មន្ត្រីឥណ្ឌា បាននិយាយនៅថ្ងៃទី១០ ខែមេសា ឆ្នាំ២០២២ ថា ក្រុមចោរបានដើរតួជាមន្ត្រីរដ្ឋាភិបាល ស្ថិតក្រោមនាយកដ្ឋានធារាសាស្ត្រក្នុងរដ្ឋ Bihar បន្ទាប់មកបានប្រើឧបករណ៍កាត់ឧស្ម័ន និងម៉ាស៊ីនរំកិល ដើម្បីយកពួកវាចេញ។ ការវាយកម្ទេចស្ពានដែលគេបោះបង់ចោលនោះ គឺស្ថិតនៅក្នុងភូមិ Amiyawar ចម្ងាយប្រហែល ១៥០ គីឡូម៉ែត្រភាគខាងត្បូងនៃរដ្ឋ Patna។
កម្លាំងជំនាញសង្ស័យថា ក្រុមចោរទាំងនោះបាននាំសម្ភារៈស្ពានទៅលក់អេតចាយតែម្តង។
គេបានដឹងថា ការលក់ដែកអេតចាយ គឺជាអាជីវកម្ម “ដ៏សំណាង” នៅក្នុងប្រទេសឥណ្ឌា ព្រោះថា ប្រទេសនេះតែងតែកើតមានករណីលួចគ្រឿងបន្លាស់ដែក ពីទ្រព្យសម្បត្តិសាធារណៈ ទៅលក់ក្នុងកន្លែងលក់អេតចាយ ដែលមិនមានការរៀបចំធំដុំនោះទេ តែអាចរកលុយឱ្យបានយ៉ាងលឿន។
យោងតាមមន្ត្រីប៉ូលីស ប្រជាជននៅ Amiyawar ជឿថា ក្រុមចោរទាំងនោះបានដៃ គឺបន្ទាប់មន្ត្រីរដ្ឋាភិបាល បានសម្រេចចិត្តរុះរើស្ពានចាស់ ដែលសាងសង់លើអាងទឹក កាលពី ៣ ទសវត្សរ៍មុន ដោយសារតែវាមិនត្រូវបានអនុម័តប្រើទៀត។
Gandhi Chaudhary អាយុ ២៩ ឆ្នាំ ជាអ្នកភូមិម្នាក់ដែលបានឃើញហេតុការណ៍នេះ បានប្រាប់ឲ្យដឹងថាថា “ពួកគេបានមកជាមួយគ្រឿងចក្រធុនធ្ងន់ ឧបករណ៍កាត់ដែក ហើយធ្វើការរយៈពេលពីរថ្ងៃ ដើម្បីរុះរើស្ពាន ប៉ុន្តែ ពួកគាត់ពុំបានស្គាល់ពីអត្តសញ្ញាណរបស់ក្រុមរុះរើស្ពានទាំងនោះទេ។ លោក Gandhi បន្តថា ក្រោយពីរុះរើស្ពានរួច សំណល់អេតចាយត្រូវបានដាក់ចូលក្នុងរថយន្ត ហើយទីតាំងនោះក៏ «ទំនេរ» ស្អាតតែម្តង។
លោក Subash Kumar មន្ត្រីប៉ូលីសដែលកំពុងស៊ើបអង្កេតឧបទ្ទវហេតុនេះ បាននិយាយថា “យើងបានកំណត់អត្តសញ្ញាណក្រុមលួចស្ពានជាច្រើននាក់ ហើយមួយចំនួនទៀតកំពុងត្រូវបានស្វែងរក។ ពួកគេបានបំផ្លាញទ្រព្យសម្បត្តិសាធារណៈ ព្រោះតែដើម្បីលក់អេតចាយយកលុយ”៕ រក្សាសិទ្ធិដោយ៖ លឹម ហុង
