោមនេះជាទិដ្ឋភាព ឬរូបថតផ្សេងៗ នៅក្បែរវេទិកា ទន្លេចតុមុខ មុខព្រះបរមរាជវាំង៖
